Read NQAARIIT NE ROOG A lim ale 12 Bible Online

A lim ale 12 - NQAARIIT NE ROOG bible

A lim ale 12

¹Aaroon fa Miryam fee o cigeen um kaa nqasooxoogu, yaam ne Moyiis a gilig’ina o tew o Kuukuus.

²A layayo yee: «Ndax na pexey Moyiis soom o Yaal oxe a laytu fa xeet fee? Ndax layee fa den, a reefandin na in itam?» O Yaal oxe a nana kaaga.

³Moyiis koy, o koor o neewandooxu tigi a reeƭu, a moƴ o neewandoox oxuu ta waagna o ref took lanq ke.

⁴Ndak fo ndak, o Yaal oxe a xoya a Moyiis fa Aaroon fa Miryam, a hebil a den ee: «Ndetyo nuun daduk fop no Ƭiif ne um xetteel, mi o Yaal oxe.» A ndeta maaga, den daduk fop.

⁵O Yaal oxe a fudooxa no eel le soo a fod no ndokand ne no Ƭiif ne. A xoya a Aaroon fa Miryam, da matiid den ɗik fop.

⁶A laya a den ee: «Nan-gilooxyo a paax fa lay es! A jegangaa a ndeer nuun o tuleer, no mbeeñax um laltinoorkan, mi o Yaal oxe, lay fo ten no ƭaaɗ.

⁷Reftee neene koy na Moyiis fee o tag es, hoolooxuuma o doxin xeet es fop.

⁸Kaam jasnooraa fo ten, layaa fo ten a qool qac. Kaam feeñooxan itam, ta ga’aa a qoolaand ale no ndam es. Nam nu saɗtu boog o nqasooxanaa a Moyiis fee o tag es?»

⁹Fuux le no Yaal oxe a biltooxa took Miryam fa Aaroon. O Yaal oxe a dalfooxa o ret,

¹⁰too yaa eel le a riƈatooxna Ƭiif ne ta yooroox’ina, Miryam a daawa a tik a maak, a ranig taw nen fa liit. Aaroon a geleerooxa too a ga’a yee Miryam kaa jeg’atu a tik-a-maak.

¹¹Maaga, Aaroon a laya a Moyiis ee: «O yaal es, waasani a in. Koo ba o gadin a in a qaw ale helna a in na bakaad fee i mbi’na no ƥodaxel in.

¹²Ba Miryam a yoq nene ta nandna, o ga’angaan ee o njaaƈ onqaa xonitna no fuɗ ya um soo a ñootkeel, cer um a yaqoox.»

¹³Maaga, Moyiis a xeɗooxa o Yaal oxe yee: «Wo Roog, mexe xeɗang o wodandin!»

¹⁴O Yaal oxe a laya a Moyiis ee: «A soƥangaa yee faap um kaa duxid’un na mukit, ndax refkoogee na gaci boo ñaal ɓetuu ƭik? Yaaga boog, fat a wegel tafil saŋe ne boo ñaal ɓetuu ƭik, soo a sogkateel o jaɓ kam fee.»

¹⁵Miryam a wege ñaal ɓetuu ƭik tafil saŋe ne, too xeet fee a moofa boo neen Miryam a nomtooxiidu teen.

¹⁶Cinj kaaga, xeet fee a inoorta Haseroot soo a ndalik na koƥ-a-ƥor ale Paaraan.