Read NQAARIIT NE ROOG A lim ale 13 Bible Online

A lim ale 13 - NQAARIIT NE ROOG bible

A lim ale 13

¹O Yaal oxe a laya a Moyiis ee:

²«Luli wiin da ngorook saax le Kanaan um ci’kaa Ii-isra’el we. Fat o koor o leng a lulel na carind aluu refna. Oxuu refna na den fat a ref o yaal a qaw.»

³Moyiis a lulta a den na koƥ-a-ƥor alaa Paaraan, ne o Yaal oxe a heblit’uuna. Goor weene fop kelfa a ndeeƭu no Ii-isra’el we.

⁴Keeke ndefu a kon den: Na carind ale Ruben: Samuwa fee o ƥiy Saakur,

⁵na carind ale Simewon: Safat fee o ƥiy Hori,

⁶na carind ale Yudaa: Kaleb fee o ƥiy Yefune,

⁷na carind ale Isakaar: Igal fee o ƥiy Yoseef,

⁸na carind ale Efrayim: Hoose fee o ƥiy Nun,

⁹na carind ale Bensame: Palti fee o ƥiy Rafu,

¹⁰na carind ale Sabulon: Gadi’el fee o ƥiy Sodi,

¹¹na carind ale Manaase fee o ƥiy Yoseef: Gadi fee o ƥiy Susi,

¹²na carind ale Dan: Ami’el fee o ƥiy Gemali,

¹³na carind ale Aseer: Setuur fee o ƥiy Mika’el,

¹⁴na carind ale Neftali: Naxbi fee o ƥiy Wofsi,

¹⁵na carind ale Gaad: Gewel fee o ƥiy Maki.

¹⁶Keene ndefu a kon ake no goor we Moyiis a lul’ina, ndax da ngorook saax le. Moyiis feran’u a Hoose fee o ƥiy Nun Yosuwe.[5]

¹⁷Ye Moyiis a lulaa goor weene, ndax da ngorook saax le Kanaan, a laya a den ee: «Fat nu ndoktin no ɓemb-roog o ñamaak, cinj kaaga nu ŋaay took xa coong axe.

¹⁸Ƭeetyo a paax ne saax le fo we ngenna teen a nandna, ndax wiin um a njega doole, ndi njegiran, ndax a maya, ndi mayee.

¹⁹Ƭeetyo ndax saax le a faaxa, ndi faaxee, ndax teeru ke a njega saŋe, ndi njegee.

²⁰Ƭeetyo, ndax lanq ke a nqaaɗa, ndi kaa maas, ndax taxar a naaga o saxaa teen, ndi nam. Saqyo njambaar tigi, too fat nu ƥisiid na xa tim axe no taxar ke no saax le.» Kaaga oxaa jopir’a waxtu fee taxar biiñ ke a sogna o mbooraa.

²¹Maaga, a ngorooka saax laa, a nqotit na koƥ-a-ƥor alaa Sin, a njof Rehob boo farna fa Hamat.

²²A ndokta no ɓemb-roog o ñamaak ole no saax le soo a ndet boo Hebron maa Ahiman fa Sesay fa Talmay we ndeeƭna xa taan Anak, a ngen’ina. Sinjaan ne Hebron a adoorit’a ne Cowaan fee Misira xa kiid ɓetaa ƭaq.

²³A mbadiida na yulanq alaa no Tuunq biiñ kaa, a ƥolit maaga a naaq alaa saqna tuunq xa biiñ. A naaq aleene koy, kaa juux’el a teex, soo ɗik a ngadooxin. A mbaaƭa itam xa goronaad fo xa tun.

²⁴O mbiñ onqaaga a ne’’ate a yulanq ale no Tuunq biiñ ke yaam tuunq ke Ii-isra’el we a ƭegit’ina maaga.

²⁵We lul’eena a mbida saax laa no ñaal qarɓeen nahik soo a nomtooxiid.

²⁶Yaa da mbadiidna, a ndalfooxa o ndet maa Moyiis fa Aaroon fa xeet fee Isra’el fop, ndeeƭna Kades kam a koƥ-a-ƥor alaa Paaraan. A mbetandooxa a den ke da nga’’ina fop soo a lal a den xa tim axe da ƥistiid’ina no saax laa.

²⁷Keeke refu ke da mbetandoox’ina a Moyiis: «I ndeta no saax le lul’oona a in. No ndigil, saax laa fo sis fo suum a ndaxritaa yoo. Xa tim axe owey.

²⁸Kaa koy, we ngenna maaga a njega doole, too teeru ke den a njega saŋe, a magin lool. I nga’a maaga sax xa taan Anak.[6]

²⁹Aa-amalek we ngentu no ɓemb-roog o ñamaak, Heeheet we fo Yeeyebus we fo Aa-amori we a ngenit na xa coong axe, soo Kaakanaan we a ngenit paam o maag ole Mediterane fo na ƥeeraamb ale no xuluɓ ole Yordaan.»

³⁰Kaleb a ɗega fa lay faa, a lay ee: «Fat i ndet rek, njaɓ saax le, yaam in mbaagu a den.»

³¹Kaa koy, goor we yoon’ina fo ten a laya yee: «I mbaagee o song wiin weene, yaam den ngupu a in doole tigi.»

³²A ndalfooxa o ndef no layaa paaxeer mbaambir Ii-isra’el we no kaa jofna no saax le da ƭeetik’ina. A layayo yee: «Saax le i ngorook’ina, kaa ref saax laa na ƈaxraa a ndeer den. We i nga’na maaga fop, cool ƥor a ndefu.

³³I nga’a maaga sax xa taan Anak axe ndefna wiin fodu ne sabab. Kaa i mbodtoogu nen soƈ paam den, too den oo kaa ƭeetoogu a in nen soƈ.»