Read NQAARIIT NE ROOG A lim ale 14 Bible Online

A lim ale 14 - NQAARIIT NE ROOG bible

A lim ale 14

¹Maaga, Ii-isra’el we fop a njaxa xa buuq, a mbe no loolaa.

²Kaa nqasanoogu a Moyiis fa Aaroon, a layaa a den ee: «I nqonit’u kam saax laa Misira mbaat i nqonit kam a koƥ-a-ƥor alene sax, moƴu na in!

³Xar taxu o Yaal oxe a ɓisaa a in no saax leene i mbaritkeel laƥ, soo rew in fo xa teɓandoong in a njaɓel? Ndax moƴkoogee na in, i nomtoox Misira?»

⁴Maaga, a layra a ndeer den ee: «Fat i njil o lakas oxaa adooxanna a in, soo i nomtoox Misira.»

⁵Moyiis fa Aaroon a ndeɓooxa a lanq, a lup a tagid mbaambir Ii-isra’el we mbokatoor’ina maaga.

⁶Yosuwe fee o ƥiy Nun fa Kaleb fee o ƥiy Yefune, mbog’ina no we ƭeetik’ina saax laa, a ndalfooxa o mbaar toki den,

⁷a lay mbokatax naa yee: «Saax le i ngorook’ina, saax felu tigi a refu.

⁸A soƥangaa yee o Yaal oxe fa in a faru, xan a ɗox a in boo no saax laaga fo sis fo suum a ndaxritaa, too xan a ci’in a in.

⁹Kaa rek, ba nu siiknoor fo o Yaal oxe, too ba nu saɗar we ngenna no saax leene, yaam xan i kalɓasoox a den. Njegatee a roog fa leng faa na saytooxaa a den, ndaa in o mat, o Yaal oxe xe fa in. Ba nu saɗar a den boog.»

¹⁰Xeet faa fop kaa ndiirooxoogu o mbarit a Yosuwe fa Kaleb a kac, ndaa ndak fo ndak, a qoolaand ale no ndam onqe no Yaal oxe a meleƈta no eel le yooroox’ina Ƭiif ne o Yaal oxe a xetteel, too Ii-isra’el we fop a nga’aan.

¹¹O Yaal oxe a laya a Moyiis ee: «Xeet fene kaa ngapko sibaxam boo a mban, a mbañ o ngim na mi, ke fi’uuma xa anddiloor a ndeer den fop oo?

¹²Xam xawit a den piste soo tas a den. Kaa koy, xam sutit na wo xeet faa moƴna o magin fene too a moƴin o jeg doole.»

¹³Moyiis a doona o Yaal oxe yee: «Miimisira we a anda yee na pexey katil of sutto xeet fene a ndeer den.

¹⁴A layaan we ngenna no saax lene, too den oo a anda yee wo o Yaal oxe, woxey a ndeer xeet of. A anda itam ee kaa o feeñooxaa a den jaxrañ, yooroox a den fo eel of, ñaaƴaa mbaambir den no ñaal ne kam eel le, soo no yeng ole kam aal fiɗel le.

¹⁵Boo andoona yee warandooraa xeet fene, a saax ake nanna gon of a layteel, xan a lay ee:

¹⁶‹O Yaal oxe waagee o ɗox xeet feene boo no saax laa ta daaɓoox’ina yee xan a cooxin a den. Keene o mat taxu ta saŋkit a den kam a koƥ-a-ƥor ale.›

¹⁷Yaaga boog, o Yaal oxe, lalti o magnel katil of, ne laytanoona yee:

¹⁸‹Mi refu o Yaal oxe na muñantaa soo may fo o paaxel. Kaam waasantaa njofaƭar fo tooñ, ndaa kaam xawaa oxe tooñna soo rabdinooxaa njofaƭar ne no paap ke took xa ƥiy den boo no suk ndadkandeer mbaat no nahkandeer.›

¹⁹Na yirmande fa maak fee wo boog, waasani xeet fene njofaƭar den, ne waasantoona a den no kaa xotitna Misira boo mene.»

²⁰O Yaal oxe a doonaan ee: «Ne xeɗtaxamoona o ten, waasanaam a den.

²¹Kaa koy, ne ta wooritna yee mexey ñoowaa, mi o Yaal oxe fo ne ta wooritna yee o ndam es xan a mayƭand lanq ke,

²²neene a woortu yee o leng no we sibaxama rokkee no saax leene. Ke da nga’na a qoolaand ale no ndam es fop oo fo xa anddiloor axe fi’uuma Misira fo na koƥ-a-ƥor alaa, yaqanee da maad o mbogaxam, a mbañ o nan-giloox o ñuxur es. Weene fop nga’kee muk saax le daaɓooxuuma fo daan den ee xam cooxin a den, yaam kaa yapatilaam.

²⁴Kaa koy, Kaleb fee o tag es o mat, fog’eerna fa den yiif, too a damoox na mi, xam fi ta rok no saax le ta horook’ina, xa taan um a njegkin.

²⁵Aa-amalek we fo Kaakanaan we ngentu na yulanq ale. O feet boog, fat nu nomtoox a cinj too nqotatin na koƥ-a-ƥor ale, njagin farna fo o a Kal ale no xeet le.»

²⁶O Yaal oxe a laya a Moyiis fa Aaroon ee:

²⁷«Nanaam a ñuxmatilax ake no Ii-isra’el we. Ndi faan soxodu lene kaa mbugko ñuxmatilooxanaxam boo a mban?

²⁸Layi a den ee: Ne ta wooritna yee mexe ñoowaa, mi o Yaal oxe, xam doon a nuun ke nantuuma na nuun.

²⁹Xan xa tal nuun a yoq kam a koƥ-a-ƥor alene, nuun fop we lim’eena, a xotit no we njegna xa kiid qarɓeen ƭik a jof took, too a ñuxmatilooxooganaam.

³⁰Nu ndokkee muk no saax le daaɓoox’uuma yee xan nu ngen teen, bo ta yoqaa Kaleb fee o ƥiy Yefune fa Yosuwe fee o ƥiy Nun.

³¹Xa teɓandoong nuun axe nu layna koy ee xan a njaɓel, xam rokin a den no saax leene nu sibna, da njegkin.

³²Nuun o mat, xa tal nuun xan a yoq kam a koƥ-a-ƥor alene,

³³soo xa teɓandoong axe nuun a yoq teen, a molaa fo xa siir den boo xa kiid qarɓeen nahik. Xan a ngadoox a qaw ale no ngimaƭar nuun boo yaa nu nqonitkaa kam a koƥ-a-ƥor alene, nuun fop.

³⁴Ne nu ngorooxitna saax le ñaal qarɓeen nahik, neene a qaw ale no njofaƭar nuun a dalitkaa took nuun boo xa kiid qarɓeen nahik, ñaal oo ñaal a fi o hiid. Neene, xan nu and ke o goƭ a nuun a ɗaxaa.

³⁵Keene rek jegum kaa layuuma a nuun, mi o Yaal oxe. Neene mat um fesoorkaa fa xeet fa soxodu fene, siiknoorna fa mi. Xan a nqonit kam a koƥ-a-ƥor alene, a sooƴ teen.»

³⁶Goor we Moyiis a lul’ina da ngorook saax laa, too a layan’u saax leene paaxeer, ye da ngatna boo a tax xeet fee fop a ñuxmatilooxanaa a Moyiis,

³⁷den fop, o Yaal oxe a xawa a den, da nqon.

³⁸A ndeer no goor weene ngorook’ina saax le, Yosuwe fee o ƥiy Nun fa Kaleb fee o ƥiy Yefune soom nqon’eeru.

³⁹Ye Moyiis a daawinna Ii-isra’el we xa ƭelem axaaga no Yaal oxe fop, a ndalfooxa o naqadiloox tigi.

⁴⁰A inooxayo no feet olaa ƥiiɓ teel, ndax da ŋaay na xa coong axaa, a lay ee: «I mbakaada, ndaa ndiiki koy, in wey, ndetaa no mbiñ onqe o Yaal oxe a tox’ina a in.»

⁴¹Moyiis a laya a den ee: «Xar taxu nu nanaƭar ke o Yaal oxe a heblitna? Keene faaxkee na nuun.

⁴²Ba nu ndet, yaam o Yaal oxe refee a ndeer nuun. Ba nu mbarnoorik a qoox nuun maa no fañ nuun.

⁴³Aa-amalek we fo Kaakanaan we yoo weene mbaambir nuun, too xan a maafit a nuun laƥ. Feek kaa nu mbes o Yaal oxe a cinj, ten itam oo refkee fa nuun.»

⁴⁴Yaqanee koy, a ƥoowa boo a ŋaay na xa coong axaa, ndaa arka ne no ngiɓoor ne no saŋe ne a yoq’u, too Moyiis itam oo sutoox’ee.

⁴⁵Naaga, Aa-amalek we fo Kaakaanaan we ngen’ina na xa coong axeene a mbudooxiida. A nqawa a den soo a ƭiir a den boo Horma.