Read NQAARIIT NE ROOG A lim ale 15 Bible Online

A lim ale 15 - NQAARIIT NE ROOG bible

A lim ale 15

¹O Yaal oxe a laya a Moyiis

²ta daawin Ii-isra’el we kene: «Yaa nu ndokkaa kam saax le um ci’kaa a nuun boo ngen teen,

³nu mbugangaam o ƥoxot sadax fa ndoxel mbaat sadax fa njamsa’oor, ta ref yaa nu mbadnaa a tegit mbaat nu sadaxtaa no fud o letu mbaat no qew ke, fat a hat na xa siir axe mbaat na ked ake nuun. Keene xan a ref sadax faa felaxama tuñ bo, mi o Yaal oxe.

⁴Oxe na ɓoxotkaxam njegel ne, fat a yoonandtin sadax tuufe-duufe kaa ndefna ngap kilo tadik mbidel kaa nqiiwteena o liitar fa genwal diwliin,

⁵a yoonandtin itam o liitar fa genwal biiñ. O mbaal o ndew onquu ɓoxoteena nen sadax fa ndoxel mbaat sadax fa njamsa’oor, keene a yoonanditkeel.

⁶A soƥangaa yee suk mbaal oo, fat a yoonandtel ngap kilo ɓetuu fa leng mbiɗel kaa nqiiwteena xa liitar xa ƭaq diwliin,

⁷a yoonandtel itam xa liitar xa ƭaq biiñ. Keene xan a ref sadax faa felaxama tuñ bo, mi o Yaal oxe.

⁸A soƥangaa yee nqoox sadaxte nen sadax fa ndoxel mbaat nen sadax fa mbadnir a tegit mbaat nen sadax fa njamsa’oor,

⁹fat njegel ne a yoonandtel ngap kilo ɓetuu nahik mbiɗel kaa nqiiwteena xa liitar xa tadaq diwliin,

¹⁰a yoonandtel itam xa liitar xa tadaq biiñ. Keene xan a ref sadax faa felaxama tuñ bo, mi o Yaal oxe.

¹¹Neene a ware o fi’it no sadax nqoox nuu refna fo no suk mbaal luu refna fo no njegel lakas nuu hatna na ked ake.

¹²Nuu cegel ke sadaxteena a mayitna, nuu refna fat a yoonandtel sadax ke ngebleena.

¹³Fat oxuu fogna na xeet fee Isra’el a fi’it neene ke layeena, yaa ta ɓoxotaxam sadax faa felaxama tuñ bo, mi o Yaal oxe.

¹⁴A soƥangaa yee o gataakoon olaa genarooxiidna a nuun mbaat olaa genatna a ndeer nuun kaa bugaam o ɓoxot sadax faa felaxama tuñ bo, mi o Yaal oxe, fat a fi’tin ne nu mbi’tan.

¹⁵Kebil leng kut na jegkaa no mbokatax ne fop, ta ref na nuun fo no gataakoon ole refna a ndeer nuun. Keene xan a ref na nuun fo na xa taan nuun kebil ñufkeer muk. Mbaambir es, mi o Yaal oxe, jegee njektirand a ndeer nuun fo xa kataakoon axeene.

¹⁶Nuun fo xa kataakoon axe ndefna a ndeer nuun, nuun fop na mbogkaa kebil leng kut ke fo bargal leng kut ke.»

¹⁷O Yaal oxe a laya a Moyiis

¹⁸ta daawin Ii-isra’el we kene: «Yaa nu ndokkaa no saax le um ɓisaa a nuun,

¹⁹boo ñaamaa mbuuru naa hatna no ke nu nqooxna maaga, fat nu mbatin teen a qaaj, ƥoxotaam o ten nen sadax, mi o Yaal oxe.

²⁰Fat nu njuɗ o gaf sadax no nqiiw eetaand ne nuun, ƥoxotaam o ten, ne um ɓoxotteel pep eetaand ke no bace le nuun.

²¹Nuun fo xa taan nuun, fat nu mbatnanaxam boo faw, mi o Yaal oxe, sadax no qiiw eetaand ke nuun.»

²²«A soƥangaa yee nu mbakaada, too nu ndiyiran, yaa nu ngayeerna kebil keene fop cooxuuma a Moyiis, mi o Yaal oxe,

²³fop ke hebluuma reefandin na Moyiis, a xotit no ñaal naa cooxtuuma kebil es boo kili,

²⁴neeke a waru o refit: Mbokatax ne a ndiyangee bakaad feene, fat da sadaxit nqoox nen sadax fa ndoxel faa felaxama tuñ bo, mi o Yaal oxe, a yoonandtin sadax fee no tuufe-duufe ke fa fee na biiñ fee ne ta hebliteena. Fat da sadaxit itam suk fambe nen sadax fa mbaasnoor pakaad.

²⁵Fat o saasadax oxe a jofoorand mbokatax ne no Ii-isra’el we fop fa mi, too xan a mbaasanel, yaam kaa mbakaad too ndiyiran, too a ƥisiidaxam sadax fa ndoxel den fa sadax fa mbaasnoor pakaad den.

²⁶Mbokatax ne no Ii-isra’el we fop fo xa kataakoon axe ndefna a ndeer den xan a mbaasanel, yaam den fop ngadooxu bakaad feene.

²⁷A soƥangaa yee o kiin o leng kut bakaadu too diyiran, fat a sadaxit fambe rew laa jegna o hiid yaam bakaad fee ta fi’na.

²⁸Fat o saasadax oxe a jofoorand oxeene kiin bakaadna too diyiran fa mi. A jofoorandangaan fa mi boo a ƴut, xan a waasanel.

²⁹Fop we na mbakaadkaa too ndiykiran na mbogkaa kebil leng kut ne, ta ref no Ii-isra’el we mbaat na xa kataakoon axe na ñoowaa a ndeer den.

³⁰Kaa koy, boo o Ii-isra’el mbaat o gataakoon a diyna o bakaad, a tooñaxam, mi o Yaal oxe, too oxeene kiin fat a sutel xeet fee.

³¹Ne ta sibna fa lay es soo a ɗap kebil es, fat a saŋkel, yaam a wara o gadoox njofaƭar um.»

³²Ye Ii-isra’el we a ndefna kam a koƥ-a-ƥor alaa, o koor a bet’e a daxanaa xa cuuƭ na bes fee na ñootnax ale.

³³Waa mbet’uuna ta daxanaa a ƥisaan maa Moyiis fa Aaroon fo mbokatax naa fop.

³⁴A yetooxooge, yaam ke warna no ten and’afulaand.

³⁵Maaga, o Yaal oxe a laya a Moyiis ee: «O koor oxeene fat a warel. Fat mbokatax ne fop a mbartin a kac tafil saŋe ne.»

³⁶Mbokatax naa fop a sutaan saŋe ne, a ndooman a kac bo ta xon, ne o Yaal oxe a heblit’uuna a Moyiis.

³⁷O Yaal oxe a laya a Moyiis

³⁸ta daawin Ii-isra’el we kene: «Nuun fo xa taan nuun, fat nu mbi’aa a tup na xa noflax axe no toki ke nuun, ndoon teen o ƥaak olaa xiiyiiyna.

³⁹Boo nu ƭeetaa a tup akeene, xan nu mbetandooran kebil es fop, mi o Yaal oxe, ndeef a den. Neene, nu ndeefkee ke xeeñ nuun a yuxmaa fo ke yulna a kid nuun, too nu njimbooxkee no ngore’aƭar.

⁴⁰Nu mbetandooxangaa kebil es, ndeef a den, xan nu kesanel a mi fee Roog nuun.

⁴¹Mi refu o Yaal oxe Roog nuun sutitna a nuun no saax laa Misira, ndax um ref Roog nuun. Kaam ee mi refu o Yaal oxe Roog nuun.»