Read NQAARIIT NE ROOG A lim ale 16 Bible Online

A lim ale 16 - NQAARIIT NE ROOG bible

A lim ale 16

¹Koora fee o ƥiy Yisxar refna o ƥiy Kehat fee o ƥiy Lewi a sooba xa ƥiy xa tadaq na carind ale Ruben ndefna Daatan fa Abiram we xa ƥiy Eliyab fa Oon fee o ƥiy Pelet,

²boo da siiknoor fa Moyiis. A yoon’a fo goor teemeed ƭik fo goor qarɓeen ƥetik no Ii-isra’el we ndefna kelfa ke na xeet fee fo wiin maak we maadoogna pokatax ke.

³A mbokatoorana a Moyiis fa Aaroon, a lay a den ee: «A ŋaay ale nuun oxe jolaa a naaq! Mbokatax ne Isra’el fop kaa ted, too o Yaal oxe xey a ndeer in. Xar taxu boog nu nqalaataa yee nuun ngupu na xeet fee no Yaal oxe?»

⁴Yaa Moyiis a nanna kaaga, a julxooxa.

⁵A laya a Koora fo a yaj um fop ee: «O feet o Yaal oxe a lay oxe ta jegna fo an tedu fo an waagun o matiid, ndax ta ɓoxotin sadax. Oxe ta jilkaa na waagkan o matiid.

⁶Wo Koora fo a yaj of, mbi’yo kene: Fat oxuu refna na nuun a xot o njaq,

⁷a gef teen a kaagaañ o feet soo a yip took fee cuuraay mbaambir no Yaal oxe. Oxe o Yaal oxe a jilkaa, ten tedu. Nuun Leelewi we kañ, a ŋaay nuun na jolaa a naaq!»

⁸Moyiis a layahina a Koora yee: «Nuun Leelewi we, nan-gilooxyo boog.

⁹Ndax kaa nu nqeef ke Roog fee Isra’el a jilna a nuun no mbokatax ne Isra’el, ndax nu mbaagin o matiid, saq calel ke no Ƭiif ne ta xetteel soo njalanaa mbokatax ne kam fee?

¹⁰A ci’a a nuun nu matiidin, wo Koora fo goor fog of we fop, ndefna Leelewi we, soo ndiiki nu qicooxaa calel no saasadax ke.

¹¹Neene, wo fo a yaj of, refee yee Aaroon nu ñuxmatilooxanaa, ndaa o Yaal oxe sax sax nu mbokatooranu!»

¹²Moyiis a lulta a xoyankel a Daatan fa Abiram we xa ƥiy Eliyab, ndaa a layayo yee: «I ngarkee!

¹³Ke sutoona a in no saax laa fo sis fo suum a ndaxritoogna, ndax i saŋkoox kam a koƥ-a-ƥor alene kaa deyirang a dey boo o bugahin o fi’oox kelfa in!

¹⁴A woora yee ɓisiro a in no saax laa fo sis fo suum a ndaxritaa, lasiro a in xa qol fo a ƭing taxar biiñ, i njegkin. Ndax kaa o foog ee fuul o laytaa? I ngarkee de!»

¹⁵Moyiis a fuuxa tigi too a laya o Yaal oxe yee: «Ba o jaɓ sadax den. Mosiim o jang na den dara, refee o faam o leng sax, too mosiim o tooñ o leng na den.»

¹⁶Moyiis a laya a Koora yee: «O feet, wo fo a yaj of fop, fat nu ngar ngeenoox mbaambir no Yaal oxe. Aaroon itam xan a ref maaga.

¹⁷Fat oxuu refna no yoon of a xot o njaq um, a yip teen cuuraay soo a ɓisiidin mbaambir no Yaal oxe. Neene, xan a jeg fo njaq teemeed ƭik fo qarɓeen ƥetik. Wo fa Aaroon itam, fat oxuu refna na nuun a xot o njaq um.»

¹⁸A nqota oxuu refna o njaq um, a ngef teen a kaagaañ, a yip took fee cuuraay soo a ngeenoox no ndokand ne no Ƭiif ne o Yaal oxe a xetteel. Moyiis fa Aaroon itam maaga a ndeeƭu.

¹⁹Koora a sooba mbokatax ne fop boo da mbokatooran a Moyiis fa Aaroon no ndokand ne no Ƭiif ne o Yaal oxe a xetteel. Maaga, a qoolaand ale no ndam onqe no Yaal oxe a feeñooxa mbokatax ne fop.

²⁰O Yaal oxe a laya a Moyiis fa Aaroon ee:

²¹«Sutooxyo a ndeer mbokatax nene, too xam saŋik a den no ñofu!»

²²Moyiis fa Aaroon a ngunga a lanq, a lay ee: «Wo Roog, wo fee saqna o ñis no pindel ke fop, ndax bakaad no kiin o leng kut xan a tax o fuuxan mbokatax ne fop?»

²³O Yaal oxe a laya a Moyiis ee:

²⁴«Hebli mbokatax ne da ndiƈatoox me Koora fa Daatan fa Abiram a ngenna.»

²⁵Moyiis a inooxa, a ret maa Daatan fa Abiram, too maak we Isra’el a ndeefanaan.

²⁶A laya mbokatax ne yee: «Ndiƈatooxyo ƭiif ke no wiin soxodu wene, too ba nu nduq dara no ke da njegna, yaam ndik pakaad ke den a mbarnoor a nuun.»

²⁷Maaga, xeet faa a ndiƈatooxa ngenand ne Koora fa Daatan fa Abiram. Daatan fa Abiram a sutoox’a, a ngeenoox no ndokand ƭiif den, a yoon fo rew den fo xa ƥiy den fo we mbogna no ƥasil den fop.

²⁸Moyiis a laya yee: «No keeke nu anditkaa yee o Yaal oxe o mat lulaxam ndax um fi’aa keene fop, too ke um fi’aa inooree na mi.

²⁹Boo wiin weeke a nqonitna ne wiin we fop a nqontaa, muj den a nandangaa fa muj no lakas we, fat nu and ee o Yaal oxe luliraam.

³⁰A soƥangaa koy ee o Yaal oxe a fi’a kaa mosaandeena o ga, boo lanq ke a mbetooxna ndax da ƭuud a den, den fo o jeg den fop, a nqaadangaa jaaniif fo o ñis, yaaga xan nu and ee wiin weeke a tooña o Yaal oxe.»

³¹Yaa Moyiis a tiimaa tiim rek, lanq kaa Daatan fa Abiram a ndak’ina a ndalfooxa o qaacoox.

³²Lanq ke a mbetooxa, a ƭuud a den, den fo ƥasil den fo o jeg den fop. Neene a refit’u itam na Koora fo wiin um fo o jeg um fop.

³³A nqaada jaaniif fo o ñis, den fo fop ke da njegna. Lanq ke a muura a den, too a moocayo a ndeer mbokatax ne.

³⁴Ii-isra’el we ndeeƭna paam den fop, a ƈufa ye da nanna xa buuq axe den, yaam kaa saɗaroogu lanq ke a ƭuud a den itam.

³⁵Fiɗel a hatiida maa no Yaal oxe too a doxa riw wiin teemeed ƭik fo qarɓeen ƥetik waa ƥoxotoogna cuuraay faa.