Read NQAARIIT NE ROOG A lim ale 17 Bible Online

A lim ale 17 - NQAARIIT NE ROOG bible

A lim ale 17

¹O Yaal oxe a laya a Moyiis ee:

²«Hebli a Eleyasaar fee o ƥiy Aaroon, o saasadax o maak oxe, ta gis fo njaq ne ndefna ndeer o dox ole soo a picit koƭu a kaagaañ ake. Fo njaq neene kaa ted,

³yaam mi a ƥoxot’e, ke wiin waa mbakaadna boo a nqon a njeg’uuna fop oo. Fat a nqawnel[7] ndax da muurtel o sadaxand ole. Keene xan a ref a maƭax no Ii-isra’el we.»

⁴Eleyasaar fee o saasadax a janga fo njaq ne mbi’it’eena xanjar, too we ndox’eena ñoow a njeg’u a den. A nqawne, ndax da muurtel o sadaxand ole.

⁵A muur aleene kaa wetandoogu Ii-isra’el we yee o leng o lakas oxaa faqaqooreerna na Aaroon jegee sañ-sañ o dox cuuraay mbaambir no Yaal oxe. O fi’angaan, xan leng kut ke dalna a Koora fo yoon um, too o Yaal oxe a lay’un o ten na pexey Moyiis, a dalong.

⁶No feet olaa, mbokatax naa Isra’el fop a ndefa no nqasanaa a Moyiis fa Aaroon, a layaa yee: «Nu mbarnoora jaaku na xeet fee no Yaal oxe!»

⁷Yaa Ii-isra’el we a mbokatooranna a Moyiis fa Aaroon, weene a mbiƈaqilooxa farna fo Ƭiif ne o Yaal oxe a xetteel. Ndak fo ndak, eel le a muuraan, too a qoolaand ale no ndam onqe no Yaal oxe a feeña.

⁸Maaga, Moyiis fa Aaroon a ndeta mbaambir Ƭiif naa,

⁹soo o Yaal oxe a lay a Moyiis ee:

¹⁰«Ndiƈatooxyo mbokatax nene, too xam saŋik a den no ñofu.» Moyiis fa Aaroon a ngunga a lanq.

¹¹Cinj kaaga, Moyiis a hebla a Aaroon ee: «Jangi o njaq of, gef teen a kaagaañ akaa ngatna no sadaxand ole soo yip took fee cuuraay. Ñofi ret jofoorand mbokatax ne fo o Yaal oxe, yaam a fuuxa, too taamaala fee a ferooxa boo a ƴut.»

¹²Maaga, Aaroon a fi’a ke Moyiis a lay’uuna, a ƴuf a ndeer xeet faa too a ga’a xil ee taamaala fee a ferooxa. A doxa cuuraay soo a jofoorand Ii-isra’el we fo o Yaal oxe.

¹³A geenooxa a ndeer we nqon’ina fo we maad’ina o ñoowaa. Maaga, taamaala fee a finqooxa.

¹⁴We nqon’ina na taamaala feene a ndeeƭa wiin cuni xarɓaxay fo cuni nahik fo teemeed ɓetuu ƭik, too we nqon’ina yaam Koora limtaand.

¹⁵Yaa taamaala faa a finqooxna, Aaroon a nomtooxa maa Moyiis no ndokand naa no Ƭiif ne o Yaal oxe a xetteel.

¹⁶O Yaal oxe a laya a Moyiis ee:

¹⁷«Hebli Ii-isra’el we, ndax o yaal a carind aluu refna a cooxong o loq. Xan o daaw boog xa loq xarɓaxay fo xa ƭaq, too took oluu refna fat o sex teen gon le na carind ale ta jegeena.

¹⁸No loq ole na carind ale Lewi koy, fat o sex teen gon le Aaroon. Neene, xan a jeg o loq o leng no yaal a carind aluu refna.

¹⁹Fat o doon xa loq axeene kam Ƭiif ne um xetteel, mbaambir arka ne no ngiɓoor ne, me um feeñoortaa a nuun.

²⁰Keeke na xewkaa: O loq ole no xe um jilkaa, xan a saqit. Neene, xam fi ndax Ii-isra’el we ñuxmatilooxankatee a nuun, too nankatiim o mbasnax den.»

²¹Moyiis a daawna Ii-isra’el we keene hebil’eena. Maaga, yaal a carind ake a ƥoxotaan, oxuu refna o loq, a carind oo carind o leng. A daaw’a fop oo fop xa loq xarɓaxay fo xa loq xa ƭaq, ole Aaroon teen a fog’u.

²²Moyiis a doona a den mbaambir no Yaal oxe, kam Ƭiif ne saqna arka ne no ngiɓoor ne.

²³No feet olaa, yaa ta retna kam Ƭiif naa, a ga’a yee o loq ole Aaroon refan’ina a carind ale Lewi a saqit’a, a saq piɗ fo xa tim xa pooru sax.[8]

²⁴Moyiis a xota xa loq axe ndeeƭna kam Ƭiif naa fop soo a ret a lalik a den Ii-isra’el we. Fop a mbaag’a o nga a den, too oxuu refna no yaal a carind ake a jangatina ole ta jegna.

²⁵O Yaal oxe a layahina a Moyiis ee: «Dakniki o loq ole Aaroon mbaambir arka ne no ngiɓoor ne. Maaga a geekkeel, ndax ta ref o anddiloor no Ii-isra’el faafañ weeke. Neene, xan o fi da mbaas a ñuxmatilax den boo nankatinum, ndax nqonkee.»

²⁶Moyiis a fi’a deŋ ke o Yaal oxe a hebil’uuna.

²⁷Ii-isra’el we a laya a Moyiis ee: «Ɗeeti rek, in fop took o nqon i njofu, a saŋkax in soom i ƈufanaa.

²⁸Oxuu matiidna Ngenand ne no Yaal oxe rek, xonaa. Ndax in fop bo i nqet, neene i nqonitkaa?»