Read NQAARIIT NE ROOG A lim ale 18 Bible Online

A lim ale 18 - NQAARIIT NE ROOG bible

A lim ale 18

¹Maaga, o Yaal oxe a laya a Aaroon ee: «Wo fo xa ƥeef fo fog of we mbogna na carind ale Lewi, nuun na ngadooxkaa tooñ ne tooñeena Mbind tedu ne. Kaa koy, wo fo xa ƥeef soom na ngadooxkaa tooñ ne fi’eena kam calel no saasadax ke nu saqna.

²Xaƴi goor fog of Leelewi we da yoon fa nuun, a ndimle’aa a nuun, wo fo xa ƥeef, yaa nu mbadnaa o far nuun mbaambir Ƭiif ne saqna arka ne no ngiɓoor ne.

³Fat a ndeef fop ke o hebilkaa a den, a ndefan meen Ƭiif ne, ndaa mbaree o mat tikoorik tedu ke mbaat o sadaxand ole. A ngayangaa keene, mbarnoorkee o leng, ta ref na den mbaat na nuun.

⁴Fat a ndef diidimle of no calel ke mbareena o mbi kam Ƭiif ne um xetteel, mi o Yaal oxe, ndaa o pogee na den matiidkee a nuun.

⁵Fat nu mbadin calel ke mbareena o mbi no Mbind tedu ne fo no sadaxand ole. Neene, xan nu mbootooxataa fuux es a biltooxan Ii-isra’el we.

⁶Nu nga’a, mi jilu goor Leelewi we fog nuun a ndeer no Ii-isra’el lakas we, ndax um jeg a den, da ndimle’aa a nuun no calel ke no Ƭiif ne um xetteel, mi o Yaal oxe.

⁷Wo Aaroon fo xa ƥeef koy, fat nu mbadin calel no saasadax nuun no sadaxand ole fo kam o Mbiñ onqe moƴna o ted refna laqa mbaƴ ne. Mi o mat cooxu a nuun calel keene. O lakas oxuu andoona yee a matiidaxam, fat a warel.»

⁸O Yaal oxe a laya a Aaroon ee: «Nan-gilooxi, mexe doxnang sadax tedu ke Ii-isra’el we a ƥoxotaxam fop. Ci’aaxoong koy, wo fo xa ƥeef, a las ale um kesaneel no sadax keene, ci’in itam xa taan of fo xa tanaraat of boo faw.

⁹No sadax ke moƴna o ted, ke doxkaandeena refu a las nuun. A las akeene no fop ke Ii-isra’el we a ƥoxotaxam nen sadax tuufe-duufe fa sadax fa mbaasnoor pakaad fa sadax fa nqendandoor tig tedu tigi a ndefu. Nuun na njegkaa a den, wo fo xa ƥeef fo xa taan of.

¹⁰Fat nu ñaamit a den no Mbiñ o tedu tigi. O koor oxuu refna no saasadax we a waaga o ñaam teen. Fat nu ƭeetin nen tedu.

¹¹Kaa jolna keene, nuun na njegkaa ke na watneel no ci’it ke Ii-isra’el we a ƥoxotaxam, too a yaandeel. A las nuun a refkaa boo kili, wo fo xa ƥeef fo xa taan of, goor fo rew. Oxuu andoona yee a xoola no ƥasil of, a waaga o ñaam teen.

¹²Ci’aam a nuun itam ke Ii-isra’el we a ƥoxotaxam no ke eetna o foor: Ke moƴna o faax na diwliin fee fo na biiñ fee fo na bele fee.

¹³Fop ke da ƥisiidkaxam no ke eetna o foor, nuun na njegkan. Oxuu fogna no ƥasil nuun too a xool, a waaga o ñaam teen.

¹⁴Kuu Ii-isra’el we a kesanaxama boo faw, nuun na njegkan itam.

¹⁵Taaw ke um ɓoxotkeel fop, nuun na njegkaa a den, ta ref no wiin we mbaat no cegel ke. Kaa koy, taaw ke no wiin we fop fo taaw cegel qoolaƭaru ke fat a mbatel.

¹⁶Fat a mbattel xa monjong xa ƥetaq xaaliis, yaa da njegna o nqool o leng, a reefandel na xa monjong xaaliis axe na eedteel no Mbiñ o tedu nqe. Xa monjong qarɓeen ƭik fo xa ƥetaq na xa monjong axeene ndefu genwal liibar xaaliis fa nqoolu.

¹⁷Kaa koy, taaw naak mbaat mbaal mbaat fambe waagkaand o wat, yaam kaa ted. Fat o wiis fo’oy le took o sadaxand ole soo dox neeneer ke, ta ref nen sadax fa ndoxel faa na felkaxam tuñ bo, mi o Yaal oxe.

¹⁸A tegeƴ ake koy, nuun na njegkan ne nu njegtaa ngang ne yaandeena fo a ñaal a ñamaak[9] ale na sadax fa njamsa’oor fee.

¹⁹Ci’aaxoong, wo fo xa ƥeef, fop ke Ii-isra’el we a ƥoxotaxam nen sadax tedu. A las nuun a bugko refaa boo kili, wo fo xa ƥeef, goor fo rew. Keene xan a woor nen ngiɓoor saƭku naa dalniteena fo jem mbaambir es.»[10]

²⁰O Yaal oxe a layahina a Aaroon ee: «Nu njegkee lam mbaat a las a leng no saax le um ci’kaa Ii-isra’el we da lasrin. Mi fa xoox es na refkaa a las nuun fo lam nuun a ndeer den.»

²¹O Yaal oxe a layahina yee: «Keeke refu ndabid ne cooxuuma Leelewi we no calel ke da mbi’aa kam Ƭiif ne um xetteel, mi o Yaal oxe. Cooxaam a den nen lam a seek xarɓaxayandeer ake na cooxteel kam Isra’el fop.

²²Ii-isra’el lakas we matiidkatee Ƭiif ne um xetteel, yaam ndik da qic hate took den soo a nqon.

²³Leelewi we soom na saqkaa calel ke no Ƭiif ne, too den na ngadooxkaa tooñ ke da mbi’kaa teen. Fat nu ngay kebil neene no suk boo no suk. Leelewi we njegoodkee lanq nen a carind a lakas ake,

²⁴yaam cooxaam a den nen lam a seek xarɓaxayandeer ake Ii-isra’el we a ƥoxotaxam. Ten taxu um lay a den ee njegkee lanq nen a carind a lakas ake Isra’el.»

²⁵O Yaal oxe a laya a Moyiis

²⁶ta daawin Leelewi we kene: «Boo Ii-isra’el we a ƥisiidna a nuun a seek xarɓaxayandeer ake cooxuuma a nuun nen lam, nuun fa qoox nuun, fat nu mbatin a qaaj xarɓaxayandeer ale no keene, ƥoxotaam o ten.

²⁷Na nuun, xan keene a fodir fo ke gend nuun a mbatnanaxam no pep ke sogna o inoor no cukand mbaat na biiñ fee na sogeel o nir.

²⁸Neene mat nu ƥistiidkaxam ci’it nuun. Fat nu mbatnitin na seek xarɓaxayandeer ake nu ndaawtaa no Ii-isra’el lakas we, ƥoxotaam o ten, ta cooxel a Aaroon fee o saasadax.

²⁹Fat nu mbatnanaam a las ale moƴna o faax no ci’it ke nu ndaawaa fop, kesanaam o ten.

³⁰Boo nu mbatnanaxama ke moƴna o faax no ke nu ndaawna, fat nu ngeekan a qoox nuun yoq ke, ne Ii-isra’el lakas we a ngeekantaa a qoox den yoq ke inoorna no cukand ne fo no nirir ole a cinj yaa da mbatinna a seek xarɓaxayandeer ale.

³¹Nu mbaagaan o ñaamit muu felna a nuun, nuun fo ƥasil nuun fop, yaam ndabid nuun oo no calel ke nu mbi’aa kam Ƭiif ne um xetteel.

³²Nu mbatnanangaam ke moƴna o faax, nu niwaƭarkee sadax tedu ke no Ii-isra’el we, refkee na nuun bakaad fa leng, too nu nqonkee.»