Read NQAARIIT NE ROOG A lim ale 19 Bible Online

A lim ale 19 - NQAARIIT NE ROOG bible

A lim ale 19

¹O Yaal oxe a daawna a Moyiis fa Aaroon

²bargal kene: «Ngebilyo Ii-isra’el we da ƥisiid a nuun naak fom laa jegeerna sik fa leng too mosafulaand o gadin a kadoor.

³Fat nu ƥoxotin a Eleyasaar fee o saasadax, ta sutel tafil saŋe ne soo a xirsel mbaambir um.

⁴Fat Eleyasaar a suup nqol um no fo’oy le no naak le soo a wiisin boo a caf ɓetaa ƭaq farna fo ndokand ne no Ƭiif ne um xetteel, mi o Yaal oxe.

⁵Fat naak le a doxel ne ta fodeena fop na kid um: ƭool ne, a tegeƴ ake, fo’oy le fo laaw ke.

⁶Fat o saasadax oxe a xot xa cuuƭ ndaxar seedar fo a naaq isoop fo xa ƥaak xa taalde’u soo a deɓ a den kam ƈulfaan ne naak le a doxteel.

⁷Cinj kaaga, fat o saasadax oxe a dap toki um a ɓogoox boo a xool, soo a sogkaa o nomtoox no saŋe ne. Yaqanee koy, xan a xoolaƭar boo no yaar olaa.

⁸Fat oxe na doxkaa naak le itam a dap toki um soo a ɓogoox. Ten oo xan a xoolaƭar boo no yaar olaa.

⁹Fat oxaa xoolna a fokat ndaw ke no naak le soo a juum a den no mbiñ o nqoolu tafil saŋe ne. Fat a geekanel maaga Ii-isra’el we, ndax ta fi’teel foofi fo ɓogdinoor ole. Keene sadax fa mbaasnoor pakaad oo.

¹⁰Oxe na fokatkaa ndaw ke no naak le fat a dap toki um itam. Yaqanee koy, xan a xoolaƭar boo no yaar olaa. Fat Ii-isra’el we fo xa kataakoon axe ndefna a ndeer den a ngayaa kebil neene boo kili.»

¹¹«Oxuu duqna o dal no kiin, xan a xoolaƭar boo bes fa ndakooxiidu.

¹²A wara o wiisel foofi fo ɓogdinoor ole no ñaal ndadkandeer ne fo no ñaal ɓetuu ƭikandeer ne, too xan a xool. Kaa koy, a ɓogdinooxangee no ñaal ndadkandeer ne fo no ñaal ɓetuu ƭikandeer ne, xan a maad o xoolaƭar.

¹³Oxuu duqna o dal no kiin soo a fañ o ɓogdinoox, a xoolaƭaranda Ngenand ne no Yaal oxe. Fat a sutel xeet fee. Xan a maad o xoolaƭar, yaam ne ta wiisaandeena foofi fo ɓogdinoor ole.

¹⁴A jega itam bargal lakas kaa mbareena o ngay: Boo o kiin a xonitna no ƭiif, oxuu ta soƥna kam faa mbaat ta rok teen, xan a xoolaƭar boo bes fa ndakooxiidu.

¹⁵A jegangaa kam fee o ƥaxañ olaa afnaandeena a paax, xan a xoolaƭar.

¹⁶Oxuu na ñaaƴaa na koƥ ale itam boo a duq o dal no kiin oxaa wareena mbaat oxaa xonoodna mbaat xa kiiƈ no kiin mbaat a mboy, xan a xoolaƭar boo bes fa ndakooxiidu.

¹⁷O kiin o qoolaƭaru a bugange o ɓogid, fat a watnanel no ndaw ke no naak le ɓoxoteena nen sadax fa mbaasnoor pakaad, ta yipel no ƥaxañ soo a ɓaatel foofi laa na sogeel o ƴeew.

¹⁸Fat oxaa xoolna a xot a naaq isoop, a suupin kam foofi le no paxañ ole soo a wiisin no ƭiif ne o kiin oxe a xonitna fo fop ke refna teen fo wiin we ndeeƭna teen. Neene a fi’itkeel itam no xe duqna xa kiiƈ no kiin mbaat o dal no kiin oxaa wareena mbaat oxaa xonoodna mbaat a mboy.

¹⁹Fat a fi’anin o kiin oxeene no ñaal ndadkandeer ne fo no ñaal ɓetuu ƭikandeer ne. Cinj kaaga, fat o kiin oxe xoolaƭar’ina a dap toki um, a ɓogoox. Kaa koy, bo ta xoolaa, ta ref no yaar olaa.

²⁰Boo o kiin oxaa xoolaƭarna a ɓogdinooxeerna, fat a sutel mbokatax ne Isra’el, yaam kaa ta xoolaƭarand Mbind tedu ne no Yaal oxe. Xan a maad fo nqoolaƭar um, yaam wiisaand foofi fo ɓogdinoor ole.

²¹Fat Ii-isra’el we a ngay kebil neene boo kili. Oxe na fi’kaa a biis ale no foofi fo ɓogdinoor ole fat a dap toki um, too oxuu duqna foofi leene, xan a xoolaƭar boo no yaar olaa.

²²Kuu o kiin o qoolaƭaru a duqna, xan a xoolaƭar, too oxuu duqna o kiin o qoolaƭaru, xan a xoolaƭar ten fa xoox um boo no yaar olaa.»