Read NQAARIIT NE ROOG A lim ale 20 Bible Online

A lim ale 20 - NQAARIIT NE ROOG bible

A lim ale 20

¹No nqool o eetaand onqe, mbokatax ne Isra’el fop a mbadiida na koƥ-a-ƥor alaa Sin, soo a ndal Kades. Maaga o mat Miryam a xonit’u soo a gasel.

²Xeet fee njeg’ee o mboofi nqaa da yerna too a mbokatoora, ndax da siiknoor fa Moyiis fa Aaroon.

³A nqasana a Moyiis too a layin ee: «I nqon’angaa ye fog in a nqonaa mbaambir no Yaal oxe sax, ta moƴ!

⁴Xar taxu nu ƥisiid a in kam a koƥ-a-ƥor alene, in xeet fee no Yaal oxe? Ndax nu mbuga mbug i nqonit teen, in fo cegel in?

⁵Xar taxu nu sutit a in Misira, ƥisiid a in no mbiñ o mbaaxeer onqene? Jegee dara kaa waageena o duuf mene. Tun nga’aand meen, taxar biiñ njegee, taxar goronaad ne’aand. Foofi fo yerel sax ga’aand.»

⁶Maaga, Moyiis fa Aaroon a ndiƈatooxa mbokatax naa, ndax da ndet no ndokand naa no Ƭiif ne o Yaal oxe a xetteel. Yaa da mbadna, a ngunga a lanq, too a qoolaand ale no ndam onqe no Yaal oxe a feeñooxa a den.

⁷O Yaal oxe a laya a Moyiis ee:

⁸«Jangi o loq ole too fokat Ii-isra’el we. Wo fa Aaroon fee o maag of, fat nu lay na kid den fo ɓil laana, too xan a sut foofi. Xan o balnit foofi no ɓil laaga, ci Ii-isra’el we da yer, den fo cegel den.»

⁹Moyiis a xota o loq ole reeƭna mbaambir arka ne no Yaal oxe, ne ta heblit’uuna o ten.

¹⁰Moyiis fa Aaroon a nqoyna mbokatax ne mbaambir ɓil le. Maaga, Moyiis a laya a den ee: «Nan-gilooxyo boog, nuun faafañ we! Ndax nu mbooga moos ee i mbaaga o sutanit a nuun foofi no ɓil leeke?»

¹¹Cinj kaaga, Moyiis a yoɗa o ɓay um soo a xaw ɓil le boo a caf a ƭak fo o loq ole ta pokoox’ina. Ndak fo ndak, foofi fo mayu a balta no ɓil le, too Ii-isra’el we a yera boo a nqeƴ, den fo cegel den itam.

¹²Maaga, o Yaal oxe a xasana a Moyiis fa Aaroon ee: «Nu ndokinkee xeet fee kam saax le um ci’kan, yaam nu ngimee na mi, too nuun taxu boo o tedel ole na katil es waagee o feeñ na kid no Ii-isra’el we.»

¹³O mbiñ onqaaga foofi le a balit’ina kaa xoyeel Meriba, tekitna nqasir, yaam maaga Ii-isra’el we a nqasanit’u o Yaal oxe. Maaga o Yaal oxe a feeñlit’u o tedel um a ndeer den.

¹⁴Yaa da ndefna Kades, Moyiis a hebla duleer maa no maad oxe Edoom, ndax da layin ee: «Fog of Ii-isra’el we kaa dee: ‹Andaa coono ke ndalna a in fop.

¹⁵Andaa ne daan in a nqaadit’ina Misira, and itam ne i ngenit’ina maaga miñu-miñu fo ne Miimisira we a ñagadiltoogna a in, in fo daan in.

¹⁶Kaa koy, i ƈufginooxa o Yaal oxe, too a nana xa buuq in. A luliida malaaka um, ta sut a in Misira. Ndiiki koy, in wey Kades, teeru fee refna no ŋat ole no saax of.

¹⁷Ngela ci’i a in i nqaañ no saax of. I ndeefkee kam xa qol axe mbaat na ƭing taxar biiñ ake, too i yerkee no kas ke. Xan i ndeef a qal a maak ale, mbañ o ƭap na ñamaak mbaat na janoon boo yaa i sutooxkaa o fiisel of.› »

¹⁸O maad oxe Edoom a doona a den ee: «Nu nqaañkee saax es! Nu njeemangaan koy, xam xire fa nuun.»

¹⁹Ii-isra’el we a nqiisa na: «A qal ale soom i ndeefkaa. I soxla’angaa foofi, in fa qoox in fo xa siir in, xan i ndabdin. Dara refee teen, kaa i nqeɗang rek, ndax i nqaañ saax of.»

²⁰O maad oxe a doonahina yee: «Nu nqaañkiran layum a nuun!» Ee-edoom we a nqetiida fo Ii-isra’el we, a mbi a yaj no xiixire a cegu doole,

²¹ndax da nqañit a den da nqaañ saax den. Maaga, Ii-isra’el we a nqurulooxa, a njang a ƭat a lakas.

²²Ii-isra’el we fop a inoora Kades soo a ngar no joong olaa Hoor,

²³refna no ŋat olaa Edoom. Maaga, o Yaal oxe a laya a Moyiis fa Aaroon ee:

²⁴«No miñeer, xan Aaroon a dab daan um. Rokkee no saax le um ci’kaa Ii-isra’el we, yaam kaa nu nanaƭaranit kebil es Meriba me foofi le a balit’ina.

²⁵Wo Moyiis boog, ɓisi a Aaroon fa Eleyasaar fee o ƥeem took o joong olaa Hoor.

²⁶Woli toki saasadax ke Aaroon a rokooxna soo rokanin a Eleyasaar fee o ƥeem. No mbiñ onqeene Aaroon a xonitkaa, a dab daan um.»

²⁷Moyiis a fi’a ke o Yaal oxe a hebil’uuna. Na kid xeet fee a ŋaayayo took o joong ole Hoor.

²⁸Moyiis a wola toki ke Aaroon, a rokan a den a Eleyasaar fee o ƥeem, soo Aaroon a xonit maaga, no jul olaa no joong olaa. Cinj kaaga, Moyiis fa Eleyasaar a mbudooxiida.

²⁹Yaa Ii-isra’el we a yegna yee Aaroon a xona, a ñaawooxaan, den fop, boo ñaal qarɓeen tadik.