Read NQAARIIT NE ROOG A lim ale 22 Bible Online

A lim ale 22 - NQAARIIT NE ROOG bible

A lim ale 22

¹Ii-isra’el we a ƭisahina, a ndalik na xa saawit axaa Mowaab, farna fo batand naa Yordaan, a njasnoor fa Yeriko.

²Balak fee o ƥiy Sipoor, reeƭna o maad Mowaab na jamaane faaga, a yega fop ke Ii-isra’el we a mbi’’ina Aa-amori we.

³O maad oxe fa xeet um fop a ndiida boo a sendaa, yaam a nga ee Ii-isra’el we owe mbadiidaa, a may bo.

⁴Maaga, Moomowaab we a laya maak we Majan ee: «A yaj aleene kaa mbug o mbiitin ke widna a in fop ne qoox a nduudnitaa daaƭ le na xa saawit axe.»

⁵O maad Balak a lula wiin maa Balam fee o ƥiy Bewoor, genoogna Petoor reeƭna na ƥeeraamb alaa no xuluɓ olaa Ofrat, no saax le no we ta fogitna xeet. Keeke refu ke ta daawnooguuna: «A jega mene xeet faa inoortiidna Misira, a may saax le fop. Owe ndala gom-ee-goma in.

⁶Mexe xeɗang boog o gar salooxanaam xeet fene, yaam o ten hupaxam doole. O fi’angaan, xeƈa xam maafin soo raxin saax le, yaam andaam ee oxuu barke’oona, xan a barke’el, too oxuu salooxoona, xan a salooxel.»

⁷Maak we Mowaab fo we Majan a ndeta maa Balam, a ƥislooxin su’nit. Ye da mbadiidna me ten, a ndaawnaan xa ƭelem axe Balak.

⁸Balam a laya a den ee: «Mbe’yo mene, too o doonanqol ole o Yaal oxe a daawinkaxam, xam cooxin a nuun o feet.» Kelfa ke Mowaab a yoqa no mbind Balam.

⁹Maaga, Roog a gara a laamit a Balam ee: «Aniin oo wiin wene ndefna no mbind of?»

¹⁰Balam a doona a Roog ee: «Balak fee o ƥiy Sipoor, refna o maad Mowaab lulu a den, ndax da yegnaam ee:

¹¹‹A jega mene xeet faa inoortiidna Misira, a may saax le fop. Mexe xeɗang boog o gar salooxanaam a den. O fi’angaan, xeƈa xam waag o song a den soo rax a den.› »

¹²Kaa koy, Roog a laya a Balam ee: «Yoonkiro fa den too salooxkiro xeet feene, yaam barke’aanum.»

¹³No feet nqes olaa, Balam a inooxa, a lay kelfa ke Balak a luliid’ina yee: «Nomtooxyo no saax nuun, yaam o Yaal oxe a xañtaxam um yoon fa nuun.»

¹⁴Kelfa ke Mowaab a nomtooxiida me Balak, a layin ee: «Balam a faña o yooniid fa in.»

¹⁵Balak a lulahina kelfa kaa moƴna o may too a moƴel o niw we eet’eena o lul.

¹⁶A mbadiida me Balam, a layin ee: «Balak fee o ƥiy Sipoor kaa tee: ‹Ba dara a xañtong o gar me mi.

¹⁷Xam neexlong bo ta dey sik, too xam fi ke o laykaxam fop. Mexe xeɗang boog o gar salooxanaam xeet fene.› »

¹⁸Balam a doona we Balak a luliid’ina yee: «Boo Balak a mayƭand’ina mbind um fa xaaliis fa nqoolu fa wurus, a cooxangaam o ten sax oo, taxkee um nanaƭaran kebil ke no Yaal oxe Roog es boo fi tig, ta ref maak mbaat teɓ.

¹⁹Ndiiki koy, mbe’yo mene nuun itam, bo um and ke o Yaal oxe a laykahinaxam.»

²⁰Kam o yeng ole, Roog a gara, a lay a Balam ee: «A soƥangaa yee wiin wene wo a nqoyiidu, inooxi yoon fa den, ndaa ke um laykang soom o fi’kaa.»

²¹No nqes naa, Balam a inooxa, a ɗap o faam o rew um, soo a yoon fo kelfa ke Mowaab.

²²Kaa koy, Roog a fuuxa na tet ale Balam, too malaaka fee no Yaal oxe a naaga jiŋ, a geenoox na ƭat ale, ndax ta xañtin ta suur. Balam oxe ŋaaya took o faam um, a yoon fo dag ɗik um.

²³O faam ole a ga’a malaaka fee geenoox’ina na ƭat ale, a woos laƥ um. O faam ole a ɗapa a ƭat ale, a jagin na xa qol axe. Balam a xawaan, ndax ta nomtiidin na ƭat ale.

²⁴Malaaka fee a reta a geenook mbaambir naa, na ƭat a ŋooɓu laa xaañna a ndeer a ƭing a ƭak taxar biiñ, xa ƭiiɗing xa ƭaq a ndeerin.

²⁵Ye o faam ole a ga’na malaaka fee no Yaal oxe, a moosnooxa o ɗiiɗing ole, a ɓeɗaale a caf ale Balam. Balam a dakooxaan o xaw.

²⁶Malaaka fee a dakooxa o fodik a den mbaambir naa, a geenoox no mbiñ o ŋooɓu nqaa o leng a waageerna o ɗapit na ñamaak mbaat na janoon.

²⁷Ye o faam ole a ga’na malaaka fee, a wondooxa fa Balam. Balam a fuuxa boo a buɓaa too a xawta o faam ole o loq um.

²⁸Maaga, o Yaal oxe a weta o don ole no faam ole, soo ta lay a Balam ee: «Ndi xar fi’oong? A caf a tadak akey kaa o xawaxam!»

²⁹Balam a doona o faam ole yee: «Kaa o fagiɗ kam es! Boo laƥ a reef’axama um warong ndiiki!»

³⁰O faam ole a layaan ee: «Ndax refiim o faam of, o gen no ŋaayaxam boo no ñaal ne xaye? Ndax mosaam o fesoor fa wo neeke?» Balam a doonaan ee: «Ha’aa mat!»

³¹Maaga, o Yaal oxe a weta a kid ake Balam, soo ta ga malaaka fee geenoox’ina na ƭat ale, a woos laƥ um. Ndak fo ndak, Balam a gooknooxa, a gung a lanq.

³²Malaaka fee a layaan ee: «Xar taxu o xaw o faam ole wo boo a caf a tadak? Kaam gar, ndax um xañtong o suur, yaam a ñaaƈ of alene, o Yaal oxe yoonee teen.

³³A caf a tadak akaa o faam ole a ga’axama soo a ɗapanaam. A ɗapan’angiraam koy, warkoogaaxoong soo xaƴin ta ñoow.»

³⁴Balam a laya malaaka fee no Yaal oxe yee: «Bakaadaam, yaam and’iim ee wo geenoox’u mbaambir es na ƭat ale. Ndiiki koy, o jaf es oleeke a felangirang, xam nomtoox xaad.»

³⁵Malaaka fee a laya a Balam ee: «Yooni fo goor weene. Kaa koy, xa ƭelem axe um laykang soom o jeepeetkaa.» Maaga, Balam a yoona fo we Balak a lul’ina.

³⁶Yaa Balak a nanna yee Balam a fadiida, a xetookaan na teeru faa refna na ƥeeraamb alaa Arnon, no cat-ee-cat kaa no ŋat olaa Mowaab.

³⁷Balak a laamta a Balam ee: «Ndax luliid’iim wiin maa wo, ndax da nqoyong? Xar taxu gar’iro me mi? Ndax kaa o foog’u yee waagkirong o ger bo ta dey?»

³⁸Balam a doona a Balak ee: «Ndiiki koy, garaam, ndaa xar waagoong o lay? Xa ƭelem axe Roog a cooxkaxam soom um laykaa.»

³⁹Balam a yoona fa Balak, da ndet Kiryat-Husot.

⁴⁰Balak a sadaxta qoox fo paal fo pambe soo a las teen kelfa ke yoon’uuna fa Balam itam.

⁴¹No feet nqes olaa, Balak a yoona fa Balam, a ŋaay fo ten no jul olaa Bamot-Baal maa ta waag’ina o ga’it cat ke no saŋe ne na xeet fee Isra’el.