Read NQAARIIT NE ROOG A lim ale 23 Bible Online

A lim ale 23 - NQAARIIT NE ROOG bible

A lim ale 23

¹Balam a laya a Balak ee: «Maxanaam mene xa sadaxand ɓetaa ƭaq soo jagandanaam qoox ɓetuu ƭik fo a suk paal ɓetuu ƭik.»

²Balak a fi’a ke Balam a lay’ina, soo da ƥoxot nqoox leng fo suk mbaal leng took o sadaxand oluu refna.

³Balam a laya a Balak ee: «Geenooxi mene paam sadax toxel of, too xam riƈatoox. Xeƈa xan o Yaal oxe a xetiid fa mi, too xa ƭelem axe ta feeñilkaxam fop, xam yegnong a den.» Maaga, a reta a ŋaay took ñaang laa saxeerna tig.

⁴Roog a xetiida fa Balam, soo ta layin ee: «Geennaam xa sadaxand ɓetaa ƭaq, ɓoxot took oluu refna nqoox leng fo suk mbaal leng.»

⁵O Yaal oxe a daawna a Balam ke ta warna o lay, soo a heblin ta nomtoox maa Balak.

⁶Balam oo a nomtooxa maa Balak fee geenoox’ina paam sadax ke ten, a yoon fo kelfa ke Mowaab fop.

⁷Balam a laya xa ƭelem axene: «Balak fee o maad Mowaab a intiidaxam Araam, a fudnitiidaam na xa coong axaa no batand ne yee: ‹Gari salooxanaam a Yakoob! Kaam ee gari halakanaam a Isra’el!›

⁸Kaa koy, nam um salooritkaa oxe Roog a salooxeerna? Nam um halakitkaa oxe o Yaal oxe a halakeerna?

⁹Kaam fod took a ƥil ake, ga’aa xeet feene, horoortan no jul ole na xa coong axe. Kaa ref xeet faa Ngenand um a keseena, too a guutatira fo qeet lakas ke.

¹⁰An waagu o lim xa taan axe Yakoob mayitna nen pep lanq? Kaam ee an waagu o lay ne Ii-isra’el we mayitna nen mbuuƴ a mbodna? Yaasam um xonit nen jofu weene, muj es a nand fa fee den!»

¹¹Balak a laya a Balam ee: «Xar fi’axamo kene? Um ɓisiidong mene, ndax o salooxanaam fañ es, soo o barke’aa barke a den neeke!»

¹²Balam a doonaan ee: «Ndax wargal es refee um yegnit soom ke o Yaal oxe a daawnaxama?»

¹³Balak a laya a Balam ee: «Gari yoon fa mi no mbiñ o lakas onqaa o ga’itkaa Ii-isra’el we fop.[12] Mene a qaaj a leng rek ga’oogo. No mbiñ onqaaga koy, fat o salooxanaam a den!»

¹⁴A ɓisaan boo no yetooxand olaa refna took o jul olaa no joong olaa Pisga. A maxa maaga xa sadaxand ɓetaa ƭaq soo a ɓoxot nqoox leng fo suk mbaal leng took oluu refna.

¹⁵Balam a laya a Balak ee: «Geenooxi mene paam sadax toxel of, soo mi, xam ret xetik fa Roog.»

¹⁶O Yaal oxe a xetiida fa Balam, a daawnin ke ta warna o lay. Cinj kaaga, a heblaan ta nomtoox maa Balak.

¹⁷Balam a nomtooxa maa Balak fee geenoox’ina paam sadax ke ten, a yoon fo kelfa ke Mowaab. Balak a laamtaan ee: «Xar o Yaal oxe a layong?»

¹⁸Maaga, Balam a laya xa ƭelem axene: «Wo Balak fee o ƥiy Sipoor, inooxi nan-gilooxaam a paax!

¹⁹Roog refee o kiin boo a maaɓaa, refee o ƥiy Aadama boo a jegaa o ndicax. Ndax fi’kee ke ta layna? Ke ta regitna, xan a fadnin.

²⁰Mi, kaa um heblel, ndax um barke xeet fene. Roog a barke’aan, yaaga koy, supitkiim teen dara.

²¹Njofaƭar leng ga’aand na Yakoob, paaxeer leng ga’aand na Isra’el. O Yaal oxe Roog den oxe fa den. O ten jegu xa pox no maad axe den.

²²Roog a sutta a den Misira, a coox a den doole naak-a-koƥ.

²³Pannax waagee na Yakoob tig, kaam ee maƭak waagee na Isra’el dara.[13] Na waxtu fee ta hapeena, xan a layel fop ke Roog a fi’kaa.

²⁴Xeet fene oxe jiŋ, a geenoox nen njogoy ƥasil. Wondooxkee a refangeerna kaa ƴax mbuufuɗag um, soo a yer fo’oy le no ke ta warna.»

²⁵Balak a laya a Balam ee: «O salooxkangiran, pañtu o fañin o barke boog.»

²⁶Balam a doonaan ee: «Ndax layiroong a qool qac ee xam fi fop ke o Yaal oxe a laykaxam?»

²⁷Balak a laya a Balam ee: «Gari um ɓisahinong o mbiñ o lakas. Xeƈa maaga boog, xan Roog a jaɓ o salooxanaam xeet fene.»

²⁸A ɓisa a Balam no jul olaa no joong olaa Pe’oor yoorooxna a koƥ-a-ƥor alaa Yudaa.

²⁹Balam a laya a Balak ee: «Maxanaam mene xa sadaxand ɓetaa ƭaq soo jagandanaam qoox ɓetuu ƭik fo a suk paal ɓetuu ƭik.»

³⁰Balak a fi’a ke Balam a lay’ina too a ɓoxota nqoox leng fo suk mbaal leng took o sadaxand oluu refna.