Read NQAARIIT NE ROOG A lim ale 24 Bible Online

A lim ale 24 - NQAARIIT NE ROOG bible

A lim ale 24

¹Balam a and’ata koy ee o Yaal oxe kaa geenoox no barke a Isra’el. Ten taxu retee a naaɓik mbeeñil ngatu na Roog nen eetaand, ndaa a wiƈaqilooxa farna fo a koƥ-a-ƥor ale.

²Yaa ta yoɗna a kid um, a ga Ii-isra’el we ndal’ina, wuu ndefna na carind den, Yiif le Roog a fudooxa took um.

³Maaga, Balam a laya xa ƭelem axene: «Mi Balam fee o ƥiy Bewoor, keeke refu ke um yegnitiidaa, mi o yaal o ga o xooɗu le.

⁴Keeke refu ke um layaa, mi fee na nanaa fa lay fee Roog, daawaa peeñax ke no Cegu katil oxe, yenaa leer, soo a kid es a mbetoox.

⁵Nuun xeet fee Isra’el, nuun we xa taan Yakoob, kenand ke nuun a mosa lool.

⁶Kaa nqayaa nen a ƈufnand, a nand nen a ƭing akaa ndefna paam o xuluɓ, nen alowes kaa o Yaal oxe a jimbna mbaat nen taxar seedar kaa ndefna paam poofi.

⁷Foofi le kaa caarooraa no qaw den, soo poofi mayu a naatin duufe den.[14] O maad den hupu a Agag, too maat den a jegata katil.

⁸Roog a sutta a den Misira, a coox a den doole naak-a-koƥ. Kaa saŋkaa qeet ke ndefna fañ den, a ƥol xa kiiƈ den soo a ndib a den a kas.

⁹Xeet feene kaa nand nen njogoy, nen njogoy ƥasil naa o leng a saɗeerna o yok, yaa ta wondooxna. Oxuu barke’oonga, xan a barke’el, ndaa oxuu salooxoonga, xan a salooxel.»

¹⁰Balak a fuuxana a Balam ƭomu, a foxrand xa ƥay um, a layin ee: «Um ɓisiidong mene, ndax o salooxanaam fañ es, soo o dek barke a den a caf a tadak.

¹¹Ndiiki koy, naangi col, nomtoox no mbind of. Lay’aam ee xam neexlong bo ta dey sik, ndaa o Yaal oxe a xañtaang o ten.»

¹²Balam a doona a Balak ee: «Yaag oo toox de, lay’aam a qool qac duleer we hebliid’axamoona yee:

¹³‹Boo Balak a mayƭand’ina mbind um fa xaaliis fa nqoolu fa wurus, a cooxangaam o ten sax oo, taxkee um nanaƭaran kebil ke no Yaal oxe boo fi tig, ta ref paax mbaat paaxeer. Xa ƭelem axe o Yaal oxe a cooxkaxam soom um laykaa.›

¹⁴Ndiiki koy, mexe dabaa xeet es, ndaa bo um helko fo retaa, cungi bo um maƭooxong ke Ii-isra’el we a mbi’kaa xeet of no camaane ke na ngaraa.»

¹⁵Maaga, Balam a laya xa ƭelem axene: «Mi Balam fee o ƥiy Bewoor, keeke refu ke um yegnitaa, mi o yaal o ga o xooɗu le.

¹⁶Keeke refu ke um layaa, mi fee na nanaa fa lay fee Roog, ref oxe andna yuuƥ ke no xe Took-ee-took, daawaa peeñax ke no Cegu katil oxe, yenaa leer, soo a kid es a mbetoox.

¹⁷Kaam ga’an, ndaa refee ndiiki. Kaam ɗeetan, ndaa matee. O xoor oley a feeñtiidaa ndeer xa taan axe Yakoob, kaam ee o samb oley a sutoortiidaa ndeer xeet fee Isra’el. A fada Moomowaab we no xoox, soo xa taan axe Set fop, ta maaf a den.

¹⁸Xan saax le Edoom a jaɓel. Kaam ee xan fañ we a njaɓ a Seyiir, too xan Isra’el a fi a pi katil.

¹⁹Xan o ndaan Yakoob a maaf fañ um, soo a saŋik we na ndaɗitkaa no teeru ke.»

²⁰Cinj kaaga, Balam a ga’a Aa-amalek we too a laya yee: «Nga’yo a Amalek, xeet fee moƴna o jeg doole. A miñ miñ xan a gefel tuƈ.»

²¹A ga’a itam Keekeni we, a lay ee: «Ngenand nuun a saƭka tigi, nen ndaang naa refna no ɓil.

²²Yaqanee koy, xan fiɗel a raaɓ pind ke nuun, soo Aa-asuur we a ndam a nuun mbaƭ.»

²³Balam a dakooxa o lay ee: «Ndi an na muckaa, yaa Roog a dalinkaa keene?[15]

²⁴Xan a kaal a inoortiid Sipere, a neewand a Asuur, a neewand a Ebeer, ndaa den itam a saŋkax a ƈufanaa.»

²⁵Cinj kaaga, Balam a inooxa, a naag col a xaad no mbind um, soo Balak itam a xot a ƭat um, a xaad.