Read NQAARIIT NE ROOG A lim ale 25 Bible Online

A lim ale 25 - NQAARIIT NE ROOG bible

A lim ale 25

¹Ii-isra’el we a ngenooga Sitiim. Maaga goor we na xeet fee a njimbooxa no ceeq fo roog Moomowaab we.

²Weene a ƥeka a den da ñaamaa sadax ke ƥoxoteena roog ke den, soo a mbaɗooxaa roog keene.

³Ne da mbaɗooxatoogna a Baal-Pe’oor, a taxa fuux le no Yaal oxe a biltoox took den.

⁴O Yaal oxe a laya a Moyiis ee: «Xoti aa-adax we no wiin weene fop, rok a den o ƥaak no cok na kid no fop mbaambir es, ndax fuux ɗomu le fuuxanuuma a nuun, nuun Ii-isra’el we, a ɓoos.»

⁵Moyiis a laya haahate we Isra’el ee: «Fat oxuu refna na nuun a war wiin um we na mbaɗooxaa a Baal-Pe’oor!»

⁶Ye Moyiis fo Ii-isra’el lakas we fop a mbokatoorna, a loolaa no ndokand ne no Ƭiif ne o Yaal oxe a xetteel, a nga’a o koor o Ii-isra’el, ta yoontiid o tew o Maamajan.

⁷Yaa Finees fee o ƥiy Eleyasaar, a ref itam o ndaan Aaroon fee o saasadax oxe a ga’na a den, a inoora a ndeer no Ii-isra’el we, a pokoox a salma.

⁸A reefana o koor o Ii-isra’el oxe rok’ina kam ƭiif um fo o tew o Maamajan oxe, soo a dibandoor a den, den ɗik fop no fud. Ndak fo ndak, taamaala fee dal’ina Ii-isra’el we a finqooxa.

⁹Wiin cuni qarɓeen ƭik fo cuni nahik a nqon’a na taamaala feene.

¹⁰O Yaal oxe a laya a Moyiis ee:

¹¹«Finees fee o ƥiy Eleyasaar, a ref itam o ndaan Aaroon fee o saasadax oxe, a ɓoosdanda fuux es no Ii-isra’el we, ye ta naalaxama a ndeer nuun, boo a tax saŋkiim Ii-isra’el we fop kam fuux es.

¹²Ndiiki koy, yegneen ee mexe dalnaa fo ten ngiɓoor jam.

¹³Ngiɓoor neene xan a fi a den saasadax boo faw, ten fo xa taan um, yaam ne ta naalaxama, mi fee Roog um, ndax ta jofoorand Ii-isra’el we fa mi.»

¹⁴O Ii-isra’el oxe warandoor’eena fo o tew o Maamajan oxe, Simri a ne’’e, a ref o ƥiy Saalu. O yaal ƥasil a reeƭu na carind ale Simewon.

¹⁵O tew o Maamajan oxe koy, Kosbi a ne’’e, faap um a ne’el Sur, a ref o yaal a qaw kam ƥasil Maamajan.

¹⁶O Yaal oxe a laya a Moyiis ee:

¹⁷«Songyo Maamajan we soo saŋik a den,

¹⁸yaam den naxu a nuun boo a ƥek a nuun nu mbaɗooxaa a Baal-Pe’oor, soo a mbooƴit a nuun a Kosbi fee o ƥiy o ndew o leng no kelfa ke den, war’eena ye fa taamaala fee Pe’oor.»

¹⁹Cinj taamaala feene,