Read NQAARIIT NE ROOG A lim ale 27 Bible Online

A lim ale 27 - NQAARIIT NE ROOG bible

A lim ale 27

¹Maaga, xa ƥiy xa tew axe Selofad ndefna Maxla fa Nowa fa Hogla fa Milka fa Tirsa, a matiida. Selofad fee faap den koy, o ƥiy Hefeer a reeƭu, Hefeer a ref o ƥiy Galaad, Galaad a ref o ƥiy Makiir, Makiir a ref o ƥiy Manaase. Na carind ale Manaase fee o ƥiy Yoseef a fog’u.

²Xa ƥiy xa tew axeene a soƥiida a Moyiis fa Eleyasaar fee o saasadax oxe fo kelfa ke fo mbokatax ne fop no ndokand ne no Ƭiif ne o Yaal oxe a xetteel, a lay ee:

³«Faap in a xona na koƥ-a-ƥor ale. Kaa koy, fog’ee na yaj ale yoon’ina fa Koora too a mbañ’u o Yaal oxe. Pakaad xoox um mbarnoor’un. Jeg’ee koy o ƥiy o ngoor.

⁴Xar taxu gon le faap in a bugel o ñuf a ndeer a qaw um ee yaam ne ta jeg’eerna o ƥiy o ngoor? Cooxi a in a las nen xa teɓ xa koor axe faap in.»

⁵Moyiis a daawna o Yaal oxe ke da nqeɗna.

⁶O Yaal oxe a laya a Moyiis ee:

⁷«Xa ƥiy xa tew axe Selofad na ƭat a ndamu. Fat da lasel nen xa teɓ xa koor axe faap den, a ndaaw ke refna a las faap den.

⁸Fat o lay Ii-isra’el we kene: ‹Boo o koor a xonna, too jegee o ƥiy o ngoor, fat nu coox o ƥeem o ndew lam um.

⁹A jegangee o ƥiy o ndew sax oo, nu ƥoxotin xa teɓ um xa koor.

¹⁰A soƥangaa yee jegee xa teɓ xa koor, fat nu ƥoxotin xa teɓ faap um xa koor.

¹¹Faap um a jegangee xa teɓ xa koor koy, fat nu ƥoxot lam um oxuu moƴna o fog fo ten, too ten na jegkan.› Keene xan a ref wargal faa Ii-isra’el we a mbugko ngayaa ne heblitoonga o ten.»

¹²O Yaal oxe a laya a Moyiis ee: «Ŋaayi took o jul ole Abarim, too horoox saax le um ci’kaa Ii-isra’el we.

¹³Xan o ga’in, cinj kaaga, o dab daan of nen a Aaroon fee o maag of,

¹⁴yaam kaa nu nanaƭaran bargal es na koƥ-a-ƥor alaa Sin, ye mbokatax ne Isra’el a nqasanaxama, soo nu tax boo o tedel ole na katil es waag’ee o feeñ na kid no Ii-isra’el we, ye da nqeɗaa foofi.» Foofi le balit’ina Meriba, maaga Kades na koƥ-a-ƥor alaa Sin na ne’eel.

¹⁵Moyiis a laya o Yaal oxe yee:

¹⁶«O Yaal oxe Roog, wo fee saqna o ñis no pindel ke fop, jili o koor, doonin mbaambir xeet fene,

¹⁷ta ref kelfa faa na waagkan o ɗox no kuu refna, ndax nandkeeyo fo paal kaa njegeerna o kaynaak.»

¹⁸O Yaal oxe a doona a Moyiis ee: «Xoyi a Yosuwe fee o ƥiy Nun, refna o koor o mayu fo Yiif le mi, soo doonin xa ƥay.

¹⁹Fat o ɓisin mbaambir Eleyasaar fee o saasadax oxe fo mbaambir mbokatax ne fop soo dalnin na kid den, ndax ta rondandong.

²⁰Fat o lasin na sañ-sañ fee jegoona, ndax Ii-isra’el we fop a nananin.

²¹Fat a garaa me Eleyasaar fee o saasadax oxe, ndax ta laamtanan o bug ole mi na pexey ‹Urim[19] fee›. Fat mbokatax ne no Ii-isra’el we fop a sutooxaa mbaat da ndokiidaa, yaa ta heblituuna.»

²²Ne o Yaal oxe a heblit’uuna o ten, Moyiis a xota a Yosuwe, a geennin mbaambir Eleyasaar fee o saasadax oxe fo mbokatax ne fop.

²³A doone xa ƥay soo a dalnel, ne o Yaal oxe a heblit’uuna a reefandin na Moyiis.