Read NQAARIIT NE ROOG A lim ale 28 Bible Online

A lim ale 28 - NQAARIIT NE ROOG bible

A lim ale 28

¹O Yaal oxe a laya a Moyiis

²ta daawin Ii-isra’el we bargal kene: «Ba nu ñak o ƥoxotaa o Yaal oxe sadax um no baxtu ke ndalneena, ndefna ñaamel ke ta doxaneel too a mbelin tuñ bo.

³Bes fuu refna, fat nu ƥisiid o Yaal oxe fo njuk fo mbaal fo ƭik naa onquu refna na den a jegna o hiid, a ñak sik, da ndoxaneel o ten. Baa timis koy fe.

⁴O mbaal o leng onqe fat a ɓoxoteel nqes, soo o lakas onqe a ɓoxoteel na kid-a-caɓru.

⁵Fat onquu refna na den a yoonandteel ngap kilo tadik mbiɗel kaa nqiiwteena o liitar fa genwal diwliin xa oliiw axaa noleena.

⁶Keene ndefu sadax toxel ke na bes fuu refna, too a mengoorayo fa sadax fee doxan’eena o Yaal oxe took o joong olaa Sinayi, a felin tuñ bo.

⁷O mbaal onqe na ɓoxoteel nqes ne, fat a yoonandteel o liitar fa genwal biiñ fa nqaaɗu, a ɓoxoteel o Yaal oxe kam o Mbiñ o tedu nqe.

⁸Fat o mbaal o lakas onqe a ɓoxoteel o Yaal oxe na kid-a-caɓru ke, a yoonandteel leng kut ke onqe no nqes ne a yoonandteel. Keene xan a ndef sadax toxel kaa mbelna tuñ bo no Yaal oxe.»

⁹«Na bes fee na ñootnax ale, fat nu sadaxit fo njuk fo mbaal fo ƭik naa onquu refna na den a jegna o hiid, a ñak sik. Fat da yoonandtel sadax ngap kilo ɓetuu fa leng mbiɗel kaa nqiiwteena diwliin fa sadax biiñ.

¹⁰Sadax fa ndoxel feene fat a ɓoxoteel na bes a ñootnax aluu refna, fogreerna fa sadax fa ndoxel fee na fi’eel bes fuu refna, a yoonandteel sadax biiñ fee.»

¹¹«Na bes fa eetaand no nqool onquu refna, fat nu ƥoxotaa o Yaal oxe nen sadax fa ndoxel qoox teɓ ƭik fo suk mbaal fo fo njuk fo mbaal ɓetuu ƭik naa onquu refna na den a jegna o hiid. Cegel keene fop koy, baa njeg sik.

¹²Njegel nuu refna fat a yoonandtel sadax mbiɗel qiiwte diwliin: nqoox nuu refna ngap kilo ɓetuu nahik, suk mbaal le ngap kilo ɓetuu fa leng,

¹³soo o njuk mbaal onquu refna ngap kilo tadik. Keene xan a ndef sadax toxel kaa mbelna tuñ bo no Yaal oxe.

¹⁴Njegel nuu refna fat a yoonandtel itam sadax biiñ: nqoox nuu refna xa liitar xa tadaq, suk mbaal le xa liitar xa ƭaq, soo o njuk mbaal onquu refna o liitar fa genwal. Keene ndefu sadax ke na mbugko ƥoxoteel na bat ale no nqool onquu refna no hiid ole.

¹⁵Fat nu ƥoxot o Yaal oxe itam suk fambe nen sadax fa mbaasnoor pakaad, fogreerna fa sadax fa ndoxel fee na fi’eel bes fuu refna, a yoonandteel sadax biiñ fee.»

¹⁶«No ñaal xarɓaxay fo ñaal nahkandeer ne no nqool o eetaand onqe no hiid ole, fat nu ndoofandan o Yaal oxe Xew fee na colandax ale.

¹⁷Xew fee no ñaal ɓetuu ƭik ke fat a roofandeel, a xotit no ñaal xarɓaxay fo ñaal ƥetkandeer ne no nqool onqeene. Fat nu ñaamaa teen puuru canja’e.

¹⁸No ñaal eetaand ne, fat nu njeg o xet o tedu. Nu njalkee dara no ñaal neene.

¹⁹Fat nu ƥoxot o Yaal oxe nen sadax fa ndoxel qoox teɓ ƭik fo suk mbaal fo fo njuk fo mbaal ɓetuu ƭik naa onquu refna na den a jegna o hiid. Cegel keene fop koy, baa njeg sik.

²⁰Njegel nuu refna teen fat a yoonandtel sadax mbiɗel qiiwte diwliin: nqoox nuu refna ngap kilo ɓetuu nahik, suk mbaal le ngap kilo ɓetuu fa leng,

²¹soo o njuk mbaal onquu refna ngap kilo tadik.

²²Fat nu sadaxit itam suk fambe nen sadax fa mbaasnoor pakaad. Neene, xan nu njofoorandel fo o Yaal oxe.

²³Fat nu ƥoxot sadax keene, fogreerna fa sadax fa ndoxel fee na fi’eel nqes nuu refna.

²⁴Fat nu ƥoxotaa a den o Yaal oxe bes fuu refna boo ñaal ɓetuu ƭik nen sadax um ndefna ñaamel ke ta doxaneel, too a mbelin tuñ bo. Sadax feene koy, fogirkee fa sadax fee na fi’eel bes fuu refna, a yoonandteel sadax biiñ fee.

²⁵No ñaal ɓetuu ƭikandeer ne, fat nu njeg o xet o tedu. Nu njalkee teen dara.»

²⁶«Na Xew fee no pes ɓetuu ƭik takooxiidu ke, yaa nu ƥoxotiidkaa o Yaal oxe sadax tuufe-duufe ke na eeteel o saxad, fat nu njeg o xet o tedu. Nu njalkee teen dara.

²⁷Fat nu ƥoxot o Yaal oxe nen sadax fa ndoxel faa feluuna tuñ bo: qoox teɓ ƭik fo suk mbaal fo fo njuk fo mbaal ɓetuu ƭik naa onquu refna na den a jegna o hiid.

²⁸Njegel nuu refna teen fat a yoonandtel sadax mbiɗel qiiwte diwliin: nqoox nuu refna ngap kilo ɓetuu nahik, suk mbaal le ngap kilo ɓetuu fa leng,

²⁹soo o njuk mbaal onquu refna ngap kilo tadik.

³⁰Fat nu sadaxit itam suk fambe, ndax nu njofoorandel fo o Yaal oxe.

³¹Fat nu ƥoxot sadax keene, yoonandit a den sadax biiñ fee, too fogirkee fa sadax fa ndoxel fee na fi’eel bes fuu refna fa sadax tuufe-duufe um. Cegel keene fop koy, baa njeg sik.»