Read NQAARIIT NE ROOG A lim ale 3 Bible Online

A lim ale 3 - NQAARIIT NE ROOG bible

A lim ale 3

¹Weeke ndeeƭu we mbog’ina no ƥasil ne Aaroon fa Moyiis na jamaane faa o Yaal oxe a layna fa Moyiis took o joong olaa Sinayi:

²Keeke ndefu a kon ake na xa ƥiy axe Aaroon: Nadab fee reeƭna taaw fa Abiihu fa Eleyasaar fa Itamaar.

³Weene ndeeƭu xa ƥiy axe Aaroon ndod’eena saasadax, a mbadnaa o far den kam o Mbiñ o tedu nqe.

⁴Nadab fa Abiihu nqonit’u mbaambir no Yaal oxe na koƥ-a-ƥor alaa Sinayi, yaam kaa ƥoxot’un fiɗel laa ta simit’eerna. Njeg’eeyo xa ƥiy. Neene boog, Eleyasaar fa Itamaar soom mbadnoogatu o far den nen saasadax, Aaroon fee faap den a adooxan a den.

⁵O Yaal oxe a laya a Moyiis ee:

⁶«Matandiidi goor we na carind ale Lewi too ɓoxot a den a Aaroon fee o saasadax, ndax da ndimle’an.

⁷Den na mbugko topatooxaa mbaambir Ƭiif ne um xetteel, mi o Yaal oxe, ke Aaroon fa xeet fee fop a ndoxneena, soo a saq itam calel ke kam Ngenand ne.

⁸Den na mbugko topatooxaa xa ƥaxañ axe ndefna no Ƭiif neene um xetteel fop soo a saqaa calel ke Ii-isra’el we a ndoxneena kam Ngenand ne.

⁹Fat o heblit ee Leelewi we na ndefkaa dag we Aaroon fo xa ƥeem, yaam den njile a ndeer no Ii-isra’el we, ndax da ndimle’aa a den.

¹⁰Fat o maƭoox a Aaroon fo xa ƥeem, ndax da ngay calel no saasadax den. Oxuu rokatilooxna teen too fogee na den, fat a warel.»

¹¹O Yaal oxe a laya a Moyiis ee:

¹²«Mi fa xoox es xottu Leelewi we a ndeer no Ii-isra’el we, sofit a den taaw ke no Ii-isra’el we fop. Mi jegu a den,

¹³yaam taaw fuu refna, mi jegun. No kaa xotitna na bes faa warnooruuma taaw ke no Miimisira we fop, kesanaam a xoox es taaw ke Isra’el fop, ta ref no wiin we mbaat no cegel ke. Mi jegu a den, mi o Yaal oxe.»

¹⁴O Yaal oxe a laya a Moyiis kam a koƥ-a-ƥor alaa Sinayi yee:

¹⁵«Limi we mbogna na carind ale Lewi, reefandin no ƥasil den fo na qaw den. Fat o lim goor we, xotit no we njegna o nqool a jof took.»

¹⁶Moyiis a lima a den, ne o Yaal oxe a heblit’uuna o ten.

¹⁷Keeke ndefu a kon ake na xa ƥiy axe Lewi: Geerson, Kehat fa Merari.

¹⁸Weeke ndefu xa ƥiy axe Geerson: Libni fa Simey, oxuu refna na den a xoyteel a qaw um.

¹⁹Weeke ndefu xa ƥiy axe Kehat: Amram, Yisxar, Hebron fa Usi’el, oxuu refna na den a xoyteel a qaw um.

²⁰Weeke ndefu xa ƥiy axe Merari: Maxli fa Muusi, oxuu refna na den a xoyteel a qaw um.

²¹Na Geerson a qaw ale Libni fo ale Simey a mbaqaqooru, too den na nqoyeel Geegeerson we.

²²We lim’eena no goor we den, a xotit no we njegna o nqool a jof took, a ndeeƭa cuni ɓetuu ƭik fo teemeed ƥetik.

²³A cinj Ƭiif ne, farna fo mudand, a qaw ake no Geegeerson we a ndal’u.

²⁴Eliyasaf fee o ƥiy La’el reeƭu o aa-adax den.

²⁵Geegeerson we topatooxoogu a seek akeeke no Ƭiif ne o Yaal oxe a xetteel: Ngenand ne fo Ƭiif ne fo ke ta bombit’eena fo mbaƴ ne no ndokand ne no Ƭiif ne

²⁶fo njoor ne ɓitit’eena o maax ole fo mbaƴ ne singoogna a carind ale no maax ole widna Ngenand ne fo o sadaxand ole fop fo xa ƥaak axe den. Den ngadin’e a topatax ale no tikoorik keene fop.

²⁷Na Kehat o mat, a qaw ale Amram fo ale Yisxar fo ale Hebron fo ale Usi’el a mbaqaqooru, too den na nqoyeel Keekehat we.

²⁸We lim’eena no goor we den, a ndeeƭa cuni ɓetuu tadik fo teemeed ɓetuu fa leng, a xotit no we njegna o nqool a jof took.[1] Den ndoxin’e a topatax ale no Mbiñ o tedu nqe.

²⁹Farna fo ɓemb-roog o ñamaak ole no Ƭiif ne, a qaw ake no Keekehat we a ndal’u.

³⁰Elisafan fee o ƥiy Usi’el reeƭu o aa-adax den.

³¹Den topatooxoogu arka ne fo a taabul ale fo a pagal ale na xa lampa xe fo o sadaxand ole fo xa ƥaxañ axe no Mbiñ o tedu nqe fo mbaƴ ne fegoogna arka ne no ngiɓoor ne. Den ngadin’e a topatax ale no tikoorik keene fop.

³²Eleyasaar fee o ƥiy Aaroon fee o saasadax adooxan’u aa-adax we no Leelewi we. O ten yetooxoogu we ngadin’eena a topatax ale no Mbind tedu ne.

³³Na Merari a qaw ale Maxli fo ale Muusi a mbaqaqooru, too den na nqoyeel Meemerari we.

³⁴We lim’eena no goor we den, a xotit no we njegna o nqool a jof took, a ndeeƭa cuni ɓetuu fa leng fo teemeed ƭik.

³⁵Suri’el fee o ƥiy Abihayil reeƭu o aa-adax den. Farna fo ɓemb-roog o janoon ole no Ƭiif ne a ndal’u.

³⁶Meemerari we topatooxoogu a patax ake fo a kadand ake fo a toodook ake fo xa ƥaxañ xa lakas axe no Ngenand ne. Den ngadin’e a topatax ale no tikoorik keene fop.

³⁷Den topatooxoogu itam a ƥiiɓit ake mbidna o maax ole fo a caf den fo xa teng den fo xa ƥaak den.

³⁸Moyiis fa Aaroon fo xa ƥeem mbaambir Ƭiif ne a ndal’u farna fo batand. Den ndefan’u Ii-isra’el we, a mbadnaa o far den no Mbind tedu ne. A jeg’angaa oxaa rokatilooxna teen too fog’ee na den, kaa war’el o war.

³⁹Goor Leelewi we Moyiis fa Aaroon a lim’ina, ne o Yaal oxe a heblit’uuna, a reefandel na qaw den, a xotit no we njegna o nqool a jof took, a ndeeƭa cuni qarɓeen ƭik fo cuni ƭik.

⁴⁰O Yaal oxe a laya a Moyiis ee: «Bindi a kon ake no taaw koor ke no Ii-isra’el we fop, xotit no we njegna o nqool a jof took, cinj kaaga o lim a den.

⁴¹Fat o kesanaam Leelewi we, mi o Yaal oxe, sofit a den taaw ke no Ii-isra’el we fop. Fat o kesanaam itam cegel ke no Leelewi we, sofit a den taaw ke no cegel ke no Ii-isra’el we fop.»

⁴²Ne o Yaal oxe a heblit’uuna o ten, Moyiis a lima taaw koor ke no Ii-isra’el we fop,

⁴³a xotit no we njegna o nqool a jof took. We mbind’eena too a limel, a ndeeƭa fop oo fop cuni qarɓeen ƭik fo cuni ƭik fo teemeed ƭik fo qarɓeen ɓetuu ƭik fo daduk.

⁴⁴O Yaal oxe a laya a Moyiis ee:

⁴⁵«Fat o sofit Leelewi we taaw koor ke no Ii-isra’el we fop, soo cegel ke no Leelewi we, o sofit a den ke na den. Neene, mi na jegkaa Leelewi we. Mi refu o Yaal oxe.

⁴⁶Taaw koor ke no Ii-isra’el we a ngupta Leelewi we teemeed ƭik fo qarɓeen ɓetuu ƭik fo tadik too a mbara o mbatel.

⁴⁷Fat oxuu refna na den a wattel xa monjong xa ƥetaq, na xaaliis fee na eedteel no Mbind tedu ne. Xa monjong qarɓeen ƭik fo xa ƥetaq na xa monjong axeene ndefu ngap genwal liibar xaaliis fa nqoolu.

⁴⁸Fat o coox a Aaroon fo xa ƥeem xaaliis feene na watitkeel taaw koor ke toolna no Ii-isra’el we.»

⁴⁹Moyiis a fokata xaaliis fee na bateer ale no we mbaag’aandeena o sofit Leelewi.

⁵⁰Xaaliis fee Moyiis a daawit’ina no taaw koor ke no Ii-isra’el we, a reeƭa xa monjong juni fo teemeed tadik fo qarɓeen ɓetuu fa leng fo xa ƥetaq na xaaliis fee na eedteel no Mbind tedu ne.

⁵¹Naaga, Moyiis a cooxa a Aaroon fo xa ƥeem xaaliis fee na bateer ale, ne o Yaal oxe a heblit’uuna o ten.