Read NQAARIIT NE ROOG A lim ale 31 Bible Online

A lim ale 31 - NQAARIIT NE ROOG bible

A lim ale 31

²«Reti rabdinooxanik Ii-isra’el we took no Maamajan we no paaxeer ke da mbi’na a den, cinj kaaga, xan o dab daan of.»

³Maaga, Moyiis a laya xeet fee yee: «Mbapyo goor a ndeer nuun, da ndet a song Maamajan we, ndax da ndabdinooxan o Yaal oxe.

⁴Fat nu njil goor juni na carind aluu refna na carind ake Isra’el fop, ngebil a den da nqire’ik fa den.»

⁵A carind aluu refna no faan le no Ii-isra’el we a fapa goor juni, ndax da nqire’ik, ta ref goor cuni xarɓaxay fo cuni ƭik.

⁶Moyiis a hebla a den, den fop na ñoq alaa, a yoonandit a den a Finees fee o saasadax, refna o ƥiy Eleyasaar. Oxeene saq’u tikoorik tedu ke fo a luuƥ ake na lambniteel.

⁷A ndeta, a song saax le Majan, ne o Yaal oxe a heblit’uuna a Moyiis, too a mbara goor waa fop.

⁸A mbara itam maad ɓetuk we Majan ndefna: Eewi, Rexem, Sur, Xuur fa Reba, soo a mbarit itam a Balam fee o ƥiy Bewoor laƥ.

⁹A mbi’a rew we no Maamajan we fo xa caaƈ axe faɗ soo a njaɓ cegel den fop boo na xa siir axe fo na ked ake, a njaɓ itam paax ke da njegna fop.

¹⁰A ndaaɓa teeru ke da ngenoogna fop fo me da ndal’ina fop.

¹¹Cinj kaaga, a ngatta ke da njaɓ’ina fop, boo no wiin we fo cegel ke.

¹²A ƥisa fop no saŋe naa reeƭna na xa saawit axaa Mowaab, farna fo batand naa Yordaan, njasnoorna fa Yeriko, ndax da lalin a Moyiis fa Eleyasaar fo mbokatax ne Isra’el fop.

¹³Moyiis fa Eleyasaar fee o saasadax oxe fo kelfa lakas ke na xeet fee a sutooxayo saŋe ne, ndax da nqetoox a den.

¹⁴Maaga, Moyiis a fuuxana we adooxan’ina xiixire we ndefna aa-adax no xiixire juni we fo aa-adax no xiixire teemeed we ngatoogna na xire faa.

¹⁵Moyiis a laya a den ee: «Xa kene koy? Kaa nu nqaƴ rew we fop da ñoow!

¹⁶A woora a nuun toox de yee den o mat ndeef’u xa as axe Balam, a soob Ii-isra’el we bo da ngore’aƭar no Yaal oxe, a mbaɗooxataa a Baal-Pe’oor, boo a tax taamaala a dal xeet fee no Yaal oxe.

¹⁷Ndiiki koy, mbaryo xa caaƈ xa koor axe fop fo rew we andna adna fop,

¹⁸ndaa nu mbaaga o ngeekan a qoox nuun fo njaaƈ fo ndoog ne andafuleerna adna fop.

¹⁹Nuun fop koy, fat nu ndal tafil saŋe ne boo ñaal ɓetuu ƭik, too oxuu warna o kiin mbaat ta duq o dal, fat a ɓogdinoox no ñaal ndadkandeer ne fo no ñaal ɓetuu ƭikandeer ne. Neene a refitkaa itam no faɗ rew we nuun.

²⁰Fat nu ƥogid itam ñirax ke fop fo fop ke fi’teena ƭool mbaat a ƥiñ pambe mbaat a qanq.»

²¹Cinj kaaga, Eleyasaar fee o saasadax oxe a laya goor we ndet’ina na ñoq ale yee: «Keeke refu bargal ke o Yaal oxe a daawinna a Moyiis:

²²Tikoorik ke mbi’teena wurus mbaat xaaliis mbaat xanjar mbaat njelem ƥaal mbaat xoymet mbaat beteex

²³mbaat ndikoorik nuu waageerna o dox, fat nu ƥogditin fiɗel, cinj kaaga nu suupin kam foofi fo ɓogdinoor ole. Ke waagna o dox koy, fat nu suupin no foofi fo ɓogdinoor ole rek.

²⁴Fat nu ndap toki nuun no ñaal ɓetuu ƭikandeer ne, too xan nu nqool, cinj kaaga xan nu mbaag o ndok kam saŋe ne.»

²⁵O Yaal oxe a laya a Moyiis ee:

²⁶«Wo fa Eleyasaar fo yaal ƥasil ke no mbokatax ne, limyo wiin we fo cegel ke fop njaɓteena na xire faa.

²⁷Fat o xaajin a las a ƭak a podru, a leng ale we ndet’ina na xire faa na njegkan, a lakas ale we yoqna no mbokatax ne a njegin.

²⁸Fat o watnanaam wargal es na las ale no xiixire we, ta ref o kiin o leng no teemeed ƥetik wuu ndefna soo no naak ke fo xa paam axe fo paal ke fo pambe ke, o watnanaam itam njegel leng no teemeed ƥetik kuu ndefna.

²⁹Fat o ɓoxot a Eleyasaar fee o saasadax oxe ke watnanaxamoona na las den.

³⁰Fat o watin na las ale we yoqna no Ii-isra’el we a njegna, ta ref o kiin o leng no qarɓeen ƥetik wuu ndefna, soo no naak ke fo xa paam axe fo paal ke fo pambe ke fo cegel lakas ke, o watin leng no qarɓeen ƥetik kuu ndefna. Fat o ɓoxotin Leelewi we na topatooxaa Ngenand ne mi.»

³¹Moyiis fa Eleyasaar fee o saasadax oxe a mbi’a deŋ ne o Yaal oxe a heblit’uuna a Moyiis.

³²Keeke refu ke xiixire we a njaɓit’ina no pañ oxe, fogreerna fo ke da ngeekan’ina a qoox den: paal fo pambe cuni teemeed ɓetuu fa leng fo cuni qarɓeen ɓetuu ƭik fo cuni ƥetik,

³³naak cuni qarɓeen ɓetuu ƭik fo cuni ƭik,

³⁴xa paam cuni qarɓeen ɓetuu fa leng fo juni fa leng

³⁵fo fo njaaƈ fo ndoog cuni qarɓeen tadik fo cuni ƭik waa andafuleerna adna.

³⁶Genwal fee no keene, refna ref a las ale no we ndet’ina na xire faa, a reeƭa: paal fo pambe cuni teemeed tadik fo cuni qarɓeen tadik fo cuni ɓetuu ƭik fo teemeed ƥetik,

³⁷o Yaal oxe a watnanel teen teemeed ɓetuu fa leng fo qarɓeen ɓetuu ƭik fo ƥetik,

³⁸naak cuni qarɓeen tadik fo cuni ɓetuu fa leng, o Yaal oxe a watnanel teen qarɓeen ɓetuu ƭik fo ƭik,

³⁹xa paam cuni qarɓeen tadik fo teemeed ƥetik, o Yaal oxe a watnanel teen qarɓeen ɓetuu fa leng fo leng,

⁴⁰wiin cuni xarɓaxay fo cuni ɓetuu fa leng, o Yaal oxe a watnanel teen qarɓeen tadik fo ɗik.

⁴¹Moyiis a ɓoxota ke o Yaal oxe a watnaneena a Eleyasaar fee o saasadax oxe, ne o Yaal oxe a heblit’uuna o ten.

⁴²A las ale no we yoqna no mbokatax ne Isra’el, too Moyiis a xaaj’un fo ale no xiixire we, a reeƭa: paal fo pambe cuni teemeed tadik fo cuni qarɓeen tadik fo cuni ɓetuu ƭik fo teemeed ƥetik,

⁴³

⁴⁴naak cuni qarɓeen tadik fo cuni ɓetuu fa leng,

⁴⁵xa paam cuni qarɓeen tadik fo teemeed ƥetik

⁴⁶fo wiin cuni xarɓaxay fo cuni ɓetuu fa leng.

⁴⁷Moyiis a watnana teen o Yaal oxe o kiin o leng no qarɓeen ƥetik wuu ndefna fo njegel leng no qarɓeen ƥetik kuu ndefna, soo ne o Yaal oxe a heblit’uuna o ten, a ɓoxotaan Leelewi we na topatooxaa Ngenand ne no Yaal oxe.

⁴⁸We adooxan’ina xiixire we too a ndef aa-adax no xiixire juni fo aa-adax no xiixire teemeed we a mbokatoora maa Moyiis

⁴⁹too a layin ee: «I lima xiixire we i kelfa’na, too o leng sambandooxee.

⁵⁰Ten taxu i mbug o ƥoxot o Yaal oxe sadax, ndax i njofoorandel fo ten. Oxuu refna na in xan a ɓoxot tikoorik wurus ke ta gisna: ceen, xa ƈang, xa keɗ, xa loŋ-loŋ fo ceq.»

⁵¹Moyiis fa Eleyasaar fee o saasadax oxe a njanga tikoorik pi’te wurus ke ƥisiid’eena fop.

⁵²O meɗel ole na wurus fee aa-adax we no xiixire we a ƥoxotna o Yaal oxe a reeƭa ngap kilo teemeed fo qarɓeen ɓetuu ƭik.

⁵³Oxuu refna no xiixire we koy, kaa geekan’u a xoox um ke ta gisna na xire fee.

⁵⁴Moyiis fa Eleyasaar fee o saasadax oxe a njanga wurus fee aa-adax we no xiixire we a ƥoxot’ina fop, soo a ƥisin no Ƭiif ne o Yaal oxe a xetteel, ndax o Yaal oxe a wetandooran Ii-isra’el we.