Read NQAARIIT NE ROOG A lim ale 32 Bible Online

A lim ale 32 - NQAARIIT NE ROOG bible

A lim ale 32

¹Xa taan axe Ruben fo axe Gaad a njeg’a xa siir fo a ked a mayu. A nga’a yee o jegel ole Yaseer fo ole Galaad fo mbiñ fo nequ no cegel a ndefu.

²Maaga, a soƥka a Moyiis fa Eleyasaar fee o saasadax oxe fo kelfa ke no mbokatax ne, a lay a den ee:

³«Atarot fa Diibon fa Yaseer fa Nimra fa Hesebon fa Eleyale fa Seebam fa Nebo fa Bewon,

⁴o jegel oleene, o Yaal oxe a dimle’na Ii-isra’el we bo da njaɓin fop, a refa saax laa neqna no cegel, too in we dag of, i njega cegel mayu sax.»

⁵A ƥaata o lay ee: «A soƥangaa yee i ndaawa yirmande of, in we dag of, lasi a in saax leene, i njegkin, too ba o jootin a in a Yordaan.»

⁶Kaa koy, Moyiis a doona a den ee: «Xar! Ndax fog we nuun kaa nqire’ikkaa, soo nuun o mat, nu yoq mene, yuunaa?

⁷Xar taxu nu mbug o ngooyand Ii-isra’el we, ndax ndetkee no saax le o Yaal oxe a ci’na a den?

⁸Neene deŋ daan we nuun a mbi’’u, ye lultuuma a den Kades-Barneya, ndax da ngorook saax leene.

⁹A ndeta boo na yulanq alaa no Tuunq biiñ kaa, a ngoroox saax le, too yaa da ngatna, a leeƈa cer no Ii-isra’el lakas we, ndax ndetkee no saax le o Yaal oxe a ci’na a den.

¹⁰A koom, o Yaal oxe a fuux’a tigi too a daaɓoox ee:

¹¹‹O leng no goor we sutoorna Misira too a njeg xa kiid qarɓeen ƭik a jof took, ga’kee saax le reguuma fo a taaƥ a Abraham fa Isaak fa Yakoob, yaam ndeefiraam fo ngor.

¹²Kaleb fee o ƥiy Yefune, a fog na qaw ale Kenisi fa Yosuwe fee o ƥiy Nun rek na ndokkaa teen, yaam a ndeefaxam fo ngor.›

¹³O Yaal oxe a fuuxana Ii-isra’el we tigi too a widnoora a den kam a koƥ-a-ƥor ale boo xa kiid qarɓeen nahik, boo neen suk ne mbi’’ina paaxeer na kid um fop a nqonu.

¹⁴Ndiiki koy, kaa nu mbug o ndeef o jaf no daan nuun, xa ƥiy no baabakaad we nu ndefna, soo njumband fuux le no Yaal oxe took Isra’el.

¹⁵Boo nu mbesna o Yaal oxe a cinj, xan a xaƴ xeet fee Isra’el ta moƴ o miñ na koƥ-a-ƥor ale, too xan nu tax xeet fene fop a saŋkoox.»

¹⁶A matiida a Moyiis, a layin ee: «Kaa i mbug rek o ƭingan a ked ake in soo maxan ƥasil ke in teeru cegu doole.

¹⁷Cinj kaaga, xan i ñof o nqot ƥonax ke, mbog no we mbodanna Ii-isra’el lakas we mbaambir, boo yaa i ndokinkaa a den no fo mbiñ ne da njagandaneena. Ƥasil ke in koy, xan a yoq mene no teeru cegu doole ke, ndax we ngen’ina no saax le ndaawkee a den.

¹⁸I nomtooxiidkee no pind in a refangeerna kaa Ii-isra’el we a ndaaw oxuu refna lanq ke ta lamna.

¹⁹I nqaajirkee fa den lanq no saax o lakas ole Yordaan, yaam ke refna lam in oxey mene no batand ne Yordaan.»

²⁰Moyiis a laya a den ee: «Boo nu mbi’na ke nu layna, nqot ƥonax nuun mbaambir no Yaal oxe, ndax nu ñoxorkel,

²¹njoot a Yordaan nuun fop mbaambir no Yaal oxe, mbapooxan a ñoq boo yaa ta maafkaa fañ um,

²²soo moof maaga boo yaa saax le a ɓoxotkeel na sañ-sañ um, yaaga xan nu mboktoox no Yaal oxe fo na Isra’el, too saax lene refna no batand ne Yordaan, xan nu njegkin.

²³Kaa koy, nu mbi’angee neene, xan nu mbakaad no Yaal oxe, too xan nu nga’in, fat nu andin a paax.

²⁴Yaaga boog, maxanyo ƥasil nuun teeru, soo ƭingan a ked ake nuun, ndaa ba nu mbeec o mbadin ke nu ndegitna.»

²⁵Xa taan axe Gaad fo axe Ruben a ndoona a Moyiis ee: «In we dag of, xan i mbi ke hebloona a in.

²⁶Rew in fo xa ƥiy in fo a ked in fo cegel in fop xan a yoq mene kam teeru ke Galaad.

²⁷In we dag of koy, xan i nqot ƥonax in mbaambir no Yaal oxe, ndax i nqire’ik ne laytanoona.»

²⁸Moyiis a cooxa a Eleyasaar fee o saasadax oxe fa Yosuwe fee o ƥiy Nun fo yaal ƥasil ke na carind ake Isra’el fop bargal kaa njaginna na den

²⁹ee: «Boo xa taan axe Gaad fo axe Ruben a nqotna ƥonax den mbaambir no Yaal oxe, a njoot a Yordaan fa nuun, ndax da nqire’ik, a ndimle a nuun nu njaɓ saax le, fat nu coox a den saax le Galaad, da njegkin.

³⁰Kaa koy, a mbi’angiran, fat a ngen fa nuun kam saax le Kanaan.»

³¹Xa taan axe Gaad fo axe Ruben a ndoona yee: «In we dag of, xan i mbi ke o Yaal oxe a layna a in.

³²Xan i nqot ƥonax in mbaambir no Yaal oxe, ndok kam saax le Kanaan, ndax i ndaaw lam in no lanq ke no saax oleeke na Yordaan.»

³³Moyiis a cooxa a carind ale Gaad fo ale Ruben fa genwal fee na carind ale Manaase fee o ƥiy Yoseef, maat ne Siihon fee o maad no Aa-amori we fo maat ne Oog fee o maad Basan fo teeru ke fo xa piisel axe mbidna maaga fop.

³⁴Xa taan axe Gaad a maxatina teeru keeke: Diibon fa Atarot fa Aroweer

³⁵fa Atarot-Sofaan fa Yaseer fa Yogbaha

³⁶fa Bet-Nimra fa Bet-Haran. A mbi’a a den teeru cegu saŋe soo a ƭingan a ked ake den.

³⁷Xa taan axe Ruben a maxatina a Hesebon fa Eleyale fa Kiryatayim

³⁸fa Nebo fa Baal-Me’on fa Sibma, soo a ne teeru leng-leng ke da maxatin’ina a kon a qas.

³⁹Xa taan axe Makiir fee o ƥiy Manaase a ndeta no jegel olaa Galaad, a njaɓ saax le soo a ndax Aa-amori we ngen’ina maaga.

⁴⁰Maaga, Moyiis a cooxa a den o jegel olaa Galaad, soo da ndal maaga.

⁴¹Xa taan axe Ya’iir fee o ƥiy Manaase a ndeta, a njaɓ fo mbiñ ne Aa-amori we a ndaloogna fo cegel ke den, soo a ne a den «xa taland axe Ya’iir.»

⁴²Nooba a reta a jaɓ a Kenaat fo caate ke ta waxooxna soo a ne’it teeru feene a xoox um.