Read NQAARIIT NE ROOG A lim ale 34 Bible Online

A lim ale 34 - NQAARIIT NE ROOG bible

A lim ale 34

¹O Yaal oxe a laya a Moyiis

²ta daawin Ii-isra’el we bargal kene: «Nuun wey ndokkaa no saax le Kanaan. Ten refu saax le nu ci’eena ndax nu njegkin, a ref ndeer xa ŋat axene:

³No ɓemb-roog o ñamaak, lanq ke nuun xan a nday na koƥ-a-ƥor ale Sin fo saax le Edoom. O ŋat oleene xan a xotit no ɓemb-roog o ñamaak ole no cat kaa no maag o Xanju laa farna fo batand.

⁴Xan a wirloor no ñaang laa na Beex ake, te no ɓemb-roog o ñamaak, a jagin farna fa Sin, a reef no ɓemb-roog o ñamaak olaa Kades-Barneya, cinj kaaga ta reef Hacar-Adar soo a jof Asmon.

⁵Fat a jangit Asmon, a wirlooxahin farna fa ƈufnand alaa Misira, ndax ta saltik no maag olaa Mediterane.

⁶No mudand, o maag ole Mediterane na refkaa o ŋat ole nuun.

⁷No ɓemb-roog o janoon, fat nu mbiis o ŋat ole nuun a ndeer o maag ole Mediterane fo o joong ole Hoor.

⁸No kaa jangitna no joong olaa Hoor, fat nu ndeefnin no ndokand naa Hamat, ta reef Sedad.

⁹Fat a suur boo Sifron, soo a saltik Hacar-Enaan. Keene na refkaa o ŋat ole nuun no ɓemb-roog o janoon.

¹⁰No batand, fat nu mbiis o ŋat ole nuun, ta jangit Hacar-Enaan, a jagin farna fa Sefam.

¹¹Fat a fudoortiid Sefam, a jagin farna fa Ribla, no batand naa Ayin, cinj kaaga, ta fudooxiid soo a cof na tambando faa no maag o maas olaa Genesaret no batand.

¹²Xan a fudooxahin boo no xuluɓ olaa Yordaan, soo a saltik no maag o Xanju laa. Keene na refkaa saax le nuun fo xa ŋat axe mbiduuna.»

¹³Moyiis a daawna Ii-isra’el we wargal feene, a lay ee: «Keene refu saax le nu lasritkaa mbanjang. O Yaal oxe o mat heblu ta cooxel a carind ɓetaa nahak ake fa genwal a carind ale,

¹⁴yaam ƥasil ke na carind ale Ruben fo ale Gaad fa genwal fee na carind ale Manaase a ndaawa a las den no lanq ke boo a ƈut.

¹⁵A carind a ƭak akeene fa genwal a carind ale a lase me jasnoorna fa Yeriko, na ƥeeraamb alaa Yordaan, farna fo batand ne.»

¹⁶O Yaal oxe a laya a Moyiis ee:

¹⁷«Eleyasaar fee o saasadax oxe fa Yosuwe fee o ƥiy Nun na laskaa a nuun saax le.

¹⁸Fat nu nqot itam kelfa fa leng na carind aluu refna, ndax da ndimle a den na lasit ale no saax le.

¹⁹Keeke ndefu a kon ake no goor weene: Na carind ale Yudaa: Kaleb fee o ƥiy Yefune,

²⁰na carind ale Simewon: Semu’el fee o ƥiy Amihud,

²¹na carind ale Bensame: Elidad fee o ƥiy Kislon,

²²na carind ale Dan: Buki fee o ƥiy Yoogli,

²³na carind ale Manaase fee o ƥiy Yoseef: Hani’el fee o ƥiy Efood,

²⁴na carind ale Efrayim fee o ƥiy Yoseef: Kemu’el fee o ƥiy Siftan,

²⁵na carind ale Sabulon: Elisafan fee o ƥiy Parnak,

²⁶na carind ale Isakaar: Palti’el fee o ƥiy Asan,

²⁷na carind ale Aseer: Ahihud fee o ƥiy Selom,

²⁸na carind ale Neftali: Pedahel fee o ƥiy Amihud.»

²⁹Weene ndefu we o Yaal oxe a jilna, ndax da las Ii-isra’el we saax le Kanaan.