Read NQAARIIT NE ROOG A lim ale 35 Bible Online

A lim ale 35 - NQAARIIT NE ROOG bible

A lim ale 35

¹O Yaal oxe a laya fa Moyiis na xa saawit axaa Mowaab, paam Yordaan, njasnoorna fa Yeriko. Keeke refu ke ta layuuna:

²«Hebli Ii-isra’el we da coox Leelewi we no ke da lamkaa teeru kaa da mbaagna o ngen. Fat da coox a den itam xa saawit xa kayel me widna teeru keene.

³Fat a ngen no teeru keene, a njeg me widna a den fop, ndax xa siir axe den fo cegel lakas ke den fop a njeg maa da suufaa.

⁴Xa suufand axeene fat a mbi xa noonoong juni, a nqotit no saŋe ne na teeru fee.

⁵Fat nu liiƥ xa noonoong cuni ƭik farna fo batand fo no ɓemb-roog o ñamaak fo no mudand fo no ɓemb-roog o janoon, a xotit a ndeer ale na teeru fee.

⁶Ndeer teeru ke nu cooxkaa Leelewi we, fat a jeg teen teeru ɓetuu fa leng caɓnooxand, maa oxe warna o kiin a waagna o jaɓnook fo teeru qarɓeen nahik fo teeru ƭik lakas.

⁷Teeru ke nu cooxkaa Leelewi we boog xan a ndef fop oo fop teeru qarɓeen nahik fo teeru ɓetuu tadik, a yoon fo xa suufand axe mbidna a den.

⁸Fat teeru ke a carind aluu refna a cooxkaa a den a reefandel no ne lanq ke da laseena a mbodna. Fat a carind a maak a cooxit kaa moƴna o may, soo a carind a teɓ a cooxit mayeer.»

⁹O Yaal oxe a laya a Moyiis

¹⁰ta daawin Ii-isra’el we kene: «Yaa nu njootkaa a Yordaan boo ndok no saax le Kanaan,

¹¹fat nu njil teeru leng-leng, da ndef teeru caɓnooxand, maa oxe warna o kiin took taamaala a waagkaa o jaɓnook.

¹²Neene, xan a waag o ɓostoox oxe warna o rabdinooxan oxe wareena, too warkaand boo yaa mbokatax ne a ngate’kan.

¹³Fat nu njil teeru ɓetuu fa leng caɓnooxand,

¹⁴tadik no batand ne Yordaan fo tadik no saax le Kanaan.

¹⁵Oxuu warna o kiin took taamaala, ta ref na nuun Ii-isra’el we mbaat o gataakoon olaa genna a ndeer nuun mbaat o kenar, a waaga o jaɓnook no leng no teeru ɓetuu fa leng keene.

¹⁶Kaa koy, a jegangaa oxaa xawitna o kend um kaa fi’teena njelem boo a warin, oxeene kiin o baawar oo, too kaa warel o war.

¹⁷Boo o kiin a kafna ɓil laa waagna o war, soo a wartin o kend um, o baawar oo, too kaa warel o war.

¹⁸Boo o kiin a xotna o loq olaa waagna o war, soo a wartin o kend um o baawar oo, too kaa warel o war.

¹⁹Oxe warna o rabdinooxan oxe wareena, fat a war o baawar oxeene, yaa ta ga’uuna.

²⁰Boo o kiin a diyna a riñ o kend um, yaam a fuuxanin mbaat ta deɓin tig, yaam a fogan bo ta xon

²¹mbaat ta wartin o kurpeeñ yaam a fañin, fat oxe warna a warel, yaam o baawar oo. Oxe warna o rabdinooxan oxe wareena fat a warin, yaa ta ga’uuna.

²²Kaa koy, boo o kiin a riñna o kiin o lakas too diyiran, refee itam ee kaa fuuxanin mbaat ta roomin tig too bug’iran

²³mbaat ta maaf took um ɓil laa waaguuna o war boo oxeene a xon, too refee o pañ um mbaat bugan’iran paaxeer,

²⁴fat mbokatax ne a ndok a ndeer no xe warna fo xe na rabdinooxankaa oxe wareena.

²⁵Fat mbokatax ne a mucil oxe warna no ɓay no taarabdinax oxe, a nomtin na teeru fa njaɓnooxand fee ta jaɓnook’ina. Fat a yoq maaga boo yaa o saasadax o maak oxe ɗuumeena diwliin fa tedu fee a xonkaa.

²⁶Kaa koy, bo o jaf um a ƴaktooxna me teeru fa njaɓnooxand fee ta laqooxna a dayna,

²⁷soo oxe warna o rabdinooxan oxe wareena a xet fo ten tafil teeru fee, a waagaan o war too a ƭat ŋaaykiran.

²⁸Oxe warna a wara yoq kam teeru fee boo yaa o saasadax o maak oxe a xonkaa. A cinj yaa oxeene a xonna soom a waagu o nomtoox no lanq ke ta jegna.

²⁹Fat nu ndeef bargal keene no suk boo no suk fo muu nu mbaagna o ngen.

³⁰O kiin a xawangaa o kiin o lakas boo a warin, fat oxe warna a warel, yaa seede mayu a layna yee ten fi’un. O seede leng kut taxkee o kiin a warel.

³¹Ba nu njaɓ a bateer, ndax nu mbuus o ñis no baawar oxe jagitna fa nqon. Kaa warel o war rek.

³²Ba nu njaɓ itam a bateer, ndax nu mbaas o kiin oxe ƴuf’ina, a laqook na teeru fa njaɓnooxand, ta nomtoox a genik no lanq um, too o saasadax o maak oxe xonafulee.

³³Nu mbaree o nqoolaƭarand saax le nu ngenkaa. Fo’oy fo ɓaxooxu kaa xoolaƭarandaa saax le, too boo o kiin a wareena, saax le waagaand o ɓogdit lakas a refangeerna fo’oy no baawar oxe.

³⁴Fat nu mbootoox a paax boog, ndax nu nqoolaƭarandkee saax le nu ngenkaa, too mi fa xoox es um genkaa teen a ndeer nuun. Mi refu o Yaal oxe genna a ndeer nuun, nuun Ii-isra’el we.»