Read NQAARIIT NE ROOG A lim ale 36 Bible Online

A lim ale 36 - NQAARIIT NE ROOG bible

A lim ale 36

¹Yaal ƥasil ke na qaw ale no Gaagalaad we ndefna xa ƥiy Makiir, a ndef xa taan Manaase fee o ƥiy Yoseef, a ngara me Moyiis fo kelfa ke na carind ake Isra’el.

²A laya yee: «O yaal in Moyiis, ye o Yaal oxe a hebloonga, ndax o lasit saax le a ndeer a carind ake Isra’el fo mbanjang, a hebil’aang itam o coox a las ale no pog in Selofad xa ƥeem xa tew.

³Ndiiki koy, boo da ndolnirna fo goor waa mbogna na carind a lakas Isra’el, a las den xan a sutoox no ale na carind ale in soo a ɓaatel na las ale na carind ale da mbogatna. Neene, a las ale i cooxeena fo mbanjang ne xan a wañoox.

⁴Yaa o Hiid o mbelakinax ole a fadkaa koy, a las den xan a sutel pil na carind ale in soo a cooxel a carind ale da mbogatna. Ndax foogaa yee a las ale in a wañoor neene a ƭat oo?»

⁵Ne o Yaal oxe a heblituuna o ten, Moyiis a daawna Ii-isra’el we bargal kene: «Xa taan axe Yoseef ƥuru.

⁶Keeke refu ke o Yaal oxe a heblitna na xa ƥiy xa tew axe Selofad. A mbaaga o ndolnir fo xuu da mbugna, kaa rek, fat a ref fo xaa fogna na qaw a leng na carind ale faap den.

⁷Lam leng a ndeer Ii-isra’el we inoorkee na carind a leng, a ret na lakas, ndaa fat oxuu refna no Ii-isra’el we a geek lam ne na carind faap um.

⁸O ƥiy o ndew onquu jegna lam na carind ake no Ii-isra’el we, fat a dolnir fo xaa fogna na qaw a leng na carind faap um, ndax a carind aluu refna na Isra’el a geek lanq faap um.

⁹Neene, lam leng sutoorkee na carind a leng, a jof na lakas, ndaa fat a carind aluu refna na ke Isra’el a geek lanq ke ta lamna.»

¹⁰Xa ƥiy xa tew axe Selofad a mbi’a deŋ ne o Yaal oxe a heblit’uuna a Moyiis.

¹¹Maxla fa Tirsa fa Hogla fa Milka fa Nowa, we xa ƥiy xa tew axe Selofad, a ndolnira fo fog faap den.

¹²A ndolooxa na qaw ake na xa taan Manaase fee o ƥiy Yoseef, too lam den a yoqa na carind ale na qaw faap den.

¹³Keene ndefu kebil ke fo bargal ke o Yaal oxe a daawinna Ii-isra’el we na pexey Moyiis, na xa saawit axaa Mowaab paam Yordaan, njasnoorna fa Yeriko.