Read NQAARIIT NE ROOG A lim ale 4 Bible Online

A lim ale 4 - NQAARIIT NE ROOG bible

A lim ale 4

¹O Yaal oxe a laya a Moyiis fa Aaroon ee:

²«Limyo Leelewi we mbaqaqoorna na Kehat, ndeefandin no ƥasil den fo na qaw den,

³nqotit no we njegna xa kiid qarɓeen tadik a jof took boo no we njegna xa kiid qarɓeen ƥetik. Ndetkee na xire, ndaa fat a mbadnaa o far den kam Ƭiif ne um xetteel, mi o Yaal oxe.

⁴Keeke na refkaa calel ke na xa taan axe Kehat kam Ƭiif ne um xetteel: A topatax ale no tikoorik ke moƴna o ted.

⁵A mbanuu saŋe ne a ɗiseel, fat Aaroon fo xa ƥeem a lokit mbaƴ ne na xaajaa o Mbiñ o tedu nqe fo o Mbiñ onqe moƴna o ted, a muurtin arka ne no ngiɓoor ne.

⁶Fat a ndoon teen ƭool jiinga soo a ƭaap took fee piis naa xiiyiiyna. Cinj kaaga, fat a mbad a teex ake arka ne a meeɓteel.

⁷Fat a ƭaap took a taabul ale na xa kaf puuru xe um ɓoxoteel piis naa xiiyiiyna soo a ndoon took fee xa ƥaxañ axeeke: xa afnir axe fo a tokol ake fo xa kuta xe fo xa toon axe na sadaxtiteel biiñ fee. Fat xa kaf axe a ndooneel teen kili.

⁸Fat a ƭaap took keene fop piis naa yaxigna coy soo a ndoon teen ƭool jiinga. Cinj kaaga, fat a mbad a teex ake a taabul ale a meeɓteel.

⁹Fat a nqot piis naa xiiyiiyna, a muurtin a pagal ale fo xa lampa um fo fop ke ta yoonitna: caƥir ke fo yipir ndaw ke fo yipir diwliin ke fop.

¹⁰Fat a mboftin ƭool jiinga, ten fo xa ƥaxañ um fop, soo a ndiƈin took njong meeɓir.

¹¹Fat a ƭaap piis naa xiiyiiyna took o sadaxand wurus ole soo a muurtin ƭool jiinga. Cinj kaaga, fat a mbad a teex ake ta meeɓteel.

¹²Fat a nqot xa ƥaxañ axe na njalteel yaa fa paɗax ale kam o Mbiñ o tedu nqe fop, a mbofit a den piis naa xiiyiiyna, a muurit a den ƭool jiinga. Cinj kaaga, fat a ndiƈ a den took njong meeɓir.

¹³Fat a mbatin ndaw ke ndefna no sadaxand ole no sadax toxel ke, a ƭaap took um piis ndaalde’u.

¹⁴Fat a ndoon took fee xa ƥaxañ axe na njalteel teen fop: yipir ndaw ke fo xa cuutir a tegeƴ ake fo xa ƥang axe fo xa toon xa biisir axe, soo a ƭaap took fee ƭool jiinga. Cinj kaaga, fat a mbad a teex ake ta meeɓteel.

¹⁵A mbanuu saŋe ne a bugeena o ɗis, fat xa taan axe Kehat a cung boo Aaroon fo xa ƥeem a muur tikoorik ke no Mbind tedu ne fo xa ƥaxañ axe ndefna teen fop, soo da sog o ngar, a meeɓ a den, ndax nduqkee muk tikoorik tedu keene, yaam ndik da nqon. Keene xa taan axe Kehat a mbugko saqaa no Ƭiif ne um xetteel.

¹⁶Eleyasaar fee o ƥiy Aaroon, o saasadax oxe, na bugko yetooxaa diwliin fa ngeƥandir fee na pagal ale fa cuuraay fa mbelu tuñ fee fo sadax tuufe-duufe ke na ƥoxoteel bes fuu refna fa diwliin fa ƭuumir fee. Ten na bugko yetooxaa Ngenand ne fo ke refna teen fop: tikoorik tedu ke fo xa ƥaxañ axe.»

¹⁷O Yaal oxe a layahina a Moyiis fa Aaroon ee:

¹⁸«Mbi’yo fop, ndax Keekehat we ñufkee a ndeer no Leelewi we.

¹⁹Mbi’anyo a den keeke, ndax nqonkee, yaa da meeɓiidkaa tikoorik keene moƴna o ted. Fat Aaroon fo xa ƥeem a ƭox o kiin oo kiin na den boo na seek um soo a cooxin a toq um.

²⁰Mbaree o nga’aqiloox o ndik sax no tikoorik tedu ke, yaam yaaga xan a nqon.»

²¹O Yaal oxe a laya a Moyiis ee:

²²«Limi itam xa taan axe Geerson, reefandin no ƥasil den fo na qaw den.

²³Fat o bind we njegna xa kiid qarɓeen tadik a jof took boo no we njegna xa kiid qarɓeen ƥetik. Ndetkee na xire, ndaa fat a mbadnaa o far den kam Ƭiif ne um xetteel.

²⁴Keeke na refkaa calel ke na xa taan axe Geerson:

²⁵den na mbugko saqaa a naf a supte ke Ngenand ne a bombteel fo ake no Ƭiif ne fo pay ne fi’teena ƭool a suk paal fo ne fi’teena ƭool jiinga na singaa fop fo mbaƴ ne na fegaa ndokand ne no Ƭiif ne

²⁶fo njoor ne o maax ole a ɓitteel fo mbaƴ ne na fegaa a carind ale no maax ole widna Ngenand ne fo o sadaxand ole fo xa ƥaak axe no ɓit le fo fop ke ta yoonitna fo ke da topatoorteel. Fat da mbadin calel ke na mbi’teel teen fop.

²⁷Kam calel den, fat xa taan axe Geerson a ndeef ke Aaroon fo xa ƥeem a ngebilkaa a den no fop ke da saqkaa fo no calel ke da mbarna o mbi fop. Fat da ndoxin a den fop ke da mbarna o saq.

²⁸Keene na refkaa calel ke na xa taan axe Geerson kam Ƭiif ne um xetteel. Itamaar fee o ƥiy Aaroon fee o saasadax oxe na adooxankaa a den.»

²⁹«Fat o lim itam xa taan axe Merari, reefandin no ƥasil den fo na qaw den.

³⁰Fat o bind goor we njegna xa kiid qarɓeen tadik a jof took boo no we njegna xa kiid qarɓeen ƥetik. Ndetkee na xire, ndaa fat a mbadnaa o far den kam Ƭiif ne um xetteel.

³¹Keeke refu ke da mbarna o saqaa no Ƭiif ne um xetteel: A patax ake no Ngenand ne fo a kadand ake fo a toodook ake fo a caf den

³²fo a ƥiiɓit ake mbidna o maax ole fo a caf den fo xa teng den fo xa ƥaak den fo fop ke ta yoonitna fo ke da topatoorteel. Fat oxuu refna na den a lalel ke ta warna o saqaa.

³³Keene na refkaa calel ke na xa taan axe Merari kam Ƭiif ne um xetteel. Itamaar fee o ƥiy Aaroon fee o saasadax oxe na adooxankaa a den.»

³⁴Moyiis fa Aaroon fo aa-adax we Isra’el a lima Leelewi we fop ndeeƭna xa taan Kehat fa Geerson fa Merari, a ndeefandin no ƥasil den fo na qaw den, a nqotit no we njeg’ina xa kiid qarɓeen tadik a jof took boo no we njeg’ina xa kiid qarɓeen ƥetik. Fop we mbaag’ina o mbadnaa o far den kam Ƭiif ne o Yaal oxe a xetteel, too mbar’ee ndet na xire, a mbind’e. Moyiis fa Aaroon a lima a den soo a mbind a den, ne o Yaal oxe a heblit’uuna a Moyiis. Neeke a mbod’u: Na xa taan axe Kehat: goor cuni ƭik fo teemeed ɓetuu ƭik fo qarɓeen ƥetik. Na xa taan axe Geerson: goor cuni ƭik fo teemeed ɓetuu fa leng fo qarɓeen tadik. Na xa taan axe Merari: goor cuni tadik fo teemeed ƭik. Leelewi weene fop a ndeeƭa goor cuni ɓetuu tadik fo teemeed ƥetik fo qarɓeen ɓetuu tadik. Oxuu refna na den a lal’e ke ta war’ina o jalaa fo ke ta war’ina o saqaa. Keene fop a fi’it’e ne o Yaal oxe a heblit’uuna a Moyiis.