Read NQAARIIT NE ROOG A lim ale 5 Bible Online

A lim ale 5 - NQAARIIT NE ROOG bible

A lim ale 5

¹O Yaal oxe a laya a Moyiis ee:

²«Hebli Ii-isra’el we da sut no saŋe ne oxuu saqna a tik-a-maak fo xuu jegna jir no mbaambir um fo xuu xoolaƭarna yaam a duq o dal.

³Fat nu sut a den tafil saŋe ne, goor oo rew oo, ndax nqoolaƭarandkee saŋe ne refna me um genaa a ndeer den.»

⁴Ii-isra’el we a mbi’taan naaga too a suta a den saŋe ne, ne o Yaal oxe a heblit’uuna a Moyiis.

⁵O Yaal oxe a laya a Moyiis

⁶ta daawin Ii-isra’el we kene: «A soƥangaa yee o koor mbaat o tew kaa ɗap o kend um a ƭat, a tooña o Yaal oxe too a ware o xaw.

⁷A wara o weejil bakaad um, a rabid o kend um soo a ɓaat teen a seek a ƥetkandeer no ke ta rabidna.

⁸A soƥangaa yee oxe tooñeena kaa xon too jegee o pog oxaa warna o dek ndabid neene, fat a ɓoxotel o Yaal oxe, o saasadax oxe a jangin. Kaa jolna keene, fat a ɓisiid suk mbaal le ta jofooranditkeel fa Roog.

⁹Sadax fuu Ii-isra’el we a ƥoxottaa, o saasadax oxe a jega teen a las.

¹⁰O saasadax oxuu refna na jegkaa ke ta laseena no sadax ke, too kuu o kiin a ci’na o saasadax, oxeene jegatun.»

¹¹O Yaal oxe a laya a Moyiis

¹²ta daawin Ii-isra’el we kene: «A soƥangaa yee kaa o tew o tolooxu a fes o kor um a cinj boo a fañat o damoox no ten,

¹³a xoolaƭaranda a xoox um, yaa ta wondooxna fo o koor o lakas, o kor um a andangee teen tig sax oo, yaam ne o leng a seede’eeruuna too betaand, ye ta fi’an.

¹⁴Naal a damangaa o kor oxe koy, bo ta foog ee o teem kaa seeq, ta jeg mbaat ta ñak o jeg,

¹⁵fat a ɓisiidin me no saasadax oxe soo a ɓoxotanin sadax ngap kilo tadik mbiɗel lorso. Yipkee teen diwliin too doonkee teen cuuraay itam, yaam sadax naal oo, faa na weejlaa, ndax njofaƭar ne foogeena a jega mbaat jegee.

¹⁶Fat o saasadax oxe a ɓisiid o tew oxe, a geennin mbaambir no Yaal oxe.

¹⁷Fat a xaf foofi fo tedu no jalag o maxe, a buf no lanq ke no Ngenand ne, soo a yipin no foofi le.

¹⁸Fat a geenin o tew oxe mbaambir no Yaal oxe, a sañtin soo a cooxin sadax naal fee na weejlaa ke foogeena, ta deegooxin. O saasadax oxe o mat, fat a deegoox foofi fo xaaɗu le na saloorteel.

¹⁹Fat a daaɓooxnoor o tew oxe soo a layin ee: ‹A soƥangaa yee o koor o lakas wondooxee fa wo, o damoox no kor of too xoolaƭarandiro a xoox of, foofi fo xaaɗu leeke na salooxaa waagankirang tus.

²⁰Kaa koy, a soƥangaa yee naxaa o kor of, xoolaƭarand a xoox of, yaa wondooxoona fo o koor o lakas oxaa refeerna o kor of,

²¹yaasam o Yaal oxe a salooxong, a xatnong, a uuf o fud of, soo xeet of fop a saloortaa gon of.

²²Fat foofi lene na salooxaa a rok no laaw ke wo, a uuf o fud of soo a xatnong.› Fat o tew oxe a doon ee: ‹Amiini! Fat a jegit neen!›

²³Fat o saasadax oxe a bind a salax akeene, a xooƴin no foofi fo xaaɗu le.

²⁴Fat o tew oxe a yernel foofi leene na salooxaa, ndax ta xaaɗin kam um.

²⁵Bo ta helko fo yerneel o ten, fat o saasadax oxe a jangit na xa ƥay no tew oxe sadax naal fee na weejlaa ke foogeena, a yaandin mbaambir no Yaal oxe soo a ɓoxotin took o sadaxand ole.

²⁶Fat a naq o ɓay o leng na sadax feene, a doxin took o sadaxand ole nen betandoor, cinj kaaga ta yerin o tew oxe foofi le.

²⁷Keeke na xewkaa, yaa ta yernuuna foofi le. A soƥangaa yee kaa xoolaƭarand a xoox um, a fañ o damoox no kor um, foofi fo xaaɗu le na salooxaa xan a rok no laaw ke ten, a uuf o fud um soo a xatnin, too oxeene tew xan gon um a saloorteel a ndeer xeet um.

²⁸Kaa koy, a soƥangaa yee o tew oxeene a xoola, dara damkiran, too xan a maad o jegaa xa ƥiy.

²⁹Keene refu ke hebleena no naal, yaa andoona yee kaa o tew a ɗap o kor um soo a xoolaƭarand a xoox um

³⁰fo yaa o kor oxe a foogna yee o teem kaa seeq. Fat o koor oxe a ɓisiid o teem mbaambir no Yaal oxe, soo o saasadax oxe a fi’anin keene hebleena fop.

³¹Neene, o leng jegkee kaa ta ɓanjitna o kor oxe, ndaa o tew oxe o mat, xan a gadoox tooñ um, yaa ta soƥna yee ten ɗapu.»