Read NQAARIIT NE ROOG A lim ale 6 Bible Online

A lim ale 6 - NQAARIIT NE ROOG bible

A lim ale 6

¹O Yaal oxe a laya a Moyiis

²ta daawin Ii-isra’el we kene: «Boo o koor mbaat o tew a kesooxna, yaam ne ta regitna nasiir[2], ndax ta ɓoxotoox no Yaal oxe,

³fat a waas biiñ fo a yer aluu na waynaa. Yerkee bineegar faa hatna na biiñ mbaat a yer a lakas aluu ñolandeena. Yerkee itam a yer a leng alaa hatna na xa biiñ, too ñaamkee xa biiñ xa quƥu mbaat xa beeru.

⁴Na pe ake ta ɓoxotooxna, ñaamkee dara kaa inoorna no ndaxar biiñ, ta ref a koƥ ake sax mbaat xa qoƥ axe.

⁵Na pe ake ta ɓoxotooxna, waree o ruusoox. Boo yaa a pe ake ta ɓoxotooxna no Yaal oxe a mbaafkaa, xan a ted. Fat a xaƴ wiil um ta maaktaa naa feluuna.

⁶Na pe ake ta ɓoxotooxna no Yaal oxe, matkee o qon.

⁷Ta ref ee faap um mbaat ya um mbaat o maag um mbaat o ndeɓ um xonu, o leng na den wariran o tax o xoolaƭar, yaam kaa kesanel a Roog, ne wiil um a laltituuna.

⁸Fat a ted na pe ake ta ɓoxotooxna no Yaal oxe fop.

⁹A soƥangaa yee kaa jeg oxaa xonna paam um ndak-fo-ndukax boo a taxin o xoolaƭar, bo ta xoolataa xan a jeg ñaal ɓetuu ƭik, too fat a ruusoox a koom.

¹⁰No ñaal ɓetuu ndadkandeer ne, fat a ɓisiid o saasadax oxe a qoɗoxoñ a ƭak mbaat a nuukuur a ƭak, no ndokand ne no Ƭiif ne um xetteel, mi o Yaal oxe.

¹¹Fat o saasadax oxe a sadaxit leng no tiiƭ keene nen sadax fa mbaasnoor pakaad soo lakas ne nen sadax fa ndoxel, ndax ta jofoorandin fa mi no nqoolaƭar neene o dal ole a garitna. No ñaal leng kut neene, fat a kesanatin o Yaal oxe xoox le ten, a fañat o ruusoox.

¹²Maaga, fat a ɓoxotooxatin no Yaal oxe boo ñaal podne ta regoor’ina fo ten, a sadaxit o mbaal onqaa jegna o hiid nen sadax fa nqendandoor. Ñaal ke mbaafna koy, limitkataand, yaam a ƥoxotax ale ten kaa yaqoox’u.

¹³Keeke refu ke hebleena no xe ɓoxotooxna nen nasiir: Yaa ñaal ke ta regooreena a mbadnooxkaa, fat a ɓisiidel no ndokand ne no Ƭiif ne um xetteel.

¹⁴Fat a ɓoxotaam, mi o Yaal oxe o mbaal onqaa jegna o hiid, a ñak sik nen sadax fa ndoxel fo mbaal ndew naa jegna o hiid, a ñak sik nen sadax fa mbaasnoor pakaad fo suk mbaal laa jegeerna sik nen sadax fa njamsa’oor.

¹⁵Fat a ɓisiid itam a cenjel xa kaf xa canja’e xaa mbosolteena diwliin fo xa puudu xa canja’e kaa suleena diwliin, a yoonandit a den sadax tuufe-duufe fa sadax biiñ.

¹⁶Fat o saasadax oxe a ɓisiid keene fop mbaambir es, mi o Yaal oxe, soo a ɓoxot sadax fa mbaasnoor pakaad fee fa sadax fa ndoxel fee.

¹⁷Cinj kaaga, fat a ɓoxot suk mbaal le na sadax fa njamsa’oor fee, a yoonandtin a cenjel ale na xa kaf xa canja’e xe, soo a doon teen sadax tuufe-duufe ke fa fee na biiñ fee.

¹⁸Maaga, fat oxe ɓoxotoox’ina na mi o Yaal oxe, a ruusoor no ndokand ne no Ƭiif ne. Fat a jang wiil le lalit’ina yee kaa kesan’el a mi, a doonin na fiɗel le me sadax fa njamsa’oor fee a doxteel.

¹⁹A cinj yaa oxeene a ruusooxna, fat o saasadax oxe a jang a peel a cawe le no suk mbaal le, a xot na cenjel ale o gaf o janja’e fo o fuudu njanja’e soo a doon a den na xa ƥay no xe ɓoxotoox’ina.

²⁰Fat o saasadax oxe a yaand a den mbaambir es, mi o Yaal oxe. Tig tedu kaa o saasadax oxe a jegna yoo, fogreerna fo ngang ne yaandeena fo a ñaal ale watneena. Cinj kaaga, oxe ɓoxotoox’ina xan a waagat o yer biiñ.

²¹Keene refu ke hebleena no xe ɓoxotooxna nen nasiir fo sadax ke ta waraxama o ɓoxot, mi o Yaal oxe. A soƥangaa koy ee a jega ci’it lakas kaa ta bugna o ɓaat teen, a waagaan o fi. Kaa koy, a regit’angaan, a waraan o fadin.»

²²O Yaal oxe a laya a Moyiis

²³ta daawin a Aaroon fo xa ƥeem kene: «Neeke nu mbarke’itkaa Ii-isra’el we. Fat nu lay a den ee:

²⁴‹Yaasam o Yaal oxe a barke a nuun too a saytoox a nuun.

²⁵Yaasam o Yaal oxe a lal a nuun a tagid um too a yirim a nuun.

²⁶Yaasam o Yaal oxe a ɗeet a nuun too a ci a nuun jam.›

²⁷Neene saasadax we a ne’itkaa gon es, too xam barke Ii-isra’el we.»