Read NQAARIIT NE ROOG A lim ale 7 Bible Online

A lim ale 7 - NQAARIIT NE ROOG bible

A lim ale 7

¹Yaa Moyiis a geeninna Ngenand ne boo a ƴut, a ɗuumaan soo a tedlandin, ten oo, tikoorik um oo. A ɗuuma itam o sadaxand ole fo ƥaxañ um, a tedland a den.

²Maaga, we kelfa’’ina a carind ake Isra’el a ƥisiida ci’it den. Den weene o mat adooxan’u a lim ale.

³A ƥisiida ci’it den mbaambir no Yaal oxe: A sareet ɓetuu fa leng akaa ƭiifeena fo qoox xarɓaxay fo qoox ƭik, kelfa ƭik kuu ndefna a sareet a leng soo kelfa fuu refna nqoox. A ƥoxota a den mbaambir Ngenand ne.

⁴O Yaal oxe a laya a Moyiis ee:

⁵«Xoti keene fop na den, ndax da njiriiñooreel no calel ke no Ƭiif ne um xetteel, mi o Yaal oxe. Fat o coox a den Leelewi we, reefandin no calel den.»

⁶Moyiis a janga a sareet ake fo qoox ke soo a ɓoxot a den Leelewi we.

⁷A cooxa Geegeerson we a sareet a ƭak fo qoox nahik, ndax da ndimle’ooraa a den no calel den.

⁸A cooxa Meemerari we a sareet a nahak fo qoox ɓetuu tadik, ndax da ndimle’ooraa a den no calel ke Itamaar fee o ƥiy Aaroon, o saasadax oxe, a adooxan’ina a den.

⁹Keekehat we o mat, coox’ee a den tig, yaam tikoorik tedu ke a ndoxin’e, too kaa mbar’u o ngadooxaa a den.

¹⁰No ñaal naa o sadaxand ole a ɗuumeena, kelfa ke a ƥisiid’a ci’it den na barke fee no sadaxand ole. Ye da ƥisiidaa ci’it keene mbaambir o sadaxand ole,

¹¹o Yaal oxe a laya a Moyiis ee: «Fat kelfa ke a ngaraa o leng o leng, ndax da ƥoxot ci’it den na barke fee no sadaxand ole, oxuu refna fa bes um.»

¹²Neeke a ndeepatirit’u: No ñaal eetaand ne: Naason fee o ƥiy Aminadab, na carind ale Yudaa. No ñaal ƭikandeer ne: Netanel fee o ƥiy Suwar, na carind ale Isakaar. No ñaal ndadkandeer ne: Eliyab fee o ƥiy Heelon, na carind ale Sabulon. No ñaal nahkandeer ne: Elisuur fee o ƥiy Sede’uur, na carind ale Ruben. No ñaal ƥetkandeer ne: Selumi’el fee o ƥiy Surisaday, na carind ale Simewon. No ñaal ɓetuu fa lengandeer ne: Eliyasaf fee o ƥiy Dewel, na carind ale Gaad. No ñaal ɓetuu ƭikandeer ne: Elisama fee o ƥiy Amihud, na carind ale Efrayim. No ñaal ɓetuu ndadkandeer ne: Gamali’el fee o ƥiy Pedasuur, na carind ale Manaase. No ñaal ɓetuu nahkandeer ne: Abidan fee o ƥiy Gidoni, na carind ale Bensame. No ñaal xarɓaxayandeer ne: Ahiyeseer fee o ƥiy Amisaday, na carind ale Dan. No ñaal xarɓaxay fo lengandeer ne: Pagi’el fee o ƥiy Okran, na carind ale Aseer. No ñaal xarɓaxay fo ƭikandeer ne: Ahira fee o ƥiy Enaan, na carind ale Neftali. Oxuu refna na den a (...)

⁸⁴Keene refu ke kelfa ke Isra’el a ci’itna na barke fee no sadaxand ole, no ñaal naa ta ɗuumeena. A jeg’a maaga: xa afnir xarɓaxay fo xa afnir xa ƭaq axaa njalteena xaaliis fo fo ndoon xarɓaxay fo fo ndoon fo ƭik naa njalteena xaaliis fo a tokol xarɓaxay fo a tokol a ƭak akaa ndefna wurus.

⁸⁵O afnir oluu refna, o meɗel um a fi’a ngap kilo fa genwal liibar, soo o ndoon onquu refna a fi ngap liibar fo genwal liibar. Xaaliis fee fi’it’eena xa ƥaxañ axeene fop, a reeƭa ngap kilo qarɓeen ƭik fo kilo nahik no eedir ke no Mbind tedu ne.

⁸⁶A tokol aluu refna na tokol xarɓaxay fo a ƭak ake ndeeƭna wurus too a yip’u cuuraay boo a may, o meɗel um a reeƭa ngap a qaaj a ƥetkandeer liibar. Wurus fee jalit’eena a tokol ake fop a reeƭa ngap kilo fo genwal liibar.

⁸⁷Cegel ke no sadax toxel ke a ndeeƭa: qoox xarɓaxay fo qoox ƭik fo a suk paal xarɓaxay fo a suk a ƭak fo fo mbaal xarɓaxay fo fo mbaal fo ƭik naa njegna o hiid fo sadax tuufe-duufe ke da mbareena o yoonandit. A jeg’a a suk pambe xarɓaxay fo a ƭak ake no sadax paasnoor pakaad ke.

⁸⁸Cegel ke no sadax camsa’oor ke a ndeeƭa qoox qarɓeen ƭik fo qoox nahik fo a suk paal qarɓeen ɓetuu fa leng fo a suk pambe qarɓeen ɓetuu fa leng fo fo mbaal qarɓeen ɓetuu fa leng naa njegna o hiid. Keene ci’tiid’e na barke fee no sadaxand ole a cinj ye ta ɗuumeena.

⁸⁹Ye Moyiis a rokna no Ƭiif ne o Yaal oxe a xetteel, ndax ta lay fo ten, a nan’a o ñuxur olaa layoogna fo ten, a inooraa me yoorooxna o afnir-o-fortand ole no arka ne no ngiɓoor ne, a ndeer pindel yeeyetax ƭik ke. Maaga o Yaal oxe a laytoogu fa Moyiis.