Read NQAARIIT NE ROOG A lim ale 8 Bible Online

A lim ale 8 - NQAARIIT NE ROOG bible

A lim ale 8

¹O Yaal oxe a laya a Moyiis

²ta daawin a Aaroon kene: «Boo andoona yee doonaa xa lampa ɓetaa ƭaq axe took a pagal ale, a mbara o nqooland mbaambrand ne na pagal ale.»

³Aaroon a doona xa lampa xe took a pagal ale, da nqoolandaa mbaambrand ne na pagal ale, ne o Yaal oxe a heblit’uuna a Moyiis.

⁴A pagal ale koy, wurus a xawit’e, ke xotitna no fimb ole boo no piɗ ke. Moyiis a fi’’a a pagal ale, ta mengoor fo samandaal ne o Yaal oxe a lal’uuna.

⁵O Yaal oxe a laya a Moyiis ee:

⁶«Xoti Leelewi we ndefna a ndeer Ii-isra’el we, ɓogid a den.

⁷Neeke o mat o ɓogditkaa a den: Wiisi took den foofi le na ɓogdaa pakaad ke, fat da nduus wiil le no cer den fop, a ndap toki den, cinj kaaga xan a nqoolat.

⁸Fat a nqot o nqoox o ndeɓ, a ƥoxotin nen sadax fa ndoxel, a yoonandtin mbiɗel qiiwte diwliin, ta ref sadax tuufe-duufe. Cinj kaaga, fat o xot o nqoox o ndeɓ o lakas, ta ref sadax fa mbaasnoor pakaad.

⁹Maaga, fat o matandiid Leelewi we mbaambir Ƭiif ne um xetteel, mi o Yaal oxe, soo fokat xeet fee Isra’el fop.

¹⁰O matandiidangaa Leelewi we mbaambir es, mi o Yaal oxe, fat Ii-isra’el weene a ndoon a den xa ƥay.

¹¹Fat Aaroon a ɓoxot Leelewi we mbaambir es, mi o Yaal oxe, nen sadax faa yaandeena, da ndefan a nuun, nuun Ii-isra’el we, a kesanel calel es.

¹²Fat Leelewi we a ndoon xa ƥay den took xoox le no fo nqoox ne, soo um ɓoxotel leng ne nen sadax fa mbaasnoor pakaad, lakas ne nen sadax fa ndoxel, ndax Leelewi we a njofoorandel fa mi.

¹³Fat o geenin Leelewi we mbaambir Aaroon fo xa ƥeem, ɓoxotaam a den nen sadax faa yaandeena.

¹⁴Fat o kesanaam Leelewi we a ndeer Ii-isra’el we, um jeg a den.

¹⁵O ɓogdangaa Leelewi we boo ƴut, ɓoxotaam a den, a mbaagata o mbadnik o far den kam Ƭiif ne um xetteel,

¹⁶yaam mi jegatu a den a ndeer Ii-isra’el we. Kaam kesan a den a xoox es, sofit a den taaw ke no Ii-isra’el we fop,

¹⁷yaam taaw fuu refna no Ii-isra’el we mi jegun, ta ref no wiin we fo no cegel ke. No kaa xotitna na bes faa warnooruuma taaw ke ndeeƭna no saax laa Misira fop, kesanaam a den a xoox es.

¹⁸Kaam sofit Leelewi we taaw ke no Ii-isra’el we fop,

¹⁹ɓoxot a den a Aaroon fo xa ƥeem a ndeer Ii-isra’el we, ndax da njalanaa a den kam Ƭiif ne um xetteel, a njofoorandaa a den fa mi. Neene, Ii-isra’el we nqawitkaand taamaala fa leng, yaa da matiidna Mbind tedu ne.»

²⁰Moyiis fa Aaroon fo mbokatax ne Isra’el fop a mbi’a no Leelewi we fop ke o Yaal oxe a hebil’ina a Moyiis.

²¹Leelewi we a ƥogdinooxa, a ndap toki den, soo Aaroon a ɓoxot a den o Yaal oxe nen sadax faa yaandeena, a jofoorand a den fo ten, ndax da nqool.

²²Cinj kaaga, Leelewi we a mbadnika o far den kam Ƭiif ne o Yaal oxe a xetteel, Aaroon fo xa ƥeem a adooxan a den. Neene, fop ke o Yaal oxe a hebil’ina a Moyiis no Leelewi we, a fi’’e.

²³O Yaal oxe a layahina a Moyiis ee:

²⁴«Keeke refu ke dalneena no Leelewi we: O Leelewi xuu jegna xa kiid qarɓeen ƭik fo xa ƥetaq a jof took, fat a fadnaa o far um kam Ƭiif ne um xetteel.

²⁵A jegangaa xa kiid qarɓeen ƥetik, fat a woktel no calel keene.

²⁶Kaa koy, a waaga o dimle’aa fog um Leelewi we no calel ke da ndoxneena kam Ƭiif ne, ndaa roxondkataand calel leng. Neene o ñaaƴnitkaa calel ke no Leelewi we.»