Read NQAARIIT NE ROOG A lim ale 9 Bible Online

A lim ale 9 - NQAARIIT NE ROOG bible

A lim ale 9

¹O Yaal oxe a laya fa Moyiis, kam a koƥ-a-ƥor alaa Sinayi, no nqool o eetaand onqe no hiid o ɗikandeer ole cinj a sutax alaa no Ii-isra’el we no saax laa Misira. A layaan ee:

²«Fat Ii-isra’el we a ndoofandaa Xew fee na colandax ale na waxtu fee ta hapeena.

³Fat nu ndoofandan no ñaal xarɓaxay fo ñaal nahkandeer ne no nqool onqeene, na kid-a-caɓru kaa. Fat nu ndoofandtan ne kebil ke fo bargal ke fop a simtituuna.»

⁴Neene, Moyiis a hebla Ii-isra’el we da ndoofandaa Xew fee na colandax ale,

⁵too weene a ndoofand’aan no ñaal xarɓaxay fo ñaal nahkandeer ne no nqool o eetand onqe, na kid-a-caɓru kaa, kam a koƥ-a-ƥor alaa Sinayi. Ii-isra’el we a mbi’it’aan ne o Yaal oxe a heblit’uuna a Moyiis.

⁶A jeg’a koy goor waa mbaag’eerna o ndoofand Xew fee na colandax ale no ñaal naaga, yaam ne da nduq’ina o dal boo a nqoolaƭar. A soƥiida a Moyiis fa Aaroon a koom-fa-koom,

⁷too a lay a Moyiis ee: «Kaa i nqoolaƭar, yaam ne i nduqna o dal. Ndax i mbaagkatee mbaag o ƥoxot o Yaal oxe sadax nen Ii-isra’el lakas we, yaam ne ñaal ne a hapeena?»

⁸Moyiis a doona a den ee: «Cungaamoo mene bo um and ke o Yaal oxe a hebilkaa a nuun.»

⁹O Yaal oxe a laya a Moyiis

¹⁰ta daawin Ii-isra’el we kene: «A jegangaa na nuun mbaat na xa taan nuun waa ta soƥna da nqoolaƭar yaam a nduq o dal mbaat da ñaaƴik o mbiñ o ngoƭu, waree o yaqan a den da ndoofandanaam, mi o Yaal oxe, Xew fee na colandax ale.

¹¹Kaa koy, no nqool o ƭikandeer onqe a ndoofandkan, no ñaal xarɓaxay fo ñaal nahkandeer ne, na kid-a-caɓru kaa. Fat a ñaamit o njuk mbaal onqe na Colandax ale puuru canja’e, a yoonandtin qaaɗu.

¹²Mbe’inkee teen dara too ƥolkee teen o hiiƈ o leng. Fat a ndoofandtin ne bargal ke na Xew fee na colandax ale a simtituuna fop.

¹³Oxuu ta soƥna koy ta xool, too ñaaƴkee soo a fañ o roofand Xew fee na colandax ale, oxeene kiin fat a sutel xeet um, yaam ne ta ɓoxoteeraxama sadax, mi o Yaal oxe, na waxtu fee hapuuma. O kiin oxeene xan a gadoox bakaad um.

¹⁴Boo o gataakoon olaa refna no mbind nuun a bugaxama o roofandan Xew fee na colandax ale, fat a fi’tin ne kebil ke fo bargal ke na Colandax ale a ngeblituuna. Nuun fop na mbogkaa kebil leng kut ke, ta ref o gataakoon ole mbaat oxe fogna na xeet fee.»

¹⁵No ñaal naa Ngenand tedu ne singoogna arka ne no ngiɓoor ne a geenneena, eel le a muur’aan. No kaa xotitna no yaar olaa boo no feet nqes olaa, a jeg’a took Ngenand ne kaa nandtoogna aal fiɗel.

¹⁶Neene a reftoogatu kili: A ñaal’angaa, eel le kaa muuroogu Ngenand ne, soo a yengangaa ta fi nen aal fiɗel.

¹⁷A mbanuu eel le a yoɗoor’ina no Ngenand ne, a jof took, Ii-isra’el we a suurooga na ñaaƈ den boo maa ta geenooritna, soo da ndal maaga.

¹⁸Ne o Yaal oxe a heblitooguuna Ii-isra’el we, a ndettoogu soo a ndaltaa neen itam. Nuu eel le a miñtoogna took Ngenand ne, naaga Ii-isra’el we a mooftoogu no daland den.

¹⁹Eel le a jeg’angaa ñaal mayu took Ngenand ne, Ii-isra’el we a nananooga kebil ne no Yaal oxe too ndetoogee.

²⁰Boo eel le a jeg’ina a pe a miñeer took Ngenand ne, a ndalooga, a ndetaa ne o Yaal oxe a heblit’uuna a den.

²¹Eel le a geenoox’angaa o mbiñ o yeng o leng soom mbaat ñaal leng fo o yeng um soo a yoɗooxatin, a ndetooga.

²²Eel le a geenoox’angaa took Ngenand ne ñaal ƭik mbaat o nqool mbaat kaa hupuuna, Ii-isra’el we ndetoogee, a refangee eel le kaa yoɗoox.

²³Ne o Yaal oxe a heblitooguuna a den, a ndaltoogu soo a ndettaa neen itam. A nananooga boog ke o Yaal oxe a heblit’ina, a reefandin na Moyiis.