Read NQAARIIT NE ROOG Mise 1 Bible Online

Mise 1 - NQAARIIT NE ROOG bible

Mise 1

¹Keeke refu fa lay fee o Yaal oxe a daawinna a Mise fee gen’ina na teeru faa Moreset na jamaane Yotaam fa Ahas fa Hiskiya we maad Yudaa, ta ref mbeeñil naa jaginna na Samari[1] fa Yeerusaleem.

²Nuun qeet ke fop, nan-gilooxyo! Lanq ke fo ke refna teen, ndungyo nof nuun! O Yaal oxe na refkaa boo faw xan a layoor fa nuun, a inoortiid no Mbind tedu ne ten.

³O Yaal oxe xey a sutooraa no Ngenand um, a fudooxiidaa, a dakaa took fo mbiñ fo ngoƭu took ne no lanq ke.

⁴Xa coong axe kaa naayaa ɗuga a caf um nen likaañ kam fiɗel, a yulanq ake a ngasooxaa, nen maa foofi laa na caarooxaa na pudnand a gasna.

⁵Keene fop koy, tooñ ne Yakoob gartun, pakaad ke no mbind Isra’el! An ɓeku a Yakoob no tooñ neene? Mee ndax Samari yoo! An garu fo a ñaang a sadaxand ake Yudaa? Mee ndax Yeerusaleem oo!

⁶O Yaal oxe kaa tee: «Xam fi a Samari juum kefatin, ta refat o qol olaa waageena jimb taxar biiñ. Xam joor a ƥil ake ten kam a yulanq ale, xaƴ a per ake ten, da naang faŋ.

⁷Nitaal roog ke ten fop xan a nduguñel, tabid qoolaƭaru ke ten a ndoxel. Xam fiitin pangool ke ten fop ta waaƭitna tabid ke no njaga ne ten, da ndefatinik tabid njaga lakas.»

⁸Xam lool soo ɗomatoox yaam taamaala feene, ñaaƴaa a caf a ƥor, yoq duŋ, faa’uund nen o ɓox-a-koƥ soo xirtooxaa nen a ba ake.

⁹Uut le ten waagee wod. Kaa xay boo Yudaa, a daaw tokand ke Yeerusaleem, me xeet es a genna.

¹⁰Ba nu yegnitin kam Gaat, teeru fee no fañ in! Ba nu lool muk. Nuun we ngenna Bet-Le’afra[2], mbirkilooxyo kam fo ut ole.

¹¹Nuun we ngenna Safiir, ndetyo gilaa saax, yoq cer ƥor, sed ɓot! We ngenna Sanaan saɗatee sutoox teeru fee den. Ƭomatax no we Bet-Ha’esel a lalta yee nu mbaagatee o njaɓnook maaga.

¹²We ngenna Marot kaa tayaa ƥutnoox, feek taamaala fee o Yaal oxe a hebliidna a daawa tokand ke Yeerusaleem.

¹³Nuun we ngenna Lakiis, nguminyo pis ke na sareet-xire ke, yaam nu mbakaadnoora a Siyoŋ o ndoog onqe, siiknoor ne Isra’el a faqaqoor me nuun.

¹⁴Nuun wiin we Yudaa, cooxyo teeru fee Moreset-Gaat njogol! Pind ke Aksib xan a tas yaakaar no maad we Isra’el.

¹⁵Nuun we ngenna Maresa, xam ɓisaniid a nuun oxaa na jaɓkaa saax nuun. We ndeeƭna qaaƴoor ke Isra’el xan a ƭasik taa no luf naa Adulaam.

¹⁶Nuun we ngenna Yeerusaleem, nduusooxyo, mboy wiil nuun, naqadiloox yaam xa ƥiy axe nuun nu mbexna mbex! Meelinyo a qoox nuun nen a tud, yaam xan xa ƥiy nuun a ƥisel gilaa saax took o hup doole, maa goƭna a nuun.