Read NQAARIIT NE ROOG Mise 3 Bible Online

Mise 3 - NQAARIIT NE ROOG bible

Mise 3

¹Maaga, layaam ee: Nuun kelfa ke na xa taan axe Yakoob, nuun gelwaar we no mbind Isra’el, nan-gilooxyo! Mee ndax nuun mbaru and ke jofna!

²Kaa koy, kaa nu sib paax ke, soo mbex paaxeer. Kaa nu ƭoltaa ƭool no kiin, listit cer ke na xa kiiƈ axe.

³Kaa da listaa cer ke na xeet es, a ƭoltaa ƭool um soo a nduguñaa xa kiiƈ um. Kaa ƭegan teɓ-reɓ nen kaa na jaweel na kaleera, nen a tegeƴ kam o xuɗoox.

⁴Ten taxu, yaa da ƈufginooxkaa o Yaal oxe, jaaɓkee a den, ndaa xan a ɗasin a den mukit um, yaam kaa da mbi paaxeer.

⁵Keeke o Yaal oxe a layu no duleer we na mo’andaa xeet es: «Kaa yegnitaa jam, yaa a ñiiñ den a njegna kaa da ƈaxna, we loginkeerna a den tig, da yegin a den xire.

⁶‹Ten taxu, nuun duleer we, xan nu ndef no yeng, too nu mbeeñooxkataand! Xan nu ndef no niɓaan, too nu ƭeetkatee!› Xan njeeƈ ne no duleer weene a mud, ñaal den a ref o niɓaan.»

⁷Maɗag we xan a sed, ɗeet we a seeƈaar. Den fop xan a lupandoox, yaam Roog jaaɓkatee a den.

⁸Mi o mat, kaam may fa doole, may fo Yiif le no Yaal oxe, may fo o cofel fo njambaar, ndax um andnoor a Yakoob tooñ um, feedin a Isra’el pakaad um.

⁹Nuun kelfa ke no mbind Yakoob, nuun gelwaar we no mbind Isra’el, nan-gilooxyo kene: Kaa nu sib o cofel ole, ƭapaa fop ke refna a ƭat.

¹⁰Kaa nu maxtaa a Siyoŋ po’oy, tabaxit a Yeerusaleem njofaƭar.

¹¹Haahate we den kaa ngate’aa took nger, saasadax we den a njangnaa took ndabid, duleer we den a yegnitaa padafuleer, ndax da njeg xaaliis too a saɗa o ngeƈnoox no Yaal oxe, a lay ee: «O Yaal oxe xey a ndeer in! Paaxeer leng dalkee a in!»

¹²Ten taxu xan Siyoŋ a guurel, a refat o qol yaam nuun, Yeerusaleem a refat juum kefatin, soo o joong ole no Mbind Roog ne a refat ñaang laa muurooxna fo suungaan.