Read NQAARIIT NE ROOG Mise 4 Bible Online

Mise 4 - NQAARIIT NE ROOG bible

Mise 4

¹Xan a jeg camaane kaa, o joong ole no Mbind ne no Yaal oxe a garitkaa xa coong axe fop took, a yooroox a ñaang ake fop, too qeet ke xan a njagin teen.

²Qeet mayu xan a inoox, a lay ee: «Ngaryo i ŋaay no joong ole no Yaal oxe, no Mbind ne na Roog fee Yakoob, ndax ta jangin a in a ƭat um, soo i ñaaƴ na qal um, yaam a cangin a tiindigil ale Siyoŋ a inooraa, fa lay fee no Yaal oxe a hatiidaa Yeerusaleem.»

³Xan a ref o ƭeeɗeg hate ndeer qeet mayu, a ref o qaaxaf no qeet cegu doole kaa ngoƭna. Xan a nqawin no laƥ ke den xa koŋko, soo na salma ke den, da njalin teen xa taaba. Saax leng inooxankatee saax gend um, too xire aqatooxkataand.

⁴A koom, oxuu refna xan a yongaa na jam ɗuga ndaxar biiñ um fo ɗuga ndun um, too o leng jom’andkatee a den. Keene no don no Yaal oxe Hupna fop a hatu.

⁵Ke qeet ke fop a ñaaƴaa ñaaƴ no gon roog den fop oo, in o mat kaa i ñaaƴaa no gon no Yaal oxe Roog in ndiiki bo na moos boo moos.

⁶O Yaal oxe kaa tee: «A koom, xam koltirand we na laƴaa, fokatiid we pasarooxna, too um toroxand’u a den.

⁷No we na laƴaa, xam sutit na den yoqatin laa ñufkeerna, no we pasareena, um sutit na den xeet fa njegu doole, too xam maadooxan a den took o joong ole Siyoŋ, mi o Yaal oxe, no kaa xotitna a koom boo kili.

⁸Wo ñaang le Siyoŋ na yetooxaa xeet fee nen taax-took yetooxand, xan o jegatin sañ-sañ fee wo yaaga. Yeerusaleem xan a refatin teeru fa maak fee no maat ne.»

⁹Ndiiki koy, xar taxu o jibnaa xa paɗax? Xar taxu o ɗomeel nen o tew oxaa na gaajooxaa? Ndax ne jegateeroona o maad soo ñak aa-as we wo taxun?

¹⁰Wo Siyoŋ, o ndoog onqe, coono’i too iin nen o tew oxaa na gaajooxaa, yaam ndiiki kañ xan o sutoox teeru fee, dalaa na koƥ ale. Xan o ret boo Babilon, ndaa koy, maaga o muclitkeel. Maaga mat o Yaal oxe a watitkang na xa ƥay no fañ of.

¹¹Ndiiki sax qeet mayu a mbokatooranaang, a ndamtin ee: «Fat i ngef a Siyoŋ, a kid in a mbuudaa yaq fee ten!»

¹²Kaa koy, andee a qalaat no Yaal oxe, yuuƥ ke ten a kunpa a den. Andee yee kaa o Yaal oxe a fokat a den nen a kusax no cukand.

¹³«Wo Siyoŋ, o ndoog onqe, inooxi, sug[3] a den. Xam fi xa can of a ndef njelem, xa poxos of a ndef xanjar. Xan o duguñ qeet mayu soo kesan o Yaal oxe ke da njaɓna, halal den, o geekanin o Yaal oxe jegna lanq ke fop.»

¹⁴Ndiiki koy, wo teeru fee soosong we a ƥiikilna, fokati a yaj ake wo! I mbide o kurul-keƥ, too o ƭooɗox oxe Isra’el a fade o loq no ɗek.