Read NQAARIIT NE ROOG Mise 6 Bible Online

Mise 6 - NQAARIIT NE ROOG bible

Mise 6

¹Nan-gilooxyo ke o Yaal oxe a layiidaa! O Yaal oxe, inooxi layoorel mbaambir xa coong axe, too fat a ñaang ake a nan o ñuxur of!

²Nuun xa coong axe fo a per a saƭku ke no lanq ke, nan-gilooxyo layoor ne no Yaal oxe! O Yaal oxe kaa layooriidaa fa xeet um, a xelooriidaa fa Isra’el.

³O Yaal oxe kaa tee: «Wo xeet es, xar fi’oong? Na xar xijlandtoong? Doonaam!

⁴Mee ndax mi suttong no saax laa Misira, watong no mbaƭ ne reeƭoona soo heblanong a Moyiis fa Aaroon fa Miryam, da adooxanong.

⁵Nuun xeet es, mbetandooxyo ke Balak fee o maad Mowaab a yuuɓan’ina a nuun fo ke Balam fee o ƥiy Bewoor a doon’uuna. Mbetandooxyo ke fi’anuuma a nuun xotitna Sitiim boo Gilgal, ndax nu andid a pi ake muclituuma a nuun, mi o Yaal oxe.»

⁶Fa xar um geenoorkaa mbaambir no Yaal oxe, gungtin mbaambir Roog fee Took-ee-took? Ndax sadax toxel um ɓisiidkan, fo nqeel naa njegna o hiid?

⁷Ndax a suk paal cuni-cuni fo a ƈufnand a pagkatar diwliin o Yaal oxe a bugu? Ndax njofaƭar es xan a tax um ɓoxotit a taaw es, pakaad es a tax um sadaxit o ƥees onqe hatna no laaw es?

⁸Ha’aa! Woxe kiin, andnooree ke faaxna. Ke o Yaal oxe a bugna na wo refu yee o ñaaƴin a ƭat, fadin o mbeq soo ñaaƴaa fa Roog of kam a neewandax.

⁹O Yaal oxe kaa falalooxaa a Yeerusaleem. O saɗar gon um o jeg-yiif oo. «Nan-gilooxyo, nuun a carind ale Yudaa, nuun fop we na mbokatooriidaa kam teeru fee!

¹⁰Mee ndax a maada jegaa kam pind ke no soxodu we kalal kaa da njegitna na ƭat a qeleer fo eedir paaxeer kaa sibuuma.

¹¹Waagiim o muñan oxe na jiriiñooraa balaas fa mbaaxeer fo xe jegna a poox a paaxeer kam nafa um?

¹²Wo Yeerusaleem, yaal kalal ke wo wiin fo’oy a ndefu, we ngenna me wo a layaa xa maaƥ xa ƥor, ɗelem den a ref naanaxir.

¹³Ten taxu, refaam no xawaa a nuun, fiitin a nuun yaam pakaad nuun.

¹⁴Xan nu ñaamaa, too nu ngiñkee, biim le a gen fa nuun. Xan nu yaxandoox, ndaa maadkee o feet, too a jegangaa kaa nu ƭanginna teen sax oo, xan xire fee a yaqin.

¹⁵Xan nu nduuf, ndaa nu saxadkiran, xan nu nol xa tim taxar oliiw, ndaa nu ƭuumooxkee teen. Xan nu nir tuunq xa biiñ, ndaa nu yerkee biiñ fee.

¹⁶Kaa nu ndeefaa o jaf Omri, laalaa a pesoorooƭ ake Ahab fee o ƥeem fo xa taan um fop, ndeefaa xa as den. Ten taxu xam ɓoxot teeru fee nuun, ta gefel, soo nuun we ngenna teen, um fi a nuun calat. Xan nu nqeefel a ndeer qeet ke fop.»