Read NQAARIIT NE ROOG Mise 7 Bible Online

Mise 7 - NQAARIIT NE ROOG bible

Mise 7

¹Sabab took es, yaam kaam nand fo xaa na giskaa xa tim, nen oxaa na gisaatooxaa xa biiñ cinj a ƥoor ale. Nduunq leng naa ñaameena jegatee, ne’atiim o run o leng olaa yaawuuma.

²O kiin jam oxe a mooca no saax le, o cofu jegatee a ndeer no wiin we. Wiin we fop kaa ƥeng, ndax da ƥax fo’oy, oxuu refna a fogaa o kend um.

³Xa ƥay den kaa mbaane no fi paaxeer, o kelwaar oxe a sertaa nger, o kaahate xe a laacaa ndabid, soo wiin maak we a laltaa o wat den, den fop da yekoorin.

⁴Oxe moƴna faax na den kaa nand nen nqooc, oxe da mbi’na o cofu a moƴ o weel ngiƈ ngol. Ñaal ne na qaw ale nuun, yeeyetax we duleer we nuun a yegnitna, a fadiida, too me ta refna, nuun wey no jaq.

⁵Ba o hooloox o kend of, too ba o gaɗ a xoox of na xaariit of. Maari o don of mbaambir no teef oxe fexoona sax,

⁶yaam o ƥiy o ngoor onqe kaa xeefaa a faap um, o ƥiy o ndew onqe a siiknoor fa ya um, o tew o tolooxiidu xe a inooxan o seemir um o tew, soo fañ no kiin a ndef wiin mbind um.

⁷Mi o mat, no Yaal oxe ɗagum yaakaar es, cungaa a Roog fee na muclaxam. Roog es xan a jaaɓaam.

⁸Nuun fañ in, ba nu mbelakinoox na in! I yenangaa sax oo, xan i inooxatin. I ndefangaa kam o niɓaan ole, xan o Yaal oxe a meleƈin a qoolaand um took in.

⁹Feek kaa i mbakaad no Yaal oxe, xan i ngadoox fuux le ten, boo yaa ta layoorankaa a in soo a ɓoxot a in ɓur. Xan a ɓek a in na qoolaand ale, too xan i nga ee xan a mucil a in.

¹⁰Xan fañ in a nga’in soo a may fa gaci, den we layoogna a in ee: «Taa o Yaal oxe Roog nuun?» Maaga, xan i mbuudaa a den, da nduuteel nen lopopooƈ le no ped ke.

¹¹Ñaal ney a garaa naa saŋe ke na teeru fee nuun a maxatinkeel. A koom, xan xa ŋat axe nuun a ƭaayel.

¹²A koom, xan wiin a ngar me nuun, a inoortiid Asuur fo no teeru ke Misira, a xotit Misira boo no xuluɓ olaa Ofrat, ndeer o maag fo o gend um fo ndeer o joong fo o gend um.

¹³A saax akeene xan a ngefel yaam a pi no we ngenna teen.

¹⁴O Yaal oxe, gayti xeet of o loq o gayir ole wo, o siir ole jegoodoona, kesooxna kam lanq maasu ke ndeer a ƭing ake! Fat da suuf kam Basan fo kam Galaad, nen camaane kaa yaaga!

¹⁵Fi’ani a in comlaand, nen a koom alaa suttoona daan in no saax laa Misira!

¹⁶Xan qeet ke a nga’in soo a seeƈaar, ke da njegna doole fop oo. Xan a ndam xa ton, soo nof den a sux.

¹⁷Xan a mbuqaa fo ut ole nen fangool, a ƭooqooxaa a lanq nen ƥood ke. Xan a sutoox saŋe ke den fo diid, a sendaa, yaa da ngaraa me wo, wo o Yaal oxe Roog in. Xan a saɗarong.

¹⁸Ndax a jega Roog faa nandna fa wo? Kaa o waasantaa tooñ ne, too naagiro xawaa njofaƭar ne no we yoqna na xeet of fee jegoodoona. Naagiro damaa fuux of boo kili, yaam kaa o sawar no yirim a in.

¹⁹Xan o yirimahin a in, njofaƭar in, o uupin, pakaad in, o joor a den no duf-ee-duf laa no maag olaa.

²⁰Xan o lal xa taan axe Yakoob ngor of, feeñil we mbaqaqoorna na Abraham o mbeq of, ne daaɓoortanoona fo daan in no camaane kaa yaaga.