Read NQAARIIT NE ROOG Nahum 2 Bible Online

Nahum 2 - NQAARIIT NE ROOG bible

Nahum 2

¹Nga’yo, o tuleer oxey a garaa took xa coong axe, a ɓisiidaa o nan o felu, a yegnitaa jam. Nuun wiin we Yudaa, ndoofandyo qew ke nuun soo mbadin a tegit ake nuun no Yaal oxe, yaam o caree tus oxe dakkatee me nuun. A moocande boo xoo!

²Wo Niniif, o yaayaq oxey a inooxaniidang. Yetooxi saŋe ne! Horooxi a ƭat ale! Fapooxani a ñoq ale, fokat a yaj ake wo fop!

³O Yaal oxe xe dalnatinaa o ndam onqe Yakoob, kaam ee oxe dakniidaa o niwel ole Isra’el, a ƭing taxar biiñ ale jaajangal we a njangal’ina boo a yaq xa par axe ten.

⁴Pegoor ke na salma-koor ake no fañ we kaa yaxig, xir say we a ndokoox daalde. Boo da mbaajanaa a ñoq ale, a sareet-xire ke den kaa meleƈaa nen o jam, soo pis ke a coketaa[2].

⁵A sareet-xire ke kaa mboy kam ped ke, a mam no qel ke. O ga’angaa a den ee xa cam, da ƈuftaa nen xa kiiñaand.

⁶Xir say we na teeru fee owey nqoyeel, ndaa kaa tolofaa, yaa da ñaaƴaa. Soosong we kaa ñofandooxanaa saŋe ke, a sip pegoor den.

⁷Xa ton-maax axe mbarna fo xa quluɓ axe a ndaƈte, soo we no mbind no maad ne a mbiriɓ yaam diid.

⁸Nitaal roog fa ndew fee den a sute, a ɓisel gilaa saax. Jeefeer we ten kaa iinaa nen a nuukuur soo a ndiqooxaa no kang.

⁹Niniif kaa nand nen mband ngefu naa may’ina fo foofi, ndaa ndiiki koy poofi ke owe mbalwalnaa. Ngeenooxyo! Cungyo! Kaa koy, o leng nomtooxiidee.

¹⁰Lukityo xaaliis fee, mbuf wurus fee! Halal fa mbagkatar fey, tig cegu njiriiñ key gañ!

¹¹Fop kaa jangalel, a jangel soo a raadnel! Njambaar ne kaa ɓutaa, kuɓay ke a leeƈoox, tet ke fop a cuƥtoox, fop a mboor a kid.

¹²Mam nqanq ne no cogoy ke a refatu, nqawlooxand ne no cogoy canglax ke, me njogoy ngoor ne fo ƥasil ne fo o njogoy o njanglax onqe a mbidoogna, too jeg’ee o leng oxaa fiiqilna a den?

¹³Njogoy ne kaa listanoogu xa ƥeem, a waranaa cogoy ƥasil ke ten. Kaa mayƭandoogu nqanq ne ten fo tame-dame, ngenand ne ten, ta yipin a tegeƴ a ƥor.

¹⁴O Yaal oxe Hupna fop kaa tee: «Wo Niniif, xam dal took of, dox riw a sareet-xire ke wo, laƥ a ñaam cogoy canglax ke wo. Xam xuuf took lanq ke njangal of, too o ñuxur no lulaaƥe we wo nankataand.»