Read NQAARIIT NE ROOG Nahum 3 Bible Online

Nahum 3 - NQAARIIT NE ROOG bible

Nahum 3

¹Sabab took teeru fa yednu fee, mayna fo naanaxir, a naag gañ fo cangale, too tame-dame um njegee hap!

²Xa qiir axe we nannooxaa, a saang ake na sareet-xire ke a ndiiraa, pis ke a njaabaa, a sareet-xire ke a mboolaa.

³Pis ŋaaye ke owe mbaaslooxaa, laƥ ke a telelaa, a salma ke a meleƈaa. Wiin gaañooxu wey gañ, xa tal axe a mbi a cuum, xon we a naang xus, a kamaseel.

⁴Keene fop njaga ƭomu ne Niniif gartun, ten fee yaawnooxna, a waane no pan ne ten. Kaa jikooxoogu a saax ake njaga ne ten, qeet ke, ta dam a den mbaƭ fo pan ne ten.

⁵O Yaal oxe Hupna fop kaa tee: «Wo Niniif, xam dal took of, yoɗ xa lifar axe no ndoki of boo na mukit of, lal qeet ke cer ƥor of, gaci’andong na kid no maat ke.

⁶Xam ɓax ndoƭ took of, sedlandong soo fi’ong yidel.

⁷Fop we na nga’kang xan a ngoƭong, a ndamtin ee: ‹Niniif a yaqe pic! Ndi an na moofkaa, a ɗomatooxan?› Mi itam, mam um waaƭanitkang yaayaal?»

⁸Wo Niniif, ndax wo moƴu teeru fee Teeb[3], fee reeƭna ndeer o xuluɓ ole Niil, poofi ke a ndeerin, o xuluɓ ole a ref ɓit um, poofi ke a ndef saŋe um?

⁹Kuus fa Misira ndeeƭu doole um, Puut fo Luuluub we a ndef diidimle um.

¹⁰Yaag oo toox de, we ngen’ina teen a ƥise gilaa saax took o hup doole, a ndamel mbaƭ. Xa qeq axe ten kaa nduguñ’el no kooñ ke no ped ke fop. Kelfa ke ten a lasre na pexey mbanjang ne, wiin maak we ten fop a njengel.

¹¹Wo itam xan o way nep, gulum. Wo itam xan o waaƭ maa jaɓnookoona, ndax o daɗ o pañ oxe.

¹²Saŋe ke wo fop kaa nand nen tun kaa saqna xa tun xa poorateel. Oxe bugna ñaam a den a yo’nangaa ndaxar ne rek, da yen kam o don um.

¹³Njambaar ne no xiixire we wo kaa ɓutat. Begax ke no saax of a mbetooxana ŋam fañ we wo, fiɗel le a raaɓ a kinglir ake wo.

¹⁴Wo Niniif, ƴeewi foofi boo fañ we mbidang o kurul-keƥ, saƭkand saŋe ke wo! Roki kam ɗok le, duutin, ref no muulaa!

¹⁵Yaqanee koy, xan fiɗel a raaɓong, laƥ a moocandong, a ñaamong nen tooroog kaa na nduudnaa. We ngenna me wo kaa mayit’u nen muƈ tooroog.

¹⁶Jula we wo kaa moƴ’u o may xa qoor axe na asamaan, ndaa ndefatee meen, nen tooroog kaa letinna a nafir den, a yet fir.

¹⁷Gelwaar we wo kaa nand nen soƈ, kelfa ke wo a nand nen muƈ tooroog kaa ndongna na xa ƭiiɗing yaa fo a ƥuuɓ. Njeeƈ ne xaa aayaa rek, da yet, too o leng andkee me da nqotna.

¹⁸Wo o maad oxe Asuur, ɗooɗox we wo owe ƭaanaa o ƭaan o yokukaand, xir say we wo a naang faq, xeet of a pasaroox took xa coong axe, too jegee o leng oxaa fokatna a den.

¹⁹Yaq fee wo waagaand tig, uut le wo waagee o wod. Fop we na nankaa ke daloonga xan a mboxanaa o njakad onqe wo, yaam an daaweeru no kañaan ne wo jegeerna ngakand?