Read NQAARIIT NE ROOG Habakuk 3 Bible Online

Habakuk 3 - NQAARIIT NE ROOG bible

Habakuk 3

¹Kene refu a qeƭ ale no tuleer Habakuk, na gimteel nen a kim a ƭomatax:

²O Yaal oxe, nanaam gon of a layteel. O Yaal oxe, kaam jeg caƭar mbaambir a pi of. Fadni a den no ñoow in, ga’noor a in a den na xa kiid in! Kaa rek kam fuux le wo, wetandooxi o paaxel of.

³Roog oxe inoortiidaa Temaan, o Tedu xe xe inoortiidaa no joong olaa Paaraan. A maaf O magnel um kaa muur a asamaan, lanq ke fop a simatan.

⁴Oxe garaa, a meleƈaa fo a qoolaand, a caf njeeƈ a inooraa no ɓay um, me doole um a laqooxna.

⁵Piste adooxanun, jir faaxeer a reefanin.

⁶A geenooxangaa, lanq ke a yo’noox, ta ɗeet, qeet ke a sendaa. Xa coong xa miñu xe kaa ngirdooxaa, a ñaang ake ndefna, yaa maam a ɗisaa a kid, a sooy, den we ndeeƭna a ƭat ale ta reefoogna yaaga.

⁷Kaam ga we no ƭiif ke Kusan a ndiid, we no ƭiif ke Majan a sendaa.

⁸O Yaal oxe, ndax xa quluɓ axe fuuxano? Kaam ee ndax xa quluɓ axe fuux le wo a biltooxanu? Ndax o maag ole fuux ɗomu le wo a yoɗooxanu boo a tax o ŋaay pis ke wo, ƴufnaa a sareet-xire ke no ndam onqe wo?

⁹Xotaa a qali le wo, mayƭand a tungaar ale fo a kas. A maaf Kaa o qaacaa lanq ke, xa quluɓ axe a naang gañ.

¹⁰Xa coong axe waa nga’ang rek, a sendaa, mbuyaam a deɓiid, juwaam fee a fangnaa o ñuxur um, a yoɗ a yag-ee-yag ake ten took,

¹¹njeeƈ ne fo o nqool onqe a yoq no ngenand den mbaambir a qoolaand ale na kas ake wo na mbaaslooxaa, no meleƈ le na salma le wo na miric-miricnaa.

¹²Kam fuux of kaa o duutaa lanq ke, kam ngañak of o sug qeet ke.

¹³Kaa o sutoox ndax o mucil xeet of, ƴufig oxe ɗuumoona. Kaa o duguñaa kelfa fee no soxodu we, yaqit mbind um a lanq boo took. A maaf

¹⁴Kaa o yultaa xoox no kelfa ke no fañ we a kas ake den, yaa da mbadtiidaa nen a und, ndax da pasar a in, a njibnaa xa soroxole, a mbug o lisit o toroxu xe na pet.

¹⁵Woxe xaañaa o maag ole fo pis ke wo, poofi cegu doole ke a njiqtooxaa.

¹⁶Nanaam yo’in leene, soo kam es a jaxasoox, muuceek es a ndaprapnaa, cer es a ŋeesoox, um sendaa ne fodeema fop. Yaqanee koy, um cungaa ñaal ne na naqad fee, ñaal neene na betkaa xeet fee na toroxandaa a in.

¹⁷Ndun ne fiɗkatee, ndaxar biiñ ne rimkatee tus, xa tim ndaxar oliiw a ñak, xa qol axe mbatkatee ñaamel, paal ke fo pambe ke a mooc na ked ake, too naak njegkatee na xa siir axe.

¹⁸Mi o mat, kaam felakinooxaa no Yaal oxe, ɗaay na Roog fee na mucilkaxam.

¹⁹O Yaal oxe na refkaa boo faw refu doole es. Ten na saƭkandaa a caf es boo da nand fo ake no njaf ne, soo a ñaaƴnooraxam no fo mbiñ fo ngoƭu took ne. O yaal a ƭat ale no jeejeek we a xoolne yee a kim aleene kaa yoonandteel o nqilimb.