Read NQAARIIT NE ROOG Age 1 Bible Online

Age 1 - NQAARIIT NE ROOG bible

Age 1

¹No hiid o ɗikandeer olaa no maat Daryus fee o maad Persi, no ñaal eetaand ne no nqool ɓetuu fa lengandeer onqe, o Yaal oxe a daawna a Serubabel fee o ƥiy Se’alti’el too a ref gofornoor Yudaa fa Yosuwe fee o ƥiy Yosadak refna o saasadax o maak oxe fa lay um, a reefandin no tuleer Age yee:

²O Yaal oxe Hupna fop kaa tee: «Xeet fene kaa layaa yee waxtu fee Mbind Roog ne a wareena o maxatin fadafulee.»

³Maaga, o Yaal oxe a laya a den a reefandin no tuleer Age yee:

⁴«Nam boog nu mbaagu o ngenit no pind kaa ñiingeena, too Mbind es neeke a yaqoox?

⁵Ndiiki koy, mi o Yaal oxe Hupna fop kaam ee: Ƭeetaqinyo a paax ke daawna a nuun!

⁶Kaa nu nduufaa mayu, ndaa o ndik rek nu saxadaa. Kaa nu ñaamaa, ndaa nu ngiñkee, yeraa too nu nqeƴkee, ndokooxaa, ndaa taxkee a cogoñ nuun a wat, soo ndabid no caajal oxe a kasaara’ooxaa, nen yaa ta reeƭna kam nafa yulu.

⁷Mi o Yaal oxe Hupna fop mexe layahinan a nuun ee: Ƭeetaqinyo a paax ke daawna a nuun!

⁸Ŋaayyo na xa coong axe, ƥisiid a teex too max Mbind ne. Yaaga xam jeg teen o ɗaay, mayƭandin fo o ndam es. Mi o Yaal oxe layun.

⁹Kaa nu yaakaaroogu mayu, ndaa o ndik rek nu ndaawu, ngeeraa saxade nuun, soo um wuuɗ took um. Mi o Yaal oxe Hupna fop kaam laamtaa a nuun ee: Xar garu fo keene? Mbind ne mi yaqooxna, soo oxuu refna na nuun a ƴufanaa mbind um, garu fo ten.

¹⁰Ten taxu asamaan fee a fañat o deɓan a nuun, soo lanq ke a mbañat o mbat tig.

¹¹Kaam yooriid o feñ kam saax le, took xa coong axe fo na xa qol bele xe na ƭing taxar biiñ ake fo na ƭing taxar oliiw ake fo no lakas ke na xooxeel took lanq ke fop, too wiin we fo cegel ke a yegaan, jale na xa ƥay axe a kasaara’oox.»

¹²Serubabel fee o ƥiy Se’alti’el fa Yosuwe fee o ƥiy Yosadak too a ref o saasadax o maak oxe fo we yoqna na xeet fee fop a nanana fa lay fee no Yaal oxe Roog den, o tuleer Age a daawin’ina a den, ne o Yaal oxe Roog den a heblit’uuna o ten. Maaga, xeet fee a ndalfooxa o njeg caƭar no Yaal oxe.

¹³Cinj kaaga, Age fee o tuleer no Yaal oxe a layanaan xeet fee yee: «Mexey fa nuun. Mi o Yaal oxe layun.»

¹⁴Maaga, o Yaal oxe a jaflaxnoora a Serubabel fee o ƥiy Se’alti’el too a ref gofornoor Yudaa, fa Yosuwe fee o ƥiy Yosadak refna o saasadax o maak oxe, fo we yoqna na xeet fee fop, boo da ngar a ndef no maxatinaa Mbind ne no Yaal oxe Roog den fee Hupna fop.

¹⁵Keene oxe xewa no ñaal qarɓeen ƭik fo ñaal nahkandeer naa no nqool ɓetuu fa lengandeer onqe no hiid o ɗikandeer ole no maat Daryus.