Read NQAARIIT NE ROOG Age 2 Bible Online

Age 2 - NQAARIIT NE ROOG bible

Age 2

¹No ñaal qarɓeen ƭik fo ñaal lengandeer ne no nqool ɓetuu ƭikandeer onqe no hiid olaaga, o Yaal oxe a daawna o tuleer Age fa lay um na xa ƭelem axene:

²«Layi a Serubabel fee o ƥiy Se’alti’el too a ref gofornoor Yudaa, fa Yosuwe fee o ƥiy Yosadak refna o saasadax o maak oxe fo we yoqna na xeet fee yee:

³‹Ndax a maada jegaa a ndeer nuun oxaa ga’’ina ne Mbind nene a mosit’ina yaaga? Ndiiki koy, nam nu nga’tatun? Ndax nandee a nuun nen tus?

⁴Ten taxu mi o Yaal oxe mexe layaa a nuun ee: Ndiiki koy, wo Serubabel, saƭakinooxi, wo Yosuwe fee o ƥiy Yosadak, refna o saasadax o maak oxe, saƭakinooxi, nuun xeet fee no saax le fop, saƭakinooxyo! Ndopyo calel, yaam mexey fa nuun. Mi o Yaal oxe Hupna fop layun.

⁵Regaam a nuun keene, ye nu sutoorna Misira. Yiif es oxey a ndeer nuun. Ba nu saɗar boog!

⁶Te paam o ndik rek, xam yo’in asamaan fee fo lanq ke, o maag ole fa jeeri fee. Mi o Yaal oxe Hupna fop layun.

⁷Xam noot qeet ke fop, kalal ke den fop a ngariid no Mbind nene, um mayƭandin fo o ndam. Mi o Yaal oxe Hupna fop layun.

⁸Mi jegu xaaliis fee fa wurus fee fop. Mi o Yaal oxe Hupna fop layun.

⁹O ndam onqe no Mbind mbaktu nene na moƴkaa o magin onqe no Mbind eetaand ne. Mi o Yaal oxe Hupna fop layun. No mbiñ onqene um ci’titkaa a nuun jam fee. Mi o Yaal oxe Hupna fop layun.»

¹⁰No ñaal qarɓeen ƭik fo ñaal nahkandeer ne no nqool ɓetuu nahkandeer onqe no hiid o ɗikandeer ole no maat Daryus, o Yaal oxe a daawna o tuleer Age fa lay um na xa ƭelem axene:

¹¹«Mi o Yaal oxe Hupna fop, keeke layum: Laamti saasadax we da nqooldandong no kaa farna no keeke:

¹²A soƥangaa yee kaa o kiin a saq a tegeƴ akaa kesaneena a Roog no noflax sabadoor um, soo sabadoor ne a duq mbuuru mbaat o rox mbaat biiñ mbaat diwliin mbaat ñaamel lakas kuu ta waagna ref, ndax xan keene duqeena a ted?» Saasadax we a ndoona yee: «Ha’aa!»

¹³Maaga, Age a laamta a den ee: «A soƥangaa koy ee o kiin oxaa xoolaƭarna, yaam a duq o dal kaa duq leng no keene, ndax xan a xoolaƭar?» Saasadax we a ndoona yee: «Ii, xan a xoolaƭar.»

¹⁴Maaga, Age a janga fa lay faa yee: «O Yaal oxe kaa tee: ‹Neene xeet feeke a nandu, kaam ee neene xeet feeke a nandu mbaambir es, neene jale na xa ƥay den a nandu. Ke da ƥoxotaxam kaa xoolaƭar.› »

¹⁵O Yaal oxe kaa tee: «Ngorooxyo boog a paax ke na xewkaa no ke xotitna xaye. Yaaga nu mbokatafulee a ƥil ndax nu maxatin Mbind ne mi,

¹⁶xar daloogu a nuun? Maaga, o qol ole war’ina o wat a kusax qarɓeen ƭik, xarɓaxay soom a watoogu. A ƭing taxar biiñ ale war’ina o sut xa peeƭ qarɓeen ƥetik, qarɓeen ƭik soom na ngatataa teen.

¹⁷Xawtaam a nuun xa ƥuus fo xa qomb fo a kalam a ƥuuɓu, da yaq jale na xa ƥay nuun fop, ndaa dara teen taxee nu naang cook, nomtooxiid me mi. Mi o Yaal oxe layun.

¹⁸Ngorooxyo a paax ke na xewkaa no ke xotitna xaye refna ñaal qarɓeen ƭik fo ñaal nahkandeer ne no nqool ɓetuu nahkandeer onqe, no ke xotitna na waxtu fee Mbind ne no Yaal oxe a sinjeena. Ngorooxeenoo a paax!

¹⁹Ndax ax a maada njegaa kam tap ke? Ndaxar biiñ ne sax fo ndun ne fo ndaxar goronaad ne fo ndaxar oliiw ne mbatee tus. Kaa koy, no ke xotitna xaye xam fudin barke es took nuun.»

²⁰No ñaal leng kut ne no nqool o leng kut onqe, o Yaal oxe a daawnahina a Age fa lay um na xa ƭelem axene:

²¹«Layi a Serubabel fee refna gofornoor Yudaa yee: ‹Xam yo’in asamaan fee fo lanq ke.

²²Xam jiƭit a uum ake no maad we, yaq doole fee no maat ke na adna fee. Xam jiƭit a sareet-xire ke fo ŋaaŋaay den, pis ke xan a yen, ŋaaŋaay den a mbarrit laƥ.

²³Mi o Yaal oxe Hupna fop kaam ee: A koom, wo Serubabel fee o ƥiy Se’alti’el, wo fee o tag es, xam xotong soo fi’ong o heɗ o ñaasir es, yaam wo jilum. Mi o Yaal oxe Hupna fop layun.› »