Read NQAARIIT NE ROOG Sakari 1 Bible Online

Sakari 1 - NQAARIIT NE ROOG bible

Sakari 1

¹No nqool o ɓetuu ndadkandeer onqe no hiid o ɗikandeer ole no maat Daryus fee o maad Persi, o Yaal oxe a daawna o tuleer Sakari fee o ƥiy Berekiya too a ref o ndaan Ido fa lay um na xa ƭelem axeeke:

²«Mi o Yaal oxe fuuxan’aam daan nuun tigi.

³Ndiiki koy, fat o lay Ii-isra’el we yee: ‹Nomtooxiidyo me mi, too xam nomtooxiid me nuun. Mi o Yaal oxe Hupna fop layun.

⁴Ba nu nand fo daan nuun we duleer eetaand we a layoogna yee: Keeke o Yaal oxe Hupna fop a layu: Mbesyo a cinj a ƭat a paaxeer ake nuun, mbaas a pesoorooƭ nuun a paaxeer! Kaa koy, nan-gilooxee, too a ƭat den yongee na mi. Mi o Yaal oxe layun.›

⁵Taa daan we nuun? Ndax duleer we a maada ñoowaa boo fa ndiik?

⁶Ndax fa lay fee fo bargal ke coox’uuma duleer we dag es mbadnooxee took daan we nuun? A nomtooxiida me mi too a lay ee: ‹O Yaal oxe Hupna fop a fesoorta fa in ne ta hebooxit’uuna o fi, ta jagir fo a pesoorooƭ in fo a pi in.› »

⁷No ñaal qarɓeen ƭik fo ñaal nahkandeer ne no nqool xarɓaxay fo o nqool o lengandeer onqe refna o nqool Sebat, no hiid o ɗikandeer ole no maat Daryus, o Yaal oxe a daawna o tuleer Sakari fee o ƥiy Berekiya, too a ref o ndaan Ido, fa lay um na xa ƭelem axeeke:

⁸Kam o yeng ole, daawaam mbeeñil nene: Ga’aam o koor oxaa ŋaayna pis jakeer soo a geenoox a ndeer pafid mirti[1] kam a yulanq, too a jeg’a a cinj um pis jakeer fo oldu fo bari.

⁹Maaga, laamtaam ee: «O yaal es, aniin a ndefu?» Malaaka fee layoogna fa mi a doonaxam ee: «Xam lalong we da ndefna.»

¹⁰O koor oxe geenoox’ina a ndeer pafid mirti ke a doona teen ee: «Den ndefu we o Yaal oxe a lulna da mbid lanq ke.»

¹¹Maaga, ŋaaŋaay pis we a laya fa malaaka fee geenoox’ina a ndeer pafid mirti ke, a njangtooxin ee: «I mbida lanq ke, too i nga’a yee fop owey na jam fo no yaadax.»

¹²Maaga, malaaka fee no Yaal oxe a laya yee: «O Yaal oxe Hupna fop, xa kiid qarɓeen ɓetuu ƭik axey axaa fuuxanoona a Yeerusaleem fo teeru lakas ke Yudaa. Ndi neeke o fañkaa o yirim a den boo a mban?»

¹³Maaga, o Yaal oxe a yaala malaaka fee layoogna fa mi fo fa lay fa mbelu.

¹⁴Malaaka fee layoogna fa mi a layaxam ee: «Yegniti yee: Keeke o Yaal oxe Hupna fop a layu: ‹Kaam jeg na Yeerusaleem o mbeq o maak, naalaa a Siyoŋ,

¹⁵too fuuxanaam tigi qeet ke njegna ne mbugna, yaam o ndik rek fuux’um, ndaa o hupal den taxu boo taamaala fee a fod neeke.

¹⁶Ten taxu mi o Yaal oxe kaam ee: Mexey nomtooxiidaa Yeerusaleem fa yirmande. Xan Mbind es a maxel teen, soo o ƥaak o liiƥir ole a letnel took Yeerusaleem, ta maxatinel. Mi o Yaal oxe Hupna fop layun.»

¹⁷Cinj kaaga, malaaka fee a laamtaxam um yegnitahin kene: «Keeke o Yaal oxe Hupna fop a layu: ‹Teeru ke mi xan a mbalahin fo paax ƥor, too mi o Yaal oxe xam yaalahin a Siyoŋ, jilahin a Yeerusaleem.› »