Read NQAARIIT NE ROOG Sakari 10 Bible Online

Sakari 10 - NQAARIIT NE ROOG bible

Sakari 10

¹Boo a sarandam a fadiidna, nqeɗyo o Yaal oxe a teƥ, too yaaga xan a hiiñ. Xan a deɓan a nuun boo a qaandiind ake a ndaxraa, oxuu refna, ta saxin o qol um.

²Mayu kaa ndiisaa soxla den pangool fo fan, weene a maaɓaa a den, a ndegaa a den cegeer, lakas we a yaakaar xa ƭaaɗ, too yaaloor o ƭaaɗ a ref o huloox o quusi. Keene mat taxu da njoqooyooxaa, a ngalakoox nen ged laa jegeerna o kaynaak.

³O Yaal oxe kaa tee: «Fuuxanaam gaynaak we, too xam dal took a suk a tuudu ke. Mi o Yaal oxe Hupna fop, xam ƴufgiid ged le mi refna mbind Yudaa, fi’in nen naar-ngoor es na xire fee.

⁴Na Yudaa ɓil faraaj le a hatkaa, no ten o reng ole a sutoorkaa. Kaam ee no ten a qali qire’ir ale a hatkaa, aa-adax we fop a sutoor no ten.

⁵Goor we Yudaa xan a nqire’taa nen a salma-koor, a nduutaa fañ den nen lopopooƈ le no ped ke. Neene a maafitkaa, yaam mi o Yaal oxe mexey a ndeer den, too sax we na ŋaaykaa pis, a nqetik fa den, gaci soom a nqotitkaa teen.

⁶Xam saƭkand mbind Yudaa, mbind Yoseef, um watin, nomtiid a den no saax den, yaam xam yirim a den. Xan a ndefat nen waa moseeruuma o deɓ yaam mi refu o Yaal oxe Roog den too xam jaɓ a qeƭ den.

⁷Wiin we Efrayim a salma-koor a ndefkaa. Xan a ƭaay na qeeñ den nen waa yerna biiñ. Xa ƥiy den xan a nga o ndam onqeene, soo a mbelakinoox den itam yaam ke o Yaal oxe a fi’anna a den.

⁸Xam wuuƴ a den, fokat a den, yaam xam wat a den, too xan a siwit ne da siwtoogna yaaga.

⁹Pasaraam a den a ndeer qeet ke, ndaa xan a mbetandoortaam na saax a koƭu keene, a ñoowaa, den fo xa ƥiy den, too xan a nomtooxiid.

¹⁰Xam nomtitiid a den no saax laa Misira, korolit a den Asuur, dalnatin a den boo no saax le Galaad, a jof Libaŋ, da siw boo o genand a ɓoowaa a den.

¹¹Xan a njoot o maag naqad ole. Mi o Yaal oxe xam xaw a yaand ake no maag ole, boo qooƭ ke no xuluɓ ole Niil a ŋiis, o nqaaƈ onqe Asuur a ñuf ɗuƭ, maat ne Misira a sooƴ.

¹²Xam fi xeet es a njeg doole, a ñaaƴaa no gon es. Mi o Yaal oxe layun.»