Read NQAARIIT NE ROOG Sakari 14 Bible Online

Sakari 14 - NQAARIIT NE ROOG bible

Sakari 14

¹Wo Yeerusaleem, bes fee no Yaal oxe xe garaa, too a koom, xan o jangalel, kalal ke wo a lasritel a ndeer of.

²O Yaal oxe xan a fokat qeet ke fop, da inooxan a Yeerusaleem. Teeru fee xan a jaɓel, pind ke a mbaltel, rew we a ngignel, genwal fee no wiin we a ƥisel gilaa saax took o hup doole, ndaa we na yoqkaa na den sutkaand teeru fee.

³Maaga, o Yaal oxe xan a gomir fo qeet keene, a xire fa den ne ta mer’uuna fi’taa yaa fa xire.

⁴A koom, xan a dak a caf um took o joong ole no taxar Oliiw ke jasnoorna fa Yeerusaleem te no batand, too o joong ole no taxar Oliiw kaa xan a qaacoox a ndeer, a xotit no batand boo a sip no mudand, a refat a yulanq a maak, soo a seek a leng ale a riƈatoox te no ɓemb-roog o janoon, a seek a lakas ale te no ɓemb-roog o ñamaak.

⁵Xan nu naang futuxtux, ndeef na yulanq ale ndeer xa coong axe, retna boo a damik Asal. Xan nu ƈuf ne daan nuun a ƈufit’ina, yaa lanq kaa a yo’nooxna, a soƥ Usiya a refaa o maad Yudaa. Maaga, o Yaal oxe Roog es xan a gar, a yoon fo tedu we ten fop.

⁶A koom, a qoolandir jegkatee mbaat a ƥuuɓ mbaat galaas.

⁷Bes faaga o Yaal oxe soom andun, too kaa taarkaa o marin. Ñaalkatee, yengkatee, too a yaarangaa sax oo, xan fop ee dañ.

⁸A koom, xan poofi kaa na ñoownaa a sutoor Yeerusaleem, kene a nqot no maag o Xanju laa, kaana no laa Mediterane. Naaga a refitkaa ndiig fo ƈiid.

⁹A koom, o Yaal oxe xan a maadoox took lanq ke fop. Ten soom na bugko faɗooxeel, gon um doŋ a ƴufginooreel.

¹⁰Ke widna a Yeerusaleem fop xan a refat o mbelaac, a xotit Geba no ɓemb-roog o janoon boo Rimon no ɓemb-roog o ñamaak. Kaa koy, Yeerusaleem xan a yoɗel, a ref me ta mosna mos o refaa, a xotit no Ndokand ne Bensame boo no Ndokand ngiid naa, a damik Ndokand ne no kooñ ne, a dalit no Taax-took ne Hananel boo na xa nirir axe no maad oxe.

¹¹Yeerusaleem xan a genel, too yaq ɓeedkatiran, ta ref no woor.

¹²Neeke mat o Yaal oxe a xawitkaa qeet ke na inooxankaa a Yeerusaleem: cer den xan a yastooxaa, too da maad o ñoowaa, a kid den a setooxaa kam a kamb ake den, ɗelem den a fot kam xa ton den.

¹³A koom, o Yaal oxe xan a firɓand a den, da songir, oxuu refna a dal took o kend um.

¹⁴Yudaa xan a sedtik a Yeerusaleem, da njaɓ kalal ke no qeet ke mbidna a den fop, kene wurus, keeke xaaliis boo no toki pagkatar.

¹⁵Xan a qaw a leng kut aleene a dal pis ke fo perkele ke fo keeleemb ke fo xa paam axe, cegel ke na ndefkaa no saŋe ke den fop daal. Ke na dalkaa dal wiin we na dalkaa cegel keene.

¹⁶We yoqna no we songiid’ina a Yeerusaleem xan a ngaraa teen o hiid oo hiid, a mbaɗooxiid o Yaal oxe Hupna fop na bugko maadooxaa Yeerusaleem, a ndoofandaa Xew fee no ƭiif ke.

¹⁷Xeet fuu fañna o ret Yeerusaleem, a faɗook maaga o maad oxe refna o Yaal oxe Hupna fop, a teƥ samkee na xa qol den.

¹⁸Miimisira we a ndetangee Yeerusaleem, a teƥ samkee na xa qol den, ta ref a qaw ale o Yaal oxe a doonkaa qeet ke ndoofandkeerna Xew fee no ƭiif ke.

¹⁹Keene na refkaa a qaw ale no Miimisira we, a ref a qaw na xeet fuu roofandikkeerna Xew fee no ƭiif ke.

²⁰A koom, xan a bindel took xa buyang axe no pis ke yee: «O Yaal oxe a kesane», soo xa quɗoox axe no Mbind Roog ne a tedit nen xa toon xa biisir axe ndefna mbaambir o sadaxand ole.

²¹O xuɗoox oluu refna kam Yudaa fo kam Yeerusaleem, xan a ted no Yaal oxe Hupna fop, too oxuu sadaxitna xan a waag o xot teen, a jawtikin. A koom, o leng jikooxkatee kam Mbind ne no Yaal oxe Hupna fop.