Read NQAARIIT NE ROOG Sakari 2 Bible Online

Sakari 2 - NQAARIIT NE ROOG bible

Sakari 2

¹Yoɗaam a kid es too ga’aam kam mbeeñil xa can xa nahaq.

²Laamtaam a malaaka fee layoogna fa mi yee: «Xa can axene, xar a tektu?» A doonaxam ee: «Den ndefu xa can axe pasarna we ngenna Yudaa fa Isra’el fa Yeerusaleem.»

³Cinj kaaga, o Yaal oxe a lalaxam faal tafax nahuk.

⁴Laamtaam ee: «Xar a mbaaƭiidu?» Maaga, a doonaxam ee: «Feek xa can axe kaa pasar a Yudaa boo o leng yoɗatee xoox, faal tafax weeke koy kaa ngar, ndax da ndiidland a den soo a ngaak xa can axe na saax ake njaƭtanna saax le Yudaa boo a pasar we ngenna teen.»

⁵Yoɗaam a kid es too ga’aam kam mbeeñil o koor oxaa pokooxna o ƥaak o liiƥir.

⁶Laamtaanum ee: «Mam o jofaa?» A doonaxam ee: «Kaam liiƥkaa a Yeerusaleem, ndax um and ne o yaajel um fo o cigdel um a mbodkaa.»

⁷Maaga, malaaka fee layoogna fa mi a ɓera, soo malaaka fa lakas a xetiid fo ten.

⁸A hebla faaga yee: «Ƴufi lay o koor oxe pokooxna o ƥaak o liiƥir ole yee: ‹Yeerusaleem, teeru fa njegee saŋe a refkaa, yaam wiin fagkatar we fo cegel cegee hap ke na ndefkaa a ndeer um.

⁹O Yaal oxe fa xoox um xan a refanin saŋe fiɗel naa widuuna, a ref o ndam um a ndeer um.› »

¹⁰O Yaal oxe kaa tee: «Acayo, acayo! Ƈufityo no saax le no ɓemb-roog o janoon[2], nuun we pasar’uuma na xa saax xa nahaq axe no lanq ke. Mi o Yaal oxe layun.

¹¹Nuun Siisiyoŋ we, ñofyo ƥostoox, sutoox teeru fee Babilon.»

¹²O Yaal oxe Hupna fop lul’axama fa sañ-sañ me no qeet ke njangal’ina a nuun kaa tee: «Oxuu duqna a nuun, a duqa jooƴ a ngid es.»

¹³Xam ɗaayan qeet keene o kurpeeñ, faɗ we den a njangal a den. Maaga xan nu and ee o Yaal oxe Hupna fop lulaxam.

¹⁴O Yaal oxe kaa tee: «Wo Siyoŋ, jibni xa soroxole, felakinoox, yaam mexey garaa, too xam gen me wo. Mi o Yaal oxe layun.»

¹⁵A koom xan qeet mayu a ndamoox no Yaal oxe soo a mbogat na xeet um. Ten fa xoox um xan a gen me nuun, too xan nu and ee o Yaal oxe Hupna fop lulaxam me nuun.

¹⁶O Yaal oxe xan a jeg a Yudaa, ta ref xeet faa ta jegoodna no lanq tedu ke, too xan a jilahin a Yeerusaleem.

¹⁷Fat mbindeef nuu refna a naag cel mbaambir no Yaal oxe, yaam oxe sutooraa no ngenand tedu ne ten.