Read NQAARIIT NE ROOG Sakari 3 Bible Online

Sakari 3 - NQAARIIT NE ROOG bible

Sakari 3

¹Cinj kaaga, o Yaal oxe a feeñlaxam a Yosuwe fee o saasadax o maak oxe, ta geenoox mbaambir malaaka fee no Yaal oxe, too Saytaane a geenoox’a na ñamaak Yosuwe, a jamban.

²Malaaka fee[3] a laya a Saytaane fee o caajamb oxe yee: «Yaasam o Yaal oxe a xasanong, wo Saytaane! Kaam ee yaasam ta xasanong, ten oxe jilna a Yeerusaleem! Ndax Yosuwe feene refee nen o rukit olaa woosteena na fiɗel?»

³Yosuwe kaa geenoox’u mbaambir malaaka fee, a rokoox tikoorik toɗgu.

⁴Malaaka fee a laya we ndeeƭna mbaambir um ee: «Mbolaneenoo tikoorik toɗgu ke.» Cinj kaaga, a laya a Yosuwe yee: «Ga’aano, watnanaaxoong tooñ of, ndax um rokanong tikoorik xew.»

⁵A heblita itam ndax Yosuwe a rokanel no xoox um tañalax nqoolu. Yosuwe a rokane tañalax nqoolu fo tikoorik xew, too malaaka fee no Yaal oxe maaga a geenoox’u.

⁶Cinj kaaga, malaaka fee no Yaal oxe a woorna a Yosuwe kene:

⁷«Keeke o Yaal oxe Hupna fop a layu: ‹O ñaaƴangaa na ƭat es too gay kebil es, wo na ɗoxkaa Mbind es, yetooxaa itam xa maax axe ten, too xam ci’ong o fog no we na ngeenooxaa mene.› »

⁸«Wo Yosuwe fee o saasadax o maak oxe, nan-gilooxi, wo fo saasadax lakas we moofna mbaambir of, yaam kaa nu ndef xa anddiloor ee mexey hebliidaa o tag es, ta ref oxe na xoyeel Dugatin le[4].

⁹Nga’angyo, ɓil le diƈuuma mbaambir Yosuwe oxey. A jega a kid ɓetaa ƭaq akaa ngaanna took ɓil leene refna leng soom. Mi fa xoox es xam bind teen ke wareena o bind. Mi o Yaal oxe Hupna fop layun. No ñaal leng kut, xam watin tooñ ne no saax lene.

¹⁰A koom, xan nu nqurraa ɗuga ndaxar biiñ ne fo ɗuga ndun ne. Mi o Yaal oxe Hupna fop layun.»