Read NQAARIIT NE ROOG Sakari 4 Bible Online

Sakari 4 - NQAARIIT NE ROOG bible

Sakari 4

¹Malaaka fee layoogna fa mi a nomtooxiida soo a yokaam ne o kiin a yokteel no ƭaan um.

²A laamtaxam ee: «Xar o ga’aa?» Doonaanum ee: «Ke um ga’aa de a pagal alaa refna wurus fa ƥor oo fo yipir diwliin no jul ole ten, soo ta saq xa lampa ɓetaa ƭaq fo xa mees ɓetaa ƭaq na xa lampa xe ndefna no jul ole na pagal ale.

³A jega itam taxar oliiw ƭik kaa yoorooxuuna, leng ne na ñamaak ale no mband ne, lakas ne na janoon um.»

⁴Kafatinaam fa lay fee soo laamit a malaaka fee layoogna fa mi yee: «O yaal es, xar keene a tektu?»

⁵Malaaka fee layoogna fa mi a doonaxam ee: «Ndax andiro ke ta tekitna?» Doonaanum ee: «Ha’aa de, o yaal es!»

⁶Maaga, a xooldandaxam ee:[5]

¹⁰«Xa lampa ɓetaa ƭaq axeene ndefu a kid ake no Yaal oxe na ngorooxaa ke na xewaa took lanq ke fop.»

¹¹Kafaam fa lay faa soo laamtin ee: «Xar taxar oliiw ƭik kene no saax o ñamaak ole fo no janoon ole na pagal ale a tektu?»

¹²Ɓaataam teen laamit lakas nene: «Xar a naaq a ƭaq ndaxar oliiw ake na yuurnitaa diwliin faa na nandtaa wurus na xa baaƥ xa ƭaq wurus axe a tektu?»

¹³A doonaxam ee: «Ndax andiro ke da tekitna?» Doonaanum ee: «Ha’aa de, o yaal es!»

¹⁴Maaga a layaxam ee: «Den ndefu ɗik we ƭuumeena, ngeenooxna mbaambir no Yaal oxe jegna lanq ke fop.» A tegit ake njaginna na Serubabel Keeke refu fa lay fee no Yaal oxe jaginna na Serubabel: «Refee yee na pexey katil of mbaat na pexey doole of o fadnitkaa calel of, ndaa na pexey Yiif le mi. Mi o Yaal oxe Hupna fop layun. Wo o joong o maak ole, an refo? Xan o fodrandel mbaambir Serubabel. Xan a doon ɓil faraaj le na seek um ndeer xa soroxole xe yee: ‹Ndaw ne ta mositna! Ndaw ne ta mositna!› » O Yaal oxe a daawnaxam fa lay um na xa ƭelem axene: «Xa ƥay axe Serubabel sinju Mbind nene, xa ƥay um na ƈutandkan, too xan nu and ee o Yaal oxe Hupna fop lulaxam me nuun.» Ba o xeef o neewel ole no calel peraand keene, ndaa felakinooxi kañ ne ga’oona ɓil fer le no ɓay Serubabel.