Read NQAARIIT NE ROOG Sakari 6 Bible Online

Sakari 6 - NQAARIIT NE ROOG bible

Sakari 6

¹Yoɗahinaam a kid es too ga’aam kam mbeeñil a sareet a nahak akaa sutooroogna a ndeer xa coong xa ƭaq, soo xa coong axe a ndef xa coong xanjar.

²Pis cakeer ngumin’e na sareet a eetaand ale, pis ƥaal a ngumnel na ƭikandeer ale,

³pis bari na tadkandeer ale, soo pis ceeñ na nahkandeer ale.

⁴Kafaam fa lay faa soo laamit a malaaka fee layoogna fa mi yee: «O yaal es, xar a sareet a kumne keene a tektu?»

⁵Malaaka fee a doonaxam ee: «Den ndefu qeñ nahik ke na asamaan na sutooraa me da ndeeƭna mbaambir no Yaal oxe jegna lanq ke fop.»

⁶Pis ƥaal ke ngumneena a leng na sareet ake xan a sag no saax le no ɓemb-roog o janoon, bari ke a sag farna fo mudand, soo ceeñ ke a sag no saax le no ɓemb-roog o ñamaak.

⁷Pis cakeer ke kaa ƥeroogu, a tayaa ngeblel a mbidik lanq ke. O Yaal oxe a laya a den ee: «Ndetyo mbid lanq ke!» Maaga, a mbidka lanq ke.

⁸A xoyaxam soo a layaam ee: «Ga’angi, we sagna no saax le no ɓemb-roog o janoon xan a mbi boo Yiif es a jalaa maaga.»

⁹O Yaal oxe a daawnaxam fa lay um na xa ƭelem axene:

¹⁰«Fat o xot ci’it ke Helday fa Tobiya fa Yedaya a ƥisiidna, too da ngat no we ƥis’eena gilaa saax took o hup doole. Fat o ret xaye no mbind Yosiya fee o ƥiy Sefaniya, too xan o soƥ a den maaga, da inoortiid Babilon.

¹¹Fat o xot teen xaaliis fa wurus, fi’tin o ndip, soo rokin no xoox le Yosuwe fee o saasadax o maak oxe, too a ref o ƥiy Yosadak.

¹²Fat o layin ee: ‹Keeke o Yaal oxe Hupna fop a layu: O koor oxe ne’eena Dugatin[8] oxey. Fop xan a jolit ɗuga a caf um, soo ta max Mbind es, mi o Yaal oxe.

¹³Kaam ee ten na maxkaa Mbind ne mi. Xan a ɓoxotel o ndam, a moof no uum-maamaad um, a maadooxan xeet fee. Xan a ref o saasadax no uum-maamaad um, too ƭik ke fop xan a nanoor tigi.

¹⁴O ndip onqe xan a geekel no Mbind es, a wetandooreel a Helday[9] fa Tobiya fa Yedaya fo o nayaƭar ole no ƥeenqe Sefaniya.› »

¹⁵Xan wiin a inoor koƭu soo a njal no maq ne no Mbind ne mi. Maaga, xan nu and ee o Yaal oxe Hupna fop lulaxam me nuun. Keene xan a jeg, nu nan-gilooxangaa no ndigil o ñuxur no Yaal oxe Roog nuun.