Read NQAARIIT NE ROOG Sakari 7 Bible Online

Sakari 7 - NQAARIIT NE ROOG bible

Sakari 7

¹No hiid o nahkandeer olaa no maat Daryus, no ñaal nahkandeer ne no nqool o ɓetuu nahkandeer onqe, refna o nqool Kisleew o Yaal oxe a daawna a Sakari fa lay um.

²Wiin we Betel a lul’a a Sareseer fa Regem-Melek fo goor um, ndax da nqeɗook o Yaal oxe

³soo a laamit saasadax we no Mbind ne no Yaal oxe Hupna fop fo duleer we yee: «Ndax i mbara o ƭomatoox soo ngoor no nqool o ƥetkandeer onqe, ne i meruuna o mbi’taa xa kiid xa mayu?»

⁴Maaga, o Yaal oxe Hupna fop a daawnaxam fa lay um na xa ƭelem axene:

⁵«Layi xeet fee no saax le fop fo saasadax we yee: ‹Ye nu ngooraa soo ƭomatooxaa no nqool o ƥetkandeer fo no ɓetuu ƭikandeer onqe boo xa kiid qarɓeen ɓetuu ƭik a gar fa xaye, ndax no ndigil mi nu ngooranoogu?

⁶Boo nu ñaamaa, yeraa, mee ndax o mbelakinax nuun taxun.› »

⁷Ndax keene refee fa lay fee o Yaal oxe a layna a reefandin no duleer we yaaga, ye Yeerusaleem a geneena too a ref no yaadax, ten fo teeru ke mbiduuna, soo o jegel ole no ɓemb-roog o ñamaak fo ole na yulanq ake a ngenel itam?

⁸O Yaal oxe a daawnaxam fa lay um na xa ƭelem axene:

⁹«Ngate’ityo a ƭat, njeg o mbeq fa yirmande a ndeer nuun.

¹⁰Ba nu toroxand o ñaaw oxe mbaat o waan ole, o gataakoon ole mbaat o ndool onqe, too ba nu yuuɓanir paaxeer. Mi o Yaal oxe Hupna fop layun.

¹¹Kaa koy, a mbaña o nan-giloox, a nquun soo a sux nof den, ndax nankee.

¹²A saƭkanda a qeeñ den koŋ nen jamaa, ndax nan-gilooxkee a cangin es fo fa lay es, mi o Yaal oxe Hupna fop, lultiiduuma na pexey Yiif es, reefandin no duleer we yaaga. Keene garu fo fuux ɗomu le mi, mi o Yaal oxe Hupna fop.

¹³Feek nan-gilooxee, ye um xoyaa a den, mi itam nan-gilooxiim, ye da ƈufginooxaxama. Mi o Yaal oxe Hupna fop layun.

¹⁴Pasaraam a den a ndeer qeet ke da and’eerna fop, da nqaƴ a cinj den saax laa wootatna, too o leng retoogatee a garaa teen. A mbi’a saax felu leene a koƥ-a-ƥor.»