Read NQAARIIT NE ROOG Sakari 8 Bible Online

Sakari 8 - NQAARIIT NE ROOG bible

Sakari 8

¹O Yaal oxe Hupna fop a daawnaxam fa lay um na xa ƭelem axene:

²«Kaam jeg na Siyoŋ o mbeq o maak, naalan naal ƭomu. Mi o Yaal oxe Hupna fop layun.

³Xam nomtoox Siyoŋ, gen a ndeer Yeerusaleem. Yeerusaleem xan a xoyateel ‹Teeru fa ngore’u fee›, soo o joong ole mi a xoyeel ‹o Joong o tedu le›. Mi o Yaal oxe Hupna fop layun.

⁴A koorgi ke fo a nogoy ake xan a moofahin no qel ke Yeerusaleem, oxuu refna a damloox no loq um yaam nogoy um. Mi o Yaal oxe Hupna fop layun.

⁵Paayo ke na teeru fee xan a may fo mboƥ ngoor fo mboƥ ndew naa na ŋasaa teen.

⁶Keene a waagooxangee na kid no we yoqna na xeet fee ndiiki sax oo, xan a waagoox na mi. Mi o Yaal oxe Hupna fop layun.

⁷Xam muclit xeet es no saax le no batand fo no le no mudand.

⁸Xam nomtiid a den, too xan a ngen kam Yeerusaleem. Xan a ndef xeet es, soo um ref Roog den, no ngor fo no cofel. Mi o Yaal oxe Hupna fop layun.»

⁹Saqyo njambaar! Nuun we nanaa ndiiki fa lay fa leng kut fee duleer we a yegnitna no gon es, ye a per ake no Mbind es a ndooneel ndax ta maxatinel. Mi o Yaal oxe Hupna fop layun.

¹⁰No kaa adooxna a pe akaaga, o kiin oxe jeg’ee ndabid leng, too njegel itam jeg’iran. We ndetoogna a ngaraa njeg’ee jam muk yaam o pañ oxe, too kaam hoƥatrand’u wiin we fop.

¹¹Ndiiki koy, fesoorkatiim fo yoqatin we na xeet fene ne fesoorit’uuma fa xeet fee no camaane ke mbaafna. Mi o Yaal oxe Hupna fop layun.

¹²Xam duuf jam fee. Ndaxar biiñ ne xan a cooxit xa tim um, lanq ke a cooxit ke da mbatna, soo asamaan a cooxit a teƥ um. Xam lamnoor yoqatin we na xeet fene paax keene fop.

¹³Nuun mbind Yudaa fo nuun mbind Isra’el, ne nu ndefit’ina saloor a ndeer qeet ke, neene nu ndefitkaa we na mbarke’tateel, a cinj yaa um mucilkaa a nuun. Ba nu saɗar dara ndaa saqyo njambaar!

¹⁴Ye daan nuun a mbuuxnooraxama, yuuɓ’aam o fi a nuun paaxeer, too ricooxinum. Mi o Yaal oxe Hupna fop layun.

¹⁵Ndiiki koy, yuuɓaam o fi’an a Yeerusaleem fo mbind Yudaa paax. Ba nu saɗar dara boog!

¹⁶Keeke refu ke nu mbarna mbi: Naangyo layraa ndigil a ndeer nuun, ngate’taa ndigil no qeloorand ke nuun, ndax jam a jeg.

¹⁷Ba o leng a yuuɓan o kend um paaxeer! Ba nu mbex o ndaaɓooxaa na xa maaƥ, yaam keene fop kaa ndef tig kaa sibuuma! Mi o Yaal oxe layun.»

¹⁸O Yaal oxe Hupna fop a daawnaxam fa lay um na xa ƭelem axene:

¹⁹«Koor ne no nqool o nahkandeer onqe, ne no nqool o ƥetkandeer onqe, ne no nqool ɓetuu ƭikandeer onqe fo ne no nqool xarɓaxayandeer onqe xan a ndefat no mbind Yudaa ñaal o mbelakinax fo o ɗaay, a ndef toofeen pelu. Kaa koy, mbexyo ndigil fa jam! Mi o Yaal oxe Hupna fop layun.

²⁰Qeet can fo we ngenna no teeru mayu xan a ngarahin Yeerusaleem. Mi o Yaal oxe Hupna fop layun.

²¹We ngenna na teeru fa leng xan a ndet na fa lakas, a ndamtin ee: ‹Aca i nqeɗook o Yaal oxe, mbaaƭik o Yaal oxe Hupna fop.› Oxuu refna xan a lay ee: ‹Mi yoo xam ret!›

²²Neene, qeet mayu fo a saax a cegu doole xan a ngar Yeerusaleem, a mbaaƭiidaam, mi o Yaal oxe Hupna fop, soo a nqeɗooxaam.

²³No ñaal kaaga, wiin xarɓaxay waa mbogeerna lak xan a saaƭoox no noflax ndoki no Yaawuur oxuu refna, a layan ee: ‹Kaa i mbug o yoon fa nuun, yaam i nana yee Roog oxey fa nuun.› Mi o Yaal oxe Hupna fop layun.»