Read NQAARIIT NE ROOG Sakari 9 Bible Online

Sakari 9 - NQAARIIT NE ROOG bible

Sakari 9

¹Keeke refu fa lay fee no Yaal oxe: Fa lay fee no Yaal oxe a reta boo no saax le Hadrak, a fadik na teeru fee Damaas[10]. Refee yee na carind ake Isra’el soom a kid no Yaal oxe a ngaanu, ndaa took no wiin we fop.

²Fa lay fee no Yaal oxe xe nannooxaa kam Hamat, teeru fee detoorna fa Damaas, a fadnooxaa kam Tiir fa Sidoŋ, ke da kañeel yaam o jeg-yiif fop oo.

³Tiir kaa max saŋe me widuuna, a fokatanoox xaaliis fa nqoolu boo jegee naa ta fi’uuna, wurus um ee gañ nen lopopooƈ le no ped ke.

⁴Kaa koy, o Yaal oxe xan a jaɓin, saŋe ke ten, ta riimand a den kam o maag ole, soo ta raaɓel.

⁵Yaa Askalon a ga’kan, xan a diid boo a sendaa, ten oo Gaasa yoo. Ekron itam xan a diid, yaam xan yaakaar um a tas. Gaasa jegkatee o maad, Askalon a fes a pec,

⁶we njaxasna a ngenik Asdod, o nqaaƈ no Fiifilista we, um ñufin ɗuƭ.

⁷«Xam fi boo ñaamkatee med, a mbes a cinj ñaamel qoolaƭaru ke da ñaamaa. Yoqatin we no Fiifilista we xan a mbi’aam Roog den, a mbog na qaw ake Yudaa, Ekron a fogat na xeet es, ne ta refit’ina no Yeeyebus we yaaga.

⁸Xam saŋe Mbind es, widin o kurul-keƥ boo a yaj no xiixire leng no we na ndeefaa meen daawkiran, too o leng garkatee ndax ta toroxand xeet es, yaam mi refatu o kaynaak den.»

⁹Wo Siyoŋ, o ndoog onqe, ngela felakinooxi, wo Yeerusaleem, o ndoog onqe, jibni xa soroxole! O maad of oxey a garaa me wo, a jof, a ref mbir mbadar a lanq. Kaa koy, magnandooxee too took o faam a ŋaayu, took o mol, o ƥiy no faam o rew.

¹⁰«Xan a fi boo a sareet-xire jegkatee kam Efrayim, a watin pis qire’ir ke kam Yeerusaleem, a qali ke nqire’toogeena a ƥolel. Xan a yegin qeet ke fop jam, a maadoox no ke xotitna na juwaam boo na fa lakas, a dalit no xuluɓ ole Ofrat boo no cat adna.»

¹¹O Yaal oxe kaa tee: «A koom, xam ɗeet no ngiɓoor ne i ndalnitna fo’oy, sut we ndefna faɗ na nuun no gamb jegee foofi le da ƥek’eena.

¹²Nuun faɗ we njegna yaakaar, nomtooxyo no mbiñ o mbooru nqe nuun! Xaye sax mexe layaa a nuun ee xam rabid a nuun coono nuun boo a caf a ƭak.

¹³Xam ŋaayin a Yudaa fee a qali es, ɓonoox a Efrayim fee a kas es. Wo Siyoŋ, xam hoƥatrand xa ƥeef fo Yaayawan we, fi’ong nen laƥ a salma-koor no ɓay es.»

¹⁴O Yaal oxe xan a feeñ, a ƴufgiid xeet um, a kas um a mbaasloox nen xa kiiñaand. O Yaal oxe na refkaa boo faw xan a jibin a tuluɓ, a garaa kam a und ale no ɓemb-roog o ñamaak.

¹⁵O Yaal oxe Hupna fop xan a saytoox xeet um, a maafit fañ we a ƭak ake no suusaand um soo a duut a den. Xan a ƥax fo’oy le no fañ den, wee ndax biiñ fee da yeraa, ta sil took den fop nen fo’oy le na wiiseel no kooñ ke no sadaxand ole.

¹⁶A koom, xan o Yaal oxe Roog den a mucil xeet um ne o kaynaak a muclitaa ged um. Xan a meleƈaa kam saax le ten nen a ƥil a cafeñu no ndip no maad.

¹⁷Ndaw ne lanq ke a mbaaxitkaa soo a mos! Xan a mbat bele fa biiñ, xa pes axe fo roog we a naang naluƈ.