Read NQAARIIT NE ROOG Malaki 1 Bible Online

Malaki 1 - NQAARIIT NE ROOG bible

Malaki 1

¹Keeke refu ke o Yaal oxe a layna xeet fee Isra’el a reefandin na Malaki[1].

²O Yaal oxe kaa tee: «Kaam fex a nuun», soo nu laamtaxam ee: «Na xar fexo a in?» um doon teen ee: «Ndax Esawu reeƭee o maag Yakoob? Yaag oo toox de, kaam fex a Yakoob

³soo fañ a Esawu. Kaam fiitin xa coong axe Esawu, ɓoxot lanq ke ta lam’ina xa ƥox-a-koƥ axe.»

⁴Boo Ee-edoom we[2] a layna yee: «Kaa i nduguñel, ndaa xan i inatin ke yenna fop», o Yaal oxe Hupna fop xan a doon teen ee: «Fat da max, um jiƭtin, too xan saax den a xoyeel ‹saax le no kañaan ne›, soo den fa qoox den o mat, da nqoyeel ‹xeet fee o Yaal oxe a fuuxanna boo kili›.»

⁵Xan nu nga’in jaxrañ soo layaa yee: «O Yaal oxe magnu boo kaltaa xa ŋat axe Isra’el.»

⁶O ƥiy kaa ci’aa a faap um cer, soo o tag a niwaa o yaal mbind um. Yaaga boog, mi fee faap nuun, xar taxu nu ci’iraam cer? Ndi mi fee o Yaal nuun, xar taxu nu niwiraam? Mi o Yaal oxe Hupna fop na laamtaa a nuun keene, nuun saasadax we na ñawle’aa gon es soo ndamtin ee: «Na xar i ñawle’taa gon of?»

⁷Ten refu yee kaa nu ƥoxotaa ñaamel qoolaƭaru no sadaxand ole mi. Kaa nu laamtahinaxam ee: «O Yaal oxe, na xar i nqoolaƭarandtang?» Ten refu, yaa nu nqalaataa yee o sadaxand ole mi, mi o Yaal oxe jaree niwel.

⁸Boo nu sadaxiidaxama njegel mbuulu, ndax keene faaxa? Kaam ee boo nu ƥoxotiidaxama njegel nqaru mbaat njiru, ndax keene a ƭat oo? Ƥoxotangyo a gofornoor nuun njegel nandu neene boo nga ndax xan a sawar na nuun boo a dalnaa a nuun? Keene o Yaal oxe Hupna fop a layu.

⁹Ndiiki koy, njeemyo o nqeɗoox a Roog, ndax ta yirim a in! A woora yee jaaɓkee a nuun yaam sadax ke nu ƥoxotan. Keene o Yaal oxe Hupna fop a layu.

¹⁰Ke moƴna o leng na nuun a weg begax ke no Mbind Roog ne, ndax nu ngeƥandiidkatee na kasaara fiɗel no sadaxand ole mi. O Yaal oxe Hupna fop kaa tee: Kaa nu soofaam, too sadax ke nu ƥoxotaxam mbeliraam.

¹¹Ke xotitna no batand boo no mudand gon es kaa siw kam qeet ke fop, too o mbiñ onquu refna cuuraay kaa doxeel no gon es, soo um ɓoxoteel sadax qoolu, yaam gon es kaa siw kam qeet ke fop. Keene o Yaal oxe Hupna fop a layu.

¹²Nuun o mat, kaa nu maasandaa gon es, yaa nu nqalaataa yee o sadaxand ole mi, mi o Yaal oxe jaree niwel, too ñaamel kuu ndefna a mbaage o ƥisiid teen.

¹³Kaa nu layaa sax ee: «Waafu! Keeke mat o torox oo!», soo nu ngarangaa sibdan. A soƥa fop koy, cegel kaañooru na taamaala mbaat kaa na laƴaa mbaat ciru doŋ nu ƥoxotiidaa. Keene mbug o ndef ke nu sadaxaxam! Jaɓkinum de! Keene o Yaal oxe Hupna fop a layu.

¹⁴Sabab took no naanax oxe jegna kam o siir um njegel ngiñu naa ta regaxama, mi o Yaal oxe, soo a guut, a sadaxaam njegel siku, yaam a woora yee o maad o maak refum, too gon es kaa saɗarnoox kam qeet ke fop. Keene o Yaal oxe Hupna fop a layu.