Read NQAARIIT NE ROOG Mace 1 Bible Online

Mace 1 - NQAARIIT NE ROOG bible

Mace 1

¹Daan we Yeesu Kiristaa fee refna o ndaan Dawid fo o ndaan Abraham a mbinde no safe leeke. Daan weene ndefu:

²Abraham kaa rim a Isaak, Isaak a rim a Yakoob, Yakoob a rim a Yudaa fo maag um fo xa teɓ um,

³soo Yudaa a rim fa Tamaar a Peres fa Sera. Peres rimu a Hesron, Hesron a rim a Aram,

⁴Aram a rim a Aminadab, Aminadab a rim a Naason, Naason a rim a Salmoon,

⁵Salmoon a rim fa Rahab a Bowaas, Bowaas a rim fa Ruut a Obed, Obed a rim a Isay.

⁶Isay rimu o maad Dawid, soo Dawid a rim fo xaa reeƭna o tew Uriya a Salomo.

⁷Salomo rimu a Rehabewam, Rehabewam a rim a Abiya, Abiya a rim a Aasa,

⁸Aasa a rim a Yosafat, Yosafat a rim a Yehoram, Yehoram a rim a Usiya,

⁹Usiya a rim a Yotaam, Yotaam a rim a Ahas, Ahas a rim a Hiskiya,

¹⁰Hiskiya a rim a Manaase, Manaase a rim a Amon, Amon a rim a Yosiya,

¹¹Yosiya a rim a Yekoniya fo xa teɓ um, yaaga ƥisafulaand Babilon took o hup doole.

¹²A cinj ye da ƥiseena Babilon took o hup doole, Yekoniya a rima a Se’alti’el, Se’alti’el a rim a Serubabel,

¹³Serubabel a rim a Abiyud, Abiyud a rim a Eliyakim, Eliyakim a rim a Asoor,

¹⁴Asoor a rim a Saadok, Saadok a rim a Akim, Akim a rim a Eliyud,

¹⁵Eliyud a rim a Eleyasaar, Eleyasaar a rim a Matan, Matan a rim a Yakoob.

¹⁶Yakoob rimu a Yoseef, o fes Mari fee refna ya Yeesu, too ta xoyeel Kiristaa fee o Muumucil oxe regteena.

¹⁷Yaaga koy, no kaa xotitna na Abraham boo na Dawid, daan xarɓaxay fo daan nahuk a ndefu, soo kaa xotitna na Dawid boo na ƥis alaa Babilon took o hup doole a ref daan xarɓaxay fo daan nahuk. Ke xotitna na ƥis alaa Babilon took o hup doole boo na Kiristaa fee daan xarɓaxay fo daan nahuk a ndefu.

¹⁸Neeke o rimel ole Yeesu Kiristaa a xewit’u: Mari fee ya um, o toog Yoseef a reeƭu. Yaaga yoonafulee, Mari a fud’a na pexey Yiif Tedu le.

¹⁹Yoseef fee o fes um a reeƭa o kiin o cofu, too bug’iran o gaci’noor. Ten taxu, a fexeyooga o xaƴir fo ten na pet.

²⁰Ye ta xalaataa kaaga, malaaka no Yaal oxe a feeñooxaan no ƭaaɗ, a layin ee: «Yoseef, o ndaan Dawid, ba o saɗar o xot a Mari fee o toog of, yaam o ƥeenqe ta fudna, no Yiif Tedu le a inooru.

²¹Xan a ñoot o ƥiy o ngoor, too fat o ne’in Yeesu[1], yaam ten na mucilkaa xeet um no pakaad den.»

²²Kaaga fop a xewa ndax ke o Yaal oxe a lay’ina a reefandin no tuleer oxe a fadnoox:

²³«Xan o toog oxaa andeerna adna a ref fo fud, too xan a ñoot o ƥiy o ngoor onqaa na ne’keel Imanu’el», tekitna «Roog oxey fa in».

²⁴Ye Yoseef a yokooxna, a fi’a ke malaaka fee no Yaal oxe a hebil’uuna, too a dolnira fa Mari.

²⁵Kaa koy, mos’ee o and ke ta refna boo neen a ñootu o ƥiy o ngoor onqaa, too a ne’aan Yeesu.