Read NQAARIIT NE ROOG Mace 11 Bible Online

Mace 11 - NQAARIIT NE ROOG bible

Mace 11

¹Yaa Yeesu a janginna daalbe xarɓaxay fo daalbe ɗik waa keene boo a ƴut, a inooxa maaga. Kaa jangnoogu, a waare’aa kam teeru kaa den fop.

²Yaa Saŋ a nanitna kam kaso faa wiin we a laytaa a pi ake Kiristaa, a lula daalbe um

³ndax da laamit a Yeesu yee: «Wo refu oxe warna o gar, ndi kaa i mbar o cung o lakas?»

⁴Yeesu a doona a den ee: «Ndetyo mbetandoox a Saŋ ke nu nanaa fo ke nu nga’aa.

⁵Fuul we owe nga’aa, ɓoof we a ñaaƴaa, we njegna a tik-a-maak ale a nqoolandeel, ram we a nanaa, xon we a nqontooxaa, soo Yegil mbaax ne a yegneel rool we.

⁶Oxuu tolofkeerna yaam mi, a ɗaaya.»

⁷Yaa da nqaadatna, Yeesu a laya wiin mayu waa no kaa farna na Saŋ o Paabatiise xe yee: «Xar nu ƭeetik’u na koƥ-a-ƥor alaa? Ndax o siind olaa nqeñ ne a yo’naa nu ƭeetik’u?

⁸Ndi xar nu ƭeetik’u boog? Ndax o kiin oxaa rokooxna toki mosu nu ƭeetik’u? Kaa koy de, nuun moƴu o and ee we na ndokooxaa toki mosu owe no pind no maad ke.

⁹Layangaamoo ke nu ƭeetik’ina boog! Ndax o tuleer Roog nu ƭeetik’u? Ii, ndaa mexe layaa a nuun ee oxaa hupna o tuleer Roog sax oo.

¹⁰Ten refu oxe ne’oogeena ye ta bindeena yee: ‹Mexe heblaa o tuleer es ta adooxong, a jagandanong a ƭat.›

¹¹No ndigil, mexe layaa a nuun ee: No we rew a ndimna fop, feeñee o leng oxaa hupna a Saŋ o Paabatiise xe, too yaaga fop koy, oxe moƴna o neew no Maat ne na asamaan hupun.

¹²No kaa xotitna na jamaane faa Saŋ o Paabatiise xe boo fa ndiik, Maat ne na asamaan kaa bugel o gef fa doole, too yaal toole ke na njeeman o njang.

¹³Duleer we fo kebil ke fop a mbadanda nduleer den boo na Saŋ o Paabatiise xe.

¹⁴Nu mbugangaan o and a paax, ten refu Eliya fee war’ina o gar.

¹⁵Oxuu jegna nof, fat a nan-giloox!

¹⁶Yaaga boog, xar um nandanditkaa wiin we ndiiki? Kaa nand fo xa teɓandoong axaa ndefna na baayo, too a lay xa kend den ee:

¹⁷‹I mbakana a nuun, too nu mbecee, i ngiman a nuun a kim a mboy soo nu mbañ o lool.›

¹⁸Saŋ a gara, ñaamee yeree soo da lay ee: ‹Jini damun›,

¹⁹o Ƥeenqe no kiin oxe a gar, a ñaamaa a yeraa soo da lay ee: ‹O ñaañaam fo yeeyer oo, a ref xaariit no we na ndabdinooxaa juuti fo no baabakaad we.› Kaa koy, Roog a fi’a jam, yaam o jeg-yiif ole a jofandte a pi um.»

²⁰Yeesu a refata no xasanaa teeru kaa maa ta moƴ’ina o lalit a pi katil um, yaam mbes’ee pakaad den a cinj. Kaa lay’u yee:

²¹«Ndaw sabab took of, wo Korasiin, ndaw sabab took of, wo Betsayda, yaam a pi katil ake mbi’eena me nuun a mbi’’ange kam Tiir fa Sidoŋ, a mbeskooga pakaad den a cinj yaaga, too a nderoox xa saaku, a moof no ndaw, ndax da lalit ee a ndicooxa.

²²Ten taxu mexe layaa a nuun ee na bes faa no nqel naa Roog, Tiir fa Sidoŋ na moƴkaa o yooɓiɗ a nuun hate.

²³Wo Kapernawum o mat, ndax xan o yoɗel boo na asamaan? Ha’aa! Xan o fudnel boo kam jaaniif. A pi katil ake mbi’eena me wo a mbi’’ange kam Sodoom, a maadkooga boo xaye.

²⁴Ten taxu mexe layaa a nuun ee na bes faa no nqel naa Roog, Sodoom na moƴkang o yooɓiɗ hate, wo Kapernawum.»

²⁵Na pe akaaga, Yeesu a laya yee: «Faap, mexe gidmang, wo o Yaal asamaan fo lanq, yaam ɗasnaa kene yaal-o-and we fo jegu yiif we, soo feeñlin we moƴna o neew.

²⁶Iyo Faap, neene mat a waagu o refit, yaam ten felong.

²⁷Faap es a cooxaxam fop, too o leng andee o Ƥeenqe a refangeerna Faap fee. O leng andee a Faap fee itam, a refangeerna o Ƥeenqe fo xaa ta buguuna o feeñil.

²⁸Ngaryo me mi nuun fop, nuun we nqijna too meɗel, ndax um ci a nuun a ñootnax.

²⁹Ngadooxyo kadoor ke cooxuuma a nuun, too njangit na mi, yaam kaam ɓuuɓ, too xeeñ es magnandooxee. Nu mbi’angaan, xan xa laaw nuun a ñootnoox.

³⁰Kadoor ke mi a ɓodaxa, too ndoq ne cooxuuma a nuun a yelefa.»